2 DLAŊ MULINARA 28 - Boy Lonana

Gijaŋ mulla vi Akazza

¹ Akaz kak a mulna na ni basaɗam tew ki ni dok-mba'. Nam ti mulla hu Yerusalemmi basara doogo yam karkiya. Nam li ka ko ndal bum ŋgolo David li ɗegee ii Yawera naɗi.

² Nam li dlara ni ko muli suu Israelna lira na. Nam li tokolla maŋ Baal lay.

³ Nam u tamba ŋgal mbitla his jivira ay ki hu ɦuɗugumba Ben-Himmomba lay. Nam ŋgal goryom ki u kura ko ndal njaf suu co suu Yawe dikisi ki hu mbassa fok suu Israelnara na.

⁴ Nam li ɓivunna u ŋgal mbitla his jivira kolo kay li mbuyna, ha kolo kay mbura, ga u ŋgusugi suu ŋgolona lay.

⁵ Yawe, Loomma, hinim ki hu duk ko mul ma Sirina. Suu Sirina casiya, yow suu daŋŋa bolow coco daŋgayna may, tuɗusi ha ki hu Damas. Nam hinim ki ko mul ma Israelna, nam lasam ɓalak tlena cocoo.

⁶ Hu buu ma dewna ni Peka, ma goŋ Remaliyana, ci suu duuna suu garaŋŋa na 120,000. Ni kay ana nam noy Yawe, Lo ma vi somoyomma, kiyo.

⁷ Zikri ma hu deera vi Efrayimba bigawla ma duuna ci Maaseya ni goŋ mulnana, Azrikam sa ŋgol ma fun ziŋ mulnana, u Elkana nammi sa ma eg mulna tok hu sundana.

⁸ Suu Israelna yow gorsesina ha balna ni na 200,000. Njufiina, boyogina u gorɓiina. Asi ɦurum tlena ŋgol coco lay, tuɗusi ha ki hu Samari.

⁹ Sa ma jok vun Lona ma vi Yawena ka dew sem ana Obed, kal ay ki ŋgaf vok suu duuna suu hoŋ ay vo Samarina, dasi ana, «Yawe, Lo ma vi somoyogina, hurum ɓeŋ eg suu Yudana. Kay ndaɗta nam ɦagisina ki hu duk kogiya. Agi hin ci suu daŋŋa ki u huu ma cona cocoo ta ta dlasi tuɗ gak gak tew ha ki kolo huulona.

¹⁰ Cemi ni boyogina u njufii suu Yudana u suu Yerusalemma agi min a cukusi ki a mborɓii magisina lay, na ni dlaagira ka hin mbuɗ co fok Yawe Looginaɗi su?

¹¹ Humungi vunun haa, cukugi daŋgay suu Yudana kiyo, kay cecem wanda Yawe hurum ɓeŋ ki egegi agiya.»

¹² Muli suu ɦiw duk dee suu vi Efrayimma hurusi ɓeŋ ki eg suu ay duunana, suu asina ni Azariya, ma goŋ Yohanana, Berekiya ma goŋ Mesilemotna, Yehizkiya ma goŋ Salumma u Amassa ma goŋ Hadayna.

¹³ Asi dasi ana, «Mbaaragi suu daŋgay asina ay taniɗi. Agi mbaarami cora ŋgolla kami fok Yawe wa. Agi min a zulumi u coomira ha kami na ɗow ɗow. Ndaɗ ki kami jewni nek da. Yawe ki day day ni u yara eg suu Israelnaɗi su?»

¹⁴ Fok suuna na gaw ni, asgaa suu duuna cuk suu yowosi ay daŋgaynana ni na gaw. Hin tlesuu asi ɦurumusi ayna ki lay.

¹⁵ Suu may suu yowosi ki kay a gol suu daŋgaynana ɦasi tina, hin gol duk tlesuu asi ɦurumusi ayna, yow barawina cukusi ta suu va ka egesiɗina may, cukusi gi tuburuna sesi may. Suu asina halaŋ asi ɦasi tina u cina may. Suu dagina asi njunusi mbilisi may, yow suu ki saɓaki cona kay korra hoŋosi vo eg gorsesina halaŋ hu Yeriko, hu ɦoŋzi ŋgol ma manawra. Ŋgoo dagan asi hin hoŋ ay vo Samari may.

Akaz joɓ ana suu Asirina njunumu

¹⁶ Hu coki ndaɗta mulna Akaz joɓ mul ma Asirina ana nam njunumu.

¹⁷ Kay suu Edomma hoŋ ay a ndug suu Yudana olo. Asi yow suuna daŋgayna cocoo.

¹⁸ Ay keŋesi olo ni suu Filistinna mba ndug ɦoŋzi ma hu mbassaa gara gaw may. Ni hu mbassa Yudara. Asi tli zi ma Bet Semesna kiyo, Ayalon u Gederot u Soko Timna Gimzo u ɦoŋzi ma ŋguy egem tok tokŋa. Asi cuk ki hu ɦoŋzi namma ni na gaw.

¹⁹ Yawe maŋ mulla Yudara ki ni kay cora vi Akaz, mul maɗna. Nam zuɗ suu Yudana halaŋ a cuk hu cora a noy Yawe masina kiyo. Asi ka irim ɗegee oloɗi.

²⁰ Tiglat-Falasar hin dlara mba njun Akazza tani mba ndugumi yara na ɗow, mbuɗum yoo cocoo.

²¹ Akaz yow nus begera hu Ziŋ Lonara ura hu ziŋ mulnara ɦaɗ ha ki maŋ mul ma Asirina, may ni nam fi va ka hu na ndeɗi.

²² Duk dlara yoora cocora na lay ni Akaz ka hin cora laɗ eg Yaweraɗi.

²³ Nam li ɓivunna maŋ loogi suu Damasna. Asi ni suu mbaaram dlara kam saɓakina ɗow. Nam ɓak tam ana, «Muli suu Sirina loogi masisina ka njunusiya. An min a lasi ɓivunna kay asi njunun may.» Doli asina ni loogi suu a baam iiri mamba u suu mamsina ki halaŋŋa.

²⁴ Akaz yow tlesuu ay hu Ziŋ Lonarana toosi ki halaŋ halaŋ duk vun Ziŋ Yawera kolo ni na gaw may. Hin min givin ma togolla zeɗ zeɗ ki ni hu garak voɗta Yerusalemba.

²⁵ Hu ɦoŋzi ma ŋgolna hu mul mambana halaŋ nam min li ma li ɓivunna maŋ loogi suu daŋŋana ha ki huwa a ŋgalasi mbul ma his jivina. Ɓeŋ huu Yawe, Lo ma vi somoyosina, ki u boy namma.

²⁶ U dlara vi Akaz ay hu gijaŋŋa day ta ta daɓ maɗta ka ɓiiri hu magaara vi muli suu Yudana u suu Israelna. Asi ka ɓakam dlaamba ki hu halaŋ halaŋ.

²⁷ Hu li ma nam miɗna, asi pammi hu Yerusalem may ka hu zulla pi mulinaraɗi. Goromma Ezekiyas varak balamam a mulna ni namu.