2 DLAŊ MULINARA 30 - Boy Lonana

Ezekiyas yi suu Israelna halaŋ halaŋ a li luu ma vun til ma Pakŋa

¹ Ezekiyas yi suu Israelna u suu Yudana halaŋ. Nam ɓii magaara maŋ dee suu vi Efrayimma u suu vi Manasena lay kay a asi mbay hu Ziŋ Yawera hu Yerusalem a li luu ma vun til ma Pakŋa maŋ Yawe, Lo ma vi suu Israelna.

² Mulna u muli mam suu ŋgolona u suu vo hu Yerusalemma halaŋ min a li luu ma Pak namma hu til ma mbana.

³ Asi tew ka a li luuna hu tilim gasiɗi kay ana muli suu li ɓivun suu ɦal tasi kina ka ŋgolɗi. Suuna tok ay ka Yerusalem belɗi may.

⁴ Dla ndaɗta li jivi ii mulna u suu tokina halaŋ.

⁵ Asi vi boy namma gijaŋŋa a ɓii ki maŋ suu Israelna halaŋ halaŋ col ha Berseba ta ta Dan, yasi ay kay a asi mbay ki hu Yerusalem li luu Pakŋa vi Yawe, Lo ma vi suu Israelna, kay asi lurum ka ki u suuna bolow sem dew ko gaɗta dira na tuɗi.

⁶ Suu vun sunda ŋguf yam mbassa ki u magaara mulna u suu muli mamsina ɓiiriɗta halaŋ ki u mbassa Israella ura Yudara bel. Dasi ko mulna dira na ana, «Suu Israelna hoŋ ay ki eg Yawe, Lona vi Abraham, vi Isaak, vi Israel. Nam hin hoŋ ay egegi may. Agi suu hin ka iiri tu suu suɗ ay ki ko mul ma Asirinana.

⁷ Lagi ko ndal somoyogi u gorsegina li ay ka ɗegee ii Yawe, Lo ma vi somoyosina, ɗira na oloɗi. Nam hinisi ki hu ɓalakka ko ndal agi tagira wi u irigi wandara na.

⁸ «Cem wanda soogi yagi ki ko ndal somoyogi na oloɗi. Baaragi kogi fok Yawe. Mbaagi ay hu ziim ma nam mbuɗum ki teteɗ a fafaɗta wanna. Sunugi Yawe, Loogina, kay a nam vaɗ hurum ma ɓeŋina ki egegiya.

⁹ U hoŋ magira agi hoŋ irigi ay eg Yawera, gorsegina u goryogi suu ha ki vii balna hin fi heɓpa ko suu yowosi ha kina. Asi ɦin ndak a hoŋ ay hu mbas ndaɗta lay kay Yawe Loogina ni Lo ma wi hahaw suuna ni Lo ma oora, lini agi hoŋ irigi ay egemu ni nam ka pereɗ ŋgorom magiɗi.»

¹⁰ Suu vun sunda tuɗ ki hu ɦoŋzi ma ŋgolona dew dew halaŋ hu mbassa Efrayimba ura vi Manasera ta ta tew ay ki Zabulon. Na may asi san usiya, panasi lay.

¹¹ May dee suu vi Aserna, vi Manasena, u suu vi Zabulonna hum boy namma hin mbay hu Yerusalem.

¹² Hu mulla Yudara ni ko Lona hin gi kay suu may suu li u boy ma mulna u suu ŋgolo mamsina damma ko ndal Yawe dira na may.

Ezekiyas li luu ma vun til Pakŋa

¹³ Suuna bolow coco tok hu Yerusalem a li luu ma Pakŋa ma ti fu ma bay kuffa dukumma ni hu til ma mbana. Tok ndaɗta ni suuna bolow cocoo.

¹⁴ Asi gijaŋŋa a to givin ma togolla ma ka hu Yerusalem zeɗ zeɗna u givin ma togolla ma ŋgal mbitla his jivira kiyo, yowosi cukusi ha ki hu ɦuɗugumba Sedronda.

¹⁵ Asi ŋgaɗ yoori suu vun til Pakŋa ni hu buu ma doogo yam fiɗina hu til ma mbana. Muli suu li ɓivunna u dee suu vi Levina li tasi ki teteɗ mbaa ɓivun ma ŋgalam ki ŋgalina kay Zira vi Yawera.

¹⁶ Asi gegelay ni col ni hu liim ma sunda ko gaɗta vi Moiz sa ma vi Lonna dira na. Muli suu li ɓivunna tuɗ vo busu ma asi vam ay ko goryoŋ Levina ha may.

¹⁷ Hu li ma suuna toki ŋgol cocona asi li tasi ka ki teteɗ halaŋgi. Dee suu vi Levina li sunda a ŋgaɗ tlesuu luu Pakŋa ni asiya. Ni kay sem suu ka ki teteɗɗina bel, suu ka ndaki a li sunda teteɗta fok Yaweɗina.

¹⁸ Kay suuna ŋgol cocoo, su bel ni suu vi Efrayimma, suu vi Manasena, suu vi Isakarna u suu vi Zabulonna asina halaŋ ni li tasi ka ki teteɗɗi. Asi ka ndak a ti fu ma Pakŋa u tasira bay ɗegee ndaɗtaɗi. May Ezekiyas cen kasi di ana, «Ko Yawe, sa ma jivi ɦayna, bulumusi coosira kiyo.

¹⁹ Maŋ suu tin hurusi a hal Lonana halaŋ, Yawe, Lo ma vi somoyosina, li ni tasi ka ki teteɗ ko gaɗta dira naɗi lay.»

²⁰ Yawe hum cenda vi Ezekiyas, li dla co ka eg suunaɗi.

²¹ Suu Israel suu tok ay hu Yerusalemma li luu ma Pakŋa ma fu ma bay kuffa dukumma buuna kiɗisiya u furira coco, suu vi Levina u muli suu li ɓivunna ŋga Yawe hu buuna tew tew u tlesuu bura zeɗ zeɗ bolow cocoo ni kay a geleɗ Yawera.

²² Boy ma vi Ezekiyasna kal huu suu vi Levina jivi cocoo. Asi ɦal tasi ki u furira maŋ Yawe. Asi li luuna ta ta buuna kiɗisiya, li ɓivun ma mbaa heɓpa u gi deɓpa maŋ Yawe, Lo ma vi somoyosina.

²³ Ŋgoo dagan suu tokina hurusi vi a ɦuɗ buu ma luuna ha fok hu olo, asi hoŋ li luuna hu buuna kiɗisiya u furira olo.

²⁴ Kay ndaɗta mul ma Yudana, Ezekiyas, yow mbutlina ki maŋ suu tokina na buɓ, yoori suu gorina ni buɓ buɓ kiɗisiya may. Suu ŋgolo suu mulina yow ki kay tasi ni mbutlugina buɓ, yoori suu gorina buɓ buɓ doogo may. Muli suu li ɓivunna bolow coco li tasi ki teteɗ may.

²⁵ Suu toki hu Yudana halaŋ furi cocoo u muli suu li ɓivunna lay furi cocoo, njaf suu vi Levina lay, suu Israel suu toki halaŋ suu mbay hu mbassa Israella u suu ka vo hu Yudana lay furi cocoo.

²⁶ Furira li hu Yerusalem ŋgol cocoo kay col ay hu buu ma vi Salomon ma goŋ Davidna, mul ma Israelna, day ni furira ko ndaɗta na li ka hu Yerusalem ɦoy tuɗi.

²⁷ Ŋgoo dagan muli suu li ɓivunna yow kolo paɗ vunusi ki kay suuna. Delesi hum ki duk suuna kal ha ki kolo huu Lona, cen masira tew ha ki huulona, hu liim ma teteɗna.