2 DLAŊ MULINARA 27 - Boy Lonana

Mulla Yotam taɗta

¹ Yotam kak mulna na ni basaɗam ki ni dok-mba' yam vadl. Nam ti mulla hu Yerusalemmi basara doogo yam karkiya. Sem sum ana Yerusa. Ndaɗ ni goŋ Sadokka.

² Nam li dlara jivira ii Yawe ni ko ndal bum Oziyas lira na may. May ni nam kal ka hu Ziŋ Lonara koɗi. Suuna hu coki ndaɗta may ni ki ɓalakiya.

³ Nammi sa ma min vun ma ŋgolna ma kal hu Ziŋ Lonara kina. Nam min tlena coco hu gulumun ma gi kay ɦoŋzi goo ma Ofelna.

⁴ Nam min ɦoŋzi ŋgolona kolo kay ɦinira Yudara, min li ma saɓkŋa u zira fiyekka hu mbas mayra gura hu ɦayra may.

⁵ Nammi sa ma duu u mul ma vi goryoŋ Amonnana. Nam hin su kasiya. Hu basa ndaɗta ni asi ɦam doonora nekeɗ ii kelew buɓ buɓ hindi, ɦam wa blena kelewna 30,000, ɦam wa tlawna kelewna 30,000 may. Basara jak ha fok mbara ni asi ɦam taara ay vok tle asina na tew tew.

⁶ Yotam saɓakam ɦuɗ ha ni fok na ɗow ɗow kay nam tuɗ ɗegee ii Yawe Loommara.

⁷ Dlara Yotam laɗta halaŋ ka ɓiiri ga hu magaara vi muli suu Israelna u suu Yudana. Asi ɓak kay dla duu mamma u sunda nam laɗta.

⁸ Yotam kak ay a mulna ni basaɗam tew ki ni dok-mba' yam vadl. Nam ti mulla hu Yerusalemmi basara doogo yam karkiya may.

⁹ Hu li ma nam miɗna, asi pammi hu Ҥoŋzi Davidna. Goromma Akaz varak a mulna balamammi namu.