2 DLAŊ MULINARA 32 - Boy Lonana

Senakerib duu u mulla Yudara

¹ Ŋgoo dla ndaɗta hu li ma nam tak sun mamba degeera ki na ni, Senakerib, mul ma Asirina, mbay hu Yuda ndug ɦoŋzi ŋgolo ma saɓakŋa halaŋ ma ka hu mbassa Yudarana, ana nam tlam kiyo.

² Hu li ma Ezekiyas wi ki ana Senakerib ɦuɗ tam ay eg Yerusalem a ndammi yara ni,

³ nam di muli mamsina u suu asgaari mamsina ana, asi tos goloŋga ha ki bunsu doŋ kaanara kiyo. Asi li ko nam dira na may, tos goloŋga ki bel bel.

⁴ Asi tok tasi ay bolow cocoo, tos goloŋga ki halaŋ halaŋ u zul mbo ma ɓaɗ ay kaŋga u ndaŋgarana lay. Asi ɓak tasi ana, «Ka suu Asirina hin mbay tani fi mbona ŋgol oloɗi.»

⁵ Ezekiyas hurum sooy ɦiŋ cocoo, hoŋ min gulumun ma ŋguy kay ɦoŋzinana kiyo. Nam min zira kolo fiyek ta juɓ u zina ki may, hoŋ min gulumun ma daŋŋa ay ii ŋgoo hu olo. Nam min zi ma Millona ki saɓak cocoo. Zi namma ni hu Ҥoŋzi Davidna. Nam dli saɓagina ŋgol cocoo, cil mbarina bolow coco lay.

⁶ Nam yow asgaa suu daŋŋa fok suuna hu ɦoŋzina a golosira. Nam tok suuna ay hu vun grek ma kay ɦoŋzinana dasi boyna ana,

⁷ «Lagi ndaaɗi. Lakagi saɓaki, lagi ndaa vaɗi, lagi ndaa mul ma Asirina u suu mam suu um bolow canaɗi. Suu saɓak cocona ka uygi ni su mamsina.

⁸ Ay um a duuna ni suu warna ɦawaa. Sa ma ka u aygina ni sa sunda vi Yawe, Looygina. Nam hin njun kaygi duu ni namu.» Boy ma vi mulna namma so huu suu hu ɦoŋzinana ɦasi saɓakŋa cocoo.

Senakerib cuk suu vun sunda ay eg suu Yerusalemma

⁹ Kak dagan na nde ni Senakerib, mul ma Asirina, mba ndug zi ma Lakisna u suu duu mamsina. Ay hu li namma, nam cuk asgaa suu ŋgolona ay eg Ezekiyas u suu Yudana halaŋ suu vo egem hu Yerusalemma, asi mba dam boyna ana,

¹⁰ «Gola ni boy ma Senakerib, mul ma Asirina, damma, agi lakagi hu Yerusalem tu na ca ni u saɓak ma vi ge nage?

¹¹ Ezekiyas dagi ana Yawe, Loogina, hin suɗugi ki hu duk konu, na may nam ganagi yagi ni ganiya. Agi hin laɓ ki ni ko laara u mayra ɦawaa.

¹² Ezekiyas magi namma bulum givin ma togolla ma teteɗ ma ki mini hu lina zeɗ zeɗna ki ni ka nambi su? Hin di suu Yudana ana asi li tokka ni fun givin ma togolla ŋgal ɓivun ma dewna doy hol, li ɓivun masina halaŋŋi huwa.

¹³ Agi wi dlara somoyon u tanda lay laɗ eg suu daŋŋa kay yam mbassara kaɗi su? Loogi suu vi njaf suu asinana hin dooron bay an a ŋgalasi mbas masirara su?

¹⁴ Duk loogi suu vi suu may suu somoyon dikisi mbas masira kina ni lo maa dew ma doo kay suu mamsina kaɗi. Loogina hin suɗugi ki mam hu duk kon kam su?

¹⁵ Mbagi aya, hin tagi a Ezekiyas kaagi boyna a ganagi yagi ɦawaɗi, tinigi hurugi kay boy mammaɗi dow. An hoŋ di olo, lo maa ɗowba njaf suu ɗowba, mul taa ɗowba, ma ndak a suɗ mbas mamba ki ko saɓak ma vi somoyonna dew kaɗi, ki kon tanda lay ni kaɗi. Kay ndaɗta loogi magisina ka ndak a suɗugi kiɗi lay.»

¹⁶ Suu mul ma Asirina sunusi ayna tuɗ fok u ŋgulla ŋgul Yawe Lonara u saam a sunda Ezekiyas.

Senakerib ŋgul Yawe

¹⁷ Mul ma Asirina ɓii magaara ay a ŋgul Yawe Lona vi suu Israelna, di ay hu magaaa ndaɗta ana, «Loogi suu vi njaf suu daŋŋana tew ka a suɗusi suu masisina ki konɗi. Lo ma vi Ezekiyasna hin ka ndak a suɗum suu mamsina kiɗi lay.»

¹⁸ Suu Senakerib cukusi ayna mba sawalla kolo u delesira eŋga u vun Hebrena maŋ suu ka laki kolo kay gulumun ma Yerusalemma. Asi hal ni yal ma mbuɗusi ki ndaana a hin cuk ay a tli ɦoŋzina zakka.

¹⁹ Asi ɓak kay Lo ma Yerusalemma ni ko ndal asi ɓak ay kay loogi suu vi njaf suu daŋŋara na may, asina ni tlesuu suuna yoorosi u bik kosina ɦawaa.

Suu Asirina njay liŋŋa. Senakerib miɗwa

²⁰ Mulna Ezekiyas u sa ma jok vun Lona, Ezayi ma goŋ Amosna, cen Lona kay a nam njun usiya.

²¹ Yawe sun saam ma sunda ha hu kaŋ ma vi suu Asirina, ci suu garaŋ suu wi dla duuna ɦayna ki halaŋ halaŋ u suu ŋgolo suu fok suu duunana lay. Mul ma Asirina zolona vam cocoo. Nam hoŋ vo hu mbas mamba ni na gaw. Fali taa dew ni nam kal kalafi hu zira vi loommara, goryom suu vuɗta cuk um cam ki ni na gaw.

²² Ni ko ndaɗta na Yawe suɗ Ezekiyas u suu mamsina ki ko saɓak Senakerib, mul ma Asirina, u suu babali mam suu daŋŋa lay. Nam ɦasi heɓpa ni keŋ lina halaŋ.

²³ Suuna ŋgol cocoo ɦal tlena ay Yerusalem maŋ Yawe, ɦal tlesuu puura maŋ Ezekiyas, mul ma Yudana lay, tin ay hu li namma na gaw ni, mbassa ŋguy kamba halaŋ ŋgaam cocoo.

Mulla vi Ezekiyas daɓmi na

²⁴ Hu coki ndaɗta gaw ni, mulna Ezekiyas tuguɗi ŋgolla vam na mbir. Nam cen Lona. Nam hoŋom dira ana nam hin garaɗ kiyo.

²⁵ Na may Ezekiyas min ka a gi deɓ Lona kay jivira nam lambaraɗi. Nam hin zaŋ a ŋga tammi ŋgaay na ɗow ta ta Yawe ɓeŋ hurum ki egem lay eg suu Yerusalemma u mulla Yudara bel.

²⁶ Na may Ezekiyas u suu Yerusalemma hin wi coosira kay ndaɗta hu li ma Ezekiyas ka iiri tuna ni Yawe tak yaamba ka ki egesiɗi.

²⁷ Ezekiyas begera kom cocoo. Suuna halaŋ ŋgaam ɦay. Nam min ɦoŋzi ma daŋŋa ki kay a cuk gi lorra u doonora, ɦini mayra gus loɓma, mbul ma his jivina, mbarina u tlesuu daŋ suu dlasi ŋgolona halaŋ.

²⁸ Nam min veeri suu ŋgolo suu a cuk wana may, min li ma vo sum veŋŋa u mbulna, min zi ma cuk haɗna maŋ yoorinana may. Ŋguy liwra ay ki kay yoori mamsina lay.

²⁹ Nam min ɦoŋzi ŋgolna ki kay yoori mamsina ni na gaw, fi yoorina ay hu cocoo, timigiina, ɦugunina, mbutlugina kay Lona ɦammi ɦiza ŋgol cocora.

³⁰ Ezekiyas gi voɗ mbo ma ay hu lokka Gihonda tuɗum a ɓaɗam ay ki ga hu Ҥoŋzi Davidna ni namu. Ezekiyas dlara nam laɗta bel ni nam faɗu.

³¹ Kay ndaɗta suu ŋgolo suu ay hu Babilonna sunum suu vun sunda ay hu mbas mamba a hum u dlara li vo varam wandara. Lona hinim nam li dlaamba u tamba ni a tukummi tukiya a wam daŋ may mamba kira may.

³² U dlara vi Ezekiyassa halaŋ ka ɓiiri hu magaara yaɗ ana wira ŋgayra vi sa ma jok vun Lona, Ezayi ma goŋ Amosna u magaara vi muli suu Yudana u suu Israelna.

³³ Hu li ma nam miɗna asi pammi hu lina vi muli suu ŋgolona hu zulla vi Davidta. Suu hu Yerusalemma u suu hu mbassa Yudara halaŋ tiirimu, ŋgaam bibiŋil mamba cocoo. Goromma Manase varak balamam a mulna ni namu.