2 DLAŊ MULINARA 26 - Boy Lonana

Mulla Oziyas taɗta

¹ Suu Yudana halaŋ tok vunusi tli Oziyas a mulna balam bum Amasiyas. Ni nam basaɗam tew ni doogo yam karkiya.

² Nammi sa ma min ɦoŋzi ma Elatna, mbuɗum ki hu mbassa Yudara. Ni dagan mulna Amasiyas hu li ma nam miɗ kina.

³ Oziyas kak a mulna ni basaɗam doogo yam karkiya. Nam ti mulla hu Yerusalemmi basara dok-vadl yam mba'. Sem sum ana Yekoliya. Ndaɗ ni goora Yerusalemba.

⁴ Oziyas li dlara jivi ii Yawera ni ko ndal bum Amasiyas lira na olo.

Oziyas li ɗegee, hin mbuɗ bay ɗegeera ii Lona may

⁵ Hu li ma Zakari ka iiri tuna ni nam hal Lona cocoo. Nam ka haɗam kay ɗegeera laɗ u Lonara. Hu li ma nam ka kaki ɗegee u Lonana ni Yawe ɦam tlena cocoo.

⁶ Oziyas tuɗ duu u suu Filistina. Nam to gulumun ma Gatna kiyo, ma Yabnena u ma Asdodna lay. Nam hin min ɦoŋzi ŋgolo ma daŋ ma ŋguy kay Asdodna ki saɓak may ni hu mbassa vi suu Filistinna.

⁷ Lona ka njunum hu duu ma nam ka lam u suu Filistinna u suu Arab suu ka cuki hu Gur-Baalna u suu Meonna lay.

⁸ Suu Amonna lay warakam taara duuna ay ni mamu. Oziyas mbuɗ saɓak cocoo. Sem tii ha ki ta ta tew ay ki ii hakara u suu Egiptena.

⁹ Nam min zi ma saɓakŋa vo hu Yerusalem, kolo kay vun grek ma duk gayrana, tuɗ ki hu vun grek ma i ki hu ɦuɗugumbana. Ni hu li ma gulumunna tli ha huna na.

¹⁰ Nam min zira fiyekka, duɓ u lina lay ni hu mbas mayra hu fulla ŋgoo bagira nara. Nam vek zulla vo mbona maŋ yoorina cocoo kay yoori mamsina ka hu mbassa gara cocoo. Suu horokom senena u suu lam sun gugutluna kom coco lay. Asi ka kolo kay mbura u sene gugutluna kay asi minni sun baraɗna.

¹¹ Oziyas ka u suu duu suu ndaki a li duunana cocoo, ndak a tuɗ ndug suuna lay. Irisi ki ɓorowi na zeɗ zeɗ ni u haɗta haɗasi ayra may. Sa ma haɗasina ni sa ma ɓii dlara kaŋgana yam ana Yeyel u sa ŋgol ma sunda Maaseya. Asi halaŋ sa ma ŋgol masira ni Hananiya ni sa ŋgol ma dew duk suu ŋgolo suu vi mulnana.

¹² Ndum muli suu hu deera u suu duu masisina li halaŋŋi 2,600.

¹³ U gaɗ masira asi vaa suu duu suu saɓak coco. Suu wi duuna na 307,500 a njun kay mulna ko suu babali mamsinara.

¹⁴ Hu li ma asi a tuɗ duuna ni Oziyas ka ɦasi tlena kosiya gi mbarina, jum kawina, koroŋŋa, mbuurura u gogoyra gik gewrek gewrekka.

¹⁵ Suu yalna minim masin ma mun mburuura u gik ɦini mayra ŋgolora vo hu Yerusalem. Nam tinim ay kolo hu zira juɓ u lina, tin ay kolo kay gulumunna may. Sem tii ha ki kay yam mbassa dayra cocoo kay nam fi njunda mbuɗ mbuɗta cocoo ta ta nam mbuɗ saɓak cocoo.

¹⁶ U sem ma tii ki coco namma, nam mbuɗ ŋga tam cocoo ta ta ba tam kiyo. Nam mbuɗ ka ɗegee ii Yawe, Loomma, oloɗi. Nam kal hu Ziŋ Lonara a ŋgal mbitla his jivira kay tamu.

¹⁷ Mul ŋgol ma li ɓivunna Azariya tuɗ ha um kalafi u muli suu li ɓivunna suu ɦizi cocona kay cerem na dok-kalavandi cuk ha um kalafiya.

¹⁸ Asi ɓak co eg mulna dam ana, «Aŋ Oziyas ka ŋgal mbitla his jivira maŋ Yawe ni ka aŋgi. Muli suu li ɓivunna goryoŋ Aaronna ŋgalaɗ ni asiya. Asi ni suu hinisi ki kay sun ndaɗtana kal ha ki hu Ziŋ Lonara kay aŋ ka ɗegee ii Lonaɗi kay sunda vi Yawe Lonara ni ka va ma aŋ ŋga taŋ u nambi.»

¹⁹ Oziyas hurum ɓeŋ ki cocoo, hu li ma hurum ɓeŋi u ganun ma ŋgal mbitla kom fok muli suu li ɓivunna hu Ziŋ Lonara na tok eg givin ma togolla ma ŋgal mbitla na ni.

²⁰ Mul ŋgol ma li ɓivunna Azariya u muli suu li ɓivun suu daŋŋa golom ha na ni tuguɗi busuna cuk ay ki vogommi na gaw. Asi dikim ay ki kiɗik ni na zaak gaw. Nam lay ni ɓaɗ tam zak zak a kal kira kay Yawe u tamba cammi namu.

Mul Oziyassa daɓmi na

²¹ Mulna Oziyas hin ki ni a sa ma tumina ta ta miɗ mamma kay nam ki a sa ma tumina ni nam kak ha ki ni vay dam dew hu zira daŋga kay nam kak ha ki ni na day eg Ziŋ Yawera. Goromma Yotam ma a ŋgolla vo hu ziŋ mulnana hin ti mulla kay suuna ni namu.

²² U dlara vi Oziyas col ha hu gijaŋŋa day ta ta hu daɓ maɗta ni ka ɓiiri ko sa ma jok vun Lona Ezayi ma goŋ Amosna.

²³ Oziyas buu kaŋga eg somoyom wa. Asi pammi hu zulla vi mulina kay asi di ana, «Nammi sa ma ndondonna.» Goromma Yotam varak balamam a mulna ni namu.