2 DLAŊ MULINARA 29 - Boy Lonana

Mulla Ezekiyas taɗna nam mbuɗ Ziŋ Lonara ki teteɗ

¹ Ezekiyas kak mulna na ni basaɗam ki ni dok-mba' yam vadl. Nam ti mulla hu Yerusalemmi basara dok-mba' yam dleeŋe. Sem sum ana Abiya. Ndaɗ ni goŋ Zakarira.

² Ezekiyas li dlara jivira ii Yawe ni ko bum ŋgolo David na.

³ Hu basara jewra hu til ma jewna nam kak a mulnara gaw ni nam mal vun Ziŋ Lonara zeɗ zeɗ kiyo, minim ki jivi lay.

⁴ Nam tok muli suu li ɓivunna u suu Levina huu taraŋga ii ma u maɗiina nana.

⁵ Ni kay a dasi ana, «Humungi vunun haa, agi njaf suu vi Levina, cemi wanda ni danagi tagi ki na teteɗ. Lagi Ziŋ Yawera ki na teteɗ may. Nammi Lo ma vi somoyogina. Tlesuu njenje suu hu Ziŋ Lonarana yowogisina ki bel bel.

⁶ Kay somoyoygi ay ka ɗegee ii Lonaɗi. Asi li dla cora ii Yawe Looygina cocoo. Asi noyom kiyo. Asi ɦal ŋgorosi maŋ Ziŋ Lonara, hin Yawe kiyo.

⁷ Asi duk vun Ziŋ Lonara kolo halaŋ. Asi tew ku pindilla kiyo. Asi ka ŋgal mbitla his jivira oloɗi lay, ka li ɓivun ma ŋgalam ki ŋgalina hu Ziŋ Lonara maŋ Lo ma vi suu Israelnana oloɗi.

⁸ Dla ndaɗta ɓeŋ huu Yawe ki coco eg mbassa Yudara u ɦoŋzi ŋgol ma Yerusalemma. Nam mbuɗusi a va ma tak pukka kaŋgara fok suuna, mbaa yoo mayra ŋgolla, mbuɗ ni a suu may suu suuna panasina. Agi lay ni ka wi dla ndaɗta ni u irigiya.

⁹ Gola somoyoygi ɓaraŋga tlasi wa, goryoygiya, boyogoygiya u gorɓii maygisina ha ki ni vii balna ni ko dla ndaɗta.

¹⁰ Cemi ni an min a vi galamba u Yawe, Lona vi suu Israelna. Ni kay ana yaamba mba ndi kaygi oloɗira.

¹¹ Goryonu, lagi gagaɗta oloɗi kay Yawe managi ni agiya a agi col fokomu, sunumu, li ni a suu sun mamsina kay a ŋgalam mbitla his jivira fokomba.»

¹² Njaf suu vi Levi suu mbay fokomma ni goryoŋ Kehatna, Mahat ma goŋ Amasayna, Joel ma goŋ Azariyana. Duk goryoŋ Merarina ni Kis ma goŋ Abdina, Azariya ma goŋ Yahallelelna. Duk suu vi Gersonna ni Yoa ma goŋ Zimma, Eden ma goŋ Yoana.

¹³ Duk suu vi Elisafanna ni Simri u Yeyel. Duk suu vi Azafna ni Zekari u Mattaniya.

¹⁴ Duk suu vi Hemanna ni Yehiyel u Simey. Duk suu vi Yedutumma ni Semaya u Uziyel.

¹⁵ Asi tok gorsesina suu li sunda hu Ziŋ Lonara, mbay u gaɗta mulna daɗta ko boy ma vi Yawena dira na may, mba mbuɗ huu Zira vi Yawera ki teteɗ.

¹⁶ Muli suu li ɓivunna cuk kalafi hu Ziŋ Yawera a mbusuɗ huruɗ kira. Asi yow tlesuu asi fasi ay kalafina ay ki huu taraŋga fun Ziŋ Yawera halaŋ halaŋ. Tlesuu njenje suu asi fasi ay kalafi hu Ziŋ Yawera halaŋ. Ŋgoo dagan njaf suu vi Levina yowosi tuɗusi ha ki doŋ kaana hu ɦuɗugumba Sedronda.

¹⁷ Asi gijaŋ sun ndaɗta ni hu buu ma jewna, hu til ma jewna ta ta tew buu ma kalavandina ni asi mba tokka ki fun goŋga hu vun Ziŋ Yawera. Lira a li Ziŋ Yawera ki teteɗta li buuna ni kalavandi. Tuɗ tew hu buu ma doogo yam karkiyana ni sunda mbuɗ huu Zira teteɗta daɓ ki may.

¹⁸ Njaf suu vi Levina tuɗ vo vi mulna Ezekiyas dam ana, «Ami mbuɗ huu Ziŋ Yawera ha ki wa teteɗ halaŋ halaŋ. givin ma togolla u tlesuu kakŋa halaŋ, tabulla cuk funa u tlesuu huna halaŋ.

¹⁹ Tlesuu teteɗ suu mulna Akaz mbuɗusi ki njenjera hu li ma nam ti mullana, ami jokosi ki hu liisi halaŋ, hoŋosi ki teteɗ daŋgadla olo. Gola asi ka tini cemi fun givin ma togolla.»

Ezekiyas hoŋ tokka u ɓivun ma lira kolo balamamu

²⁰ Vini maɗiira wanni, mulna Ezekiyas tok muli suu hu ɦoŋzinana halaŋ. Nam tuɗ kolo hu Ziŋ Yawera.

²¹ Asi mbaa bolo mbutlugina ay kiɗisiya, gamlagina kiɗisiya, gor timigiina kiɗisiya, ŋgegina kiɗisiya may a li ɓivun ma bulum cora kina. Ni kay Ziŋ mulnana kay Ziŋ Lonara kay mbassa Yudara may. Nam hin di muli suu li ɓivunna goryoŋ Aaronna ana asi ŋgalasi kay givin ma togolla.

²² Asi ŋgaɗ mbutlina. Muli suu li ɓivunna vo busuna tuɗ voom kay givin ma togolla. Asi ŋgaɗ gamlagina, voosi busuɗusi kay givin ma togolla may. Asi ŋgaɗ gor timigiina, voosi busuɗusi kay givin ma togolla may.

²³ Ŋgoo dagan asi hin mbaa ŋgegina ay may a li ɓivun ma bulum cora kina fok mulna na gay, fok suu toki halaŋŋa may. Asi baa kosi kasiya.

²⁴ Muli suu li ɓivunna ŋgaɗasiya, li ɓivun ma bulum cora kina kay givin ma togolla u busuɗusi kay givin ma togolla. Ni kay a cen kay suu Israelna halaŋ. Kay mulna ɦal voɗta a li ɓivunna ni kay suu Israelna halaŋ, ɓivun ma bulum cora kina.

²⁵ Nam cuk njaf suu vi Levina kalafi hu Ziŋ Yawera ni u tlesuu bura zeɗ zeɗ diŋŋa u gi dadarina ko ndal David dira na, u dira vi sa ma jok vun Lona, Natan u Gad, sa vi mulna ma wi dlara li ha fokkana. Kay gaɗ ndaɗta col ay ni ko Yawe fun suu mam suu jokom vunumma.

²⁶ Hu li ma njaf suu vi levina fi liisi ki u tlegeyesi halaŋ suu David lasi kana, muli suu li ɓivunna njaa ki u tokolomma may.

²⁷ Ezekiyas ɦasi voɗta ana li ɓivun ma ŋgalam ki ŋgalina kay givin ma togolla. Hu li ma gijaŋ a li ɓivunna ni gi soolla ŋga Yawera may. Bu tokolomma u tlesuu bu suu zeɗ zeɗ suu vi Davidna hu may, nam mul ma Israelna.

²⁸ Suu tokkina halaŋ goɓ kaŋgaa. Suu soolla tuɗ fok u soolla gak may. Suu bu tokolomma buum may ta ta hu li ma ɓivun ma ŋgalam ki ŋgalina daɓ ki tuwa.

²⁹ Hu li ma asi daɓ ɓivunna kina may ni mulna u suu egemma halaŋ goɓ vogosi kaŋga a goɓ Lonara.

³⁰ Ŋgoo dagan mulna Ezekiyas u muli suu ŋgolo suu umma halaŋ di njaf suu vi Levina ana, asi ŋga Yawe u boy ma vi Davidna u ma vi Azafna, sa ma wi fokomma. Asi halaŋ ŋga Lona u hurusi ma furira. Ŋgoo dagan asi girif kaŋga goɓ Yawe.

³¹ Ezekiyas hin dasi ana, «Cem wanda huu duk kogi ki ni oya, ɦuɗugi tagi ay lagi ɓivunna, ɓivun ma ŋga Zira vi Yawera.» Suu tokkina mbaa ɓivunna u ɦalla ŋga Lonara suu may suu hurusi ki mali kay dla ndaɗta cocona, mbaa ɓivun ma ŋgalam ki ŋgalina lay.

³² Ndum tlesuu asi mbaarasi ay a li ɓivun ma ŋgalam ki ŋgalina ndi ni, mbutlugina dok-kiɗisiya, gamlagina kis, gor timigiina kis kis mba'. Halaŋ lasi ki a ɓivun ma ŋgalam ki ŋgalina maŋ Yawe.

³³ Ɓivun ma daŋ ma zeɗ zeɗna ni yoori suu ŋgolona kis kis karkiya, yoori suu gorina ni buɓ buɓ hindi.

³⁴ Na may hu li ma muli suu li ɓuvnna ka bolow a zi tle asinaɗi ni, gorsesi suu hu njaf Levina njun usi a zi tlena kira ta ta daɓ sunda kiyo ta ta hu li ma muli suu li ɓivunna li tasi ki teteɗna.

³⁵ Olo ni ɓivun ma ŋgalam ki ŋgali ma daŋŋa ka hu bolow olo u mbul ma huu yoorina ma yowom kina kay a li ɓivun ma ŋgalam ki a mbaa heɓpana u njaf wana mba ŋgalam kina. Sunda hu Ziŋ Yawera tli kolo balamaɗ ni ko ndal wandara na.

³⁶ Ezekiyas u suu Israelna halaŋ furi coco kay Lona njunusi a li dla ndaɗta kira kay sunda li wanni yaɗ vi kaɗi.