2 DLAŊ MULINARA 3 - Boy Lonana

Minda min Ziŋ Lonara

¹ Salomon gijaŋŋa a min Ziŋ Yawera ni kolo kay ɦinira Moriyara ni li ma Yawe tak tam ki ii bum David huna. David min lina hu li ma vi sa Jebustena Ornan.

² Nam gijaŋŋa a min zira ni hu til ma mbana, hu basara fiɗira ta nam kak a mulnara.

³ Gola ni ŋgara mulna ŋgaaɗ a min Ziŋ Lonarara, fiyekeɗ ni meter dok-hindi, hayaɗ ni meter doogo may.

⁴ Vunuɗ ma ɓiiri kaŋga a kal hu kurufuna ni meter doogo ko hay zira taɗta na may. Wuluɗ ma kolona ni meter dok-karkiya. Huruɗ ma kurufuna ki hoori u lorra halaŋ.

⁵ Pay goŋ mayra ŋgolla asi hooroɗ ki u gu siprena tam ki ni u lorra taɗta may. Asi lam ki ni ko foto manawna u kawina cilira ko ndal bayna na.

⁶ Asi ndal ta zira ki u ɦini mayra jivi ta gus loɓ cocora, lorra asi li sunda hu u ndaɗta ni lorra col ay Parwayimba.

⁷ Asi li lorra ki eg mbalna u vun goŋga, luɓu goŋga halaŋ, ndal foto Serubimma ki kolo pay goŋga may.

⁸ Asi hin min huu zira daŋga yaɗ ana Li ma ki Saɓaki Teteɗna, hayaɗ ni meter doogo, fiyekeɗ meter doogo lay, lorra asi laɗ a hoo ta zi ndaɗtara nekeɗ ŋga kelewna buɓ buɓ dok-mba'.

⁹ Nek lor ma asi ɓal tlena u namma nekem ii nus kelewna. Huu zira ŋgolla lay asi hooroɗ ki u lorra.

¹⁰ Kalafi hu Li ma ki Saɓaki Teteɗna ni nam yoo Serubimm mba' u kawina, hoorom tam ki u lorra may.

¹¹ Garaŋ Serubimma fiyekeɗ ni meter doogo. Garaŋam dew fiyekeɗ meter mba' u nus ni tew ay ki eg goŋga, garaŋam taa mba' fiyekeɗ meter mba' u nus ŋgaf taɗ ki gaw may.

¹² Garaŋ Serubim ma hiniŋa fiyekeɗ ni meter mba' u nus, tew ha ki pay goŋga. Garaŋam ta mba' hiniŋga ŋgaf taɗ ha ki ura vi Serubim ma hiniŋga gaw may.

¹³ Garaŋ Serubimma fiyekeɗ meter doogo ni ka veɗ kolo vok zira kalafiya.

¹⁴ Nam cil gojolina u baraw ma wili wilina, ma tam ndalina u ma tlawna u baraw dlemba tak Serubimma ki kolo hu may.

Mbal kawina u li ma ŋgal ɓivunna

¹⁵ Nam yoo mbalna na mba' vok zira fiyekemmi meter doogo yam kiɗisiya. Kolo kay yam mbal ma mba' namma jumba ka kuluɓi kamu. Fiyek jum ndaɗta ni meter mba' u nus.

¹⁶ Nam yoo vana ko galina na, kalafi hu zira, cukum ay kolo kay yam mbal ma dukŋa. Nam yoo tlesuu hiniŋŋa, ndalasi tasi ki ko ndal vuɗ grenadinna na, va ma kis, cilisi duk galina.

¹⁷ Nam pi mbal ma fiyeki namma kolo fun Ziŋ Lonara. Maa dew bik njuf may, ma hiniŋŋa bik gulu may. Fun vun ma kal ha kalafina na gay. Asi yi ma pii bik njufna ana Yakinni ana, «Lona mbuɗ dlara saɓakŋa ni namu.» Ma bik guluna yam ana Boaz ni ana «Saɓakŋa col ay ni ko Lona.»