2 DLAŊ MULINARA 33 - Boy Lonana

Mulla Manase taɗta

¹ Manase kak a mulna ni basaɗammi doogo yam mba'. Nam ti mulla ni basara dok-vadl yam vadl.

² Nam li dlara ka ii Yawe jiviɗira. Lini ko ndal njaf suu Yawe dikisi ki fok suu Israelnana na.

³ Nam hoŋ min li ma mbuy kolo ma bum hawaɗam kina kolo olo. Nam min givin ma togolla maŋ Baal lay. Nam pi gu ma vi Aserna kolo lay. Nam goɓ kaŋga fok suu sunda huulona lay, lasi tok masira ki ni kay taɗ lay.

⁴ Nam min givin ma togolla ki hu Ziŋ Lonara ni u li ma Yawe di ana, «Sen hin hu ɦoŋzi ma Yerusalemma ni a fafaɗtana.»

⁵ Nam min givin ma togolla maŋ tlesuu kolo huulonna, kurufu hu kaana fun Ziŋ Lonara.

⁶ Nam tamba lay ŋgal goryom ki duk kura hu ɦuɗugumba Ben Hinnomba. Nam li dlara kumuna masira u dawra lay, joɓ suu wi dlara lay. Nam ɓeŋ huu Yawe ki u dla cora nam laɗ ka irim jiviɗira.

⁷ Nam cuk tlesuu fulina suu asi ceɗesina ki hu Ziŋ Lonara. Doli ɗini Lona di David u goromma Salomon ana, «Hu zi ndaɗta u ɦoŋzi ma Yerusalemma halaŋ an hin tin sen hu ni a fafaɗta.

⁸ An hin ka tuɗ suu Israelna ki day eg mbassa an ɦaɗ ay maŋ somoyosira oloɗi. Lini asi li u gaɗta an dasira ay fun saan ma sunda Moizza, gaɗta halaŋ u nera lay u dlara an min ana asi laɗura lay.»

⁹ Manase viɗ suu Yerusalemma u suu hu mbassa Yudara ki mbuɗusi ki co su njaf suu ɦawa suu Yawe dikisi ki cuk suu Israelna ki balamasina.

¹⁰ Yawe ɓak mulna Manase u suu mamsina lay ni sa ma caa yam kay boy mamma kaɗi.

¹¹ Yawe cukum suu duu suu vi mul ma Asirina ay kamu. Asi mba ndugusiya, vi Manase, cukum njamara funumu, njunum u galina, tuɗum ki vo hu Babilon.

¹² Hu li ma Manase ka hu lassa na ni nam gijaŋŋa a cen Yawe, loomma. Nam wi coomba halaŋ fok Lo ma vi somoyomma.

¹³ Nam cen Lona kay nam mba wam hahawamu. Lona hin heɓ hurum, humum cen mamba, hoŋom ay vo Yerusalem hin kakam balamam hu mul mamba. Ay hu li namma gaw ni, Manse wi ki ana Yawe gasi dew a Lona ni namu.

¹⁴ Ŋgoo dla ndaɗta ni Manase min gulumuna ay ŋgoo Ҥoŋziŋ Davidna dagani. Gulumun namma kolo fiyek cocoo. Fiyekem hoŋ ii u fiɗigina na fun mbo ma Gihonna, jak ha ki hu ɦuɗugumba Sedronda na ta ta tew ay ki hu vun grek ma Kulufna, hu li ma nam gun ay hu Ofel nana. Nam tin gaɗta vi suu duunara ki u voɗoɗ hu ɦoŋzi ma saɓakŋa bel bel hu mbassa Yudara.

¹⁵ Nam yow loogi suu vi suu daŋŋa suu nam cukusi kalafi hu Ziŋ Lonarana ay kiyo u fuli suu ceɗi suu cuki kalafi huna halaŋ. Nam to givin ma togolla ma vi loogi suu ɦawana suu nam minisi ginna ki lay. Kolo kay mbura Ziŋ Lonara mini hura, vo hu Yerusalem lay, cukusi kamayasi ha ki doŋ kaana na day.

¹⁶ Nam hoŋ min givin ma togolla vi Yawe balamamu, gijaŋ li ɓivun ma taɓ duk ɦoŋga u ɓivun ma ŋga Lonana, ɦal voɗta maŋ suu Israelna ana asi goɓmi Yawe, Lo ma vi suu Israelnana.

¹⁷ A gasisra ni suuna ka li ɓivunna ha ki keŋ kay li ma mbuyna tuwa, may ni kay a ŋga Yawe Loosinara.

¹⁸ U dlara vi Manasera halaŋ ka ɓiiri hu magaara Sunda vi Muli suu Israelna. Hu li ma daŋŋa asi fam cen mamba nam cen Lonara, u boy ma suu jok vun Lonna damma ma col ay fun Yawe, Lona vi suu Israelnana.

¹⁹ Cen mamba u humba Lona humum cen mambara u dla coomba nam laɗta, lira nam li ka ɗegee fok Lonaɗira, ndum li ma nam min li ma li ɓivunna maŋ loogi suu ɦawanana, pi gu ma teteɗna zeɗ zeɗ lay u foto tlesuu ceɗina layna, jew bay a nam wi coomba a hoŋ ay eg Lona tura ni tle asina halaŋ ka ɓiiri magaara sunda vi Hozai.

²⁰ Hu li ma Manase miɗna, asi pammi hu liimma. Goromma Amon varak balamam a mulna ni namu.

Mulla Amon taɗta

²¹ Amon kak a mulna na ni basaɗam ki ni dok-mba' yam mba'. Nam ti mulla hu Yerusalemmi basara mba'.

²² Nam li dlara ka ii Yawe jiviɗira ni ko bum Manase lira na olo. Nam li ɓivunna maŋ fuli suu bum lasi kana, goɓosiya.

²³ Na may nam hin wi coomba ka fok Lona ko bum Manase lira naɗi. Nam hoŋ li dla cora ni su bum na ɗow.

²⁴ Suu asgaari mam suu ŋgolona vi vunusi kamu, cammi kalafi hu ziimba.

²⁵ Na may suu Yudana halaŋ tok vunusi ci asgaari suu camma ki may. Hin varakam goromma Josiyas balamam a mulna may.