2 DLAŊ MULINARA 25 - Boy Lonana

Mulla Amasiyas taɗta

¹ Amasiyas kak a mulna na ni basaɗam ki ni dok-mba'. Nam ti mulla hu Yerusalemmi basara dok-mba' yam dleeŋe may. Sem sum ana Yoadan. Ndaɗ ni goora Yerusalemba.

² Nam li ni dlara jivi ii Yawera. Vam na may ni ka ki u hurum gasi halaŋgi.

³ Hu li ma um ŋgaa ki kaŋga hu mullana ni nam ci suu sun mam suu ci bum ma ay a mulnana kiyo.

⁴ Na may nam casi goryosi ka kiɗi ni ko ndal gaɗta vi Moiz di hu li ma Yawe dam ayna na may ana, «Somira ka miɗ kay dlara vi goryosiraɗi. Gorra ka miɗ kay dlara vi somoyosiraɗi may. Gegelay fi maɗna ni kay dla coomba nam laɗ u tambara.»

⁵ Amasiyas tok suu hu mbassa Yudara egem halaŋ, tin mulina ki u deera zeɗ zeɗ bel, mul ma suuna um buɓma, ma suuna um kisna kay mbassa Yudara ura vi Benjaminda halaŋ. Nam ndum suu basaɗasi col ha kay dok-mba' tuɗ ha fok nana ki halaŋ halaŋ. Fi suu may suu wi dla duuna na 300,000 ni suu ndaki a yow ɓakina u mbarina kosina.

⁶ Nam yow suu duu suu daŋŋa ay hu mulla vi suu Israelna na 100,000 suu wi duuna cocona, ɦala doonora ha kasi ii kelewna na buɓ buɓ hindi.

⁷ Na may sa ma jok vun Lona dew mba dam ana, «Sa ŋgolna hin asgaa suu Israelna a tuɗ uŋ fun duunaɗi, kay Yawe ka njun u mulla mbayawraɗi.

⁸ Li ni asi tuɗ uŋ wa ni aŋ tuɗ duu vaŋ ta ta may, Yawe hin mbuɗuŋ seŋ maŋira fok suu babali maŋsina. Kay Lona dew ni sa ma ɦal saɓakŋa a su kay suunana. Nam dew ni sa ma hiniŋ ki ko suu babali maŋsinana lay.»

⁹ Amasiyas hin di sa ma vi Lonna ana, «Gursu ma an cukum ha ki coco maŋ suu asgaarina suu Israelna wanna an hin lam ni nana mayge?» Sa ma vi Lonna hoŋom dira ana, «Yawe ka u tlesuu nam hin ɦaŋsina su gursu ma aŋ cukum ki wanna.»

¹⁰ Amasiyas hin dik suu duu suu col ay hu mbassa Efrayim asina ana asi hoŋ voo. Suu asina hurusi ɓeŋ ki eg suu hu mulla Yudara cocoo. Asi hoŋ vo ni u huu ma yara.

¹¹ Amasiyas so hurum tuɗ fok suu mam suu duuna u tamba hu ɦuɗugumba vuvuna. Nam ci suu duu suu Edomma ha na buɓ buɓ doogo.

¹² Suu Yudana yow suuna ay iiri balna na buɓ buɓ doogo, mbaarasi ki kolo kay yam ɦinira fiyekka, zuɗusi ay kaŋgaa. Asi kus ki cocoo, daɓasi ki cira u ndaɗta.

¹³ Asgaa suu Israel suu Amasiyas hinisi ka a tuɗ um a duunaɗina mba ndug ɦoŋzi ma Yuda ma cuki duk hoŋ Samari u Bet-Horonna, ci suuna na buɓ buɓ hindi, ɦurum tlena ŋgol cocoo.

Yoas, mul ma Israelna, ci Amasiyas kiyo

¹⁴ Hu li ma Amasiyas hoŋ ay vo fun duuna su ay kay suu Edomma nara ni, nam yow loogi suu Edomma ay kom gaw, mbuɗusi a loogi mamsina, goɓ kaŋga fokosiya, ŋgalasi mbul ma his jivina lay.

¹⁵ Huu Yawe ɓalak ki eg Amasiyas. Nam sunum sa ma jok vun Lona ay egem dam ana, «Aŋ ŋga lo ma vi suu may suu nam ndak ka a suɗuŋsina ki hu duk koŋgina ni nanage?»

¹⁶ Hu li ma nam ka dam nana ni Amasiyas hoŋom dira ana, «An tlaŋ ana aŋ li a sa ma ne suuna tani hu mul manda su? Aŋ li ka min lassaɗi ni seŋ vunuŋ ha ni na gaw.» Sa ma jok vun Lona seŋ tam, kak ki na jok ni hin di hu olo ana, «An wi ki ana Lona min a caŋ ki ni ciya, kay aŋ li ko ndaɗta na, min ka a van boy mannaɗi.»

¹⁷ Amasiyas, mul ma Yudana, fi saara daŋga, sun suuna eg Joas, mul ma Israelna, goŋ Joakasna, goŋ ŋgolo Jehuna, dam ana, «Mbay ŋgafanu, duuruy taya.»

¹⁸ Joas hoŋ dira ay maŋ Amasiyas ana, «Gu ma siina dew ay kolo kay ɦinira Libanda joɓ gu sedrena ana ɦan goroŋga an ɗumuɗ maŋ goronna. Na may vabak maa dew mba tay gu ma sii namma ki kaŋgaa.»

¹⁹ Joas hin di hu olo ana, «Aŋ ŋga taŋ ana aŋ su ay kay suu Edomma. Aŋ furi cocoo. Aŋ li ni ŋga tara ɦawaa. Mariyaɗ ni kak ha maŋ vo ɗow. Aŋ min a li duu ma hin daɓ ki u aŋ cona ni kay mege? Hu li ma an hin caŋ ki wa u suu duu suu Yudana halaŋŋi aŋ hin li ni nanage?»

²⁰ Amasiyas ka caa yam kay nera neembaɗi. Lona min a ba ki ni Amasiyas u suu duu mamsina kay nam mbuɗ hurum ki u loogi suu Edomma.

²¹ Joas, mul ma Israelna, col ay a duuna. Suu duu mamsina u suu vi Amasiyasna ŋgaf tasi hu Bet-Semes hu mbassa Yudara.

²² Suu duu suu Israelna ci suu duu suu Yudana. Asgaa suu Yudana halaŋ njay kosi liŋŋa hoŋ voo.

²³ Joas, mul ma Israelna, ay hu Bet-Semes ni vi Amasiyas, mul ma Yudana, daŋgayna ni goŋ Joasna, goŋ ŋgolo ma vi Akaziyasna. Nam mbaaram ay vo hu Yerusalem. Nam to gulumun ma gi kay ɦoŋzi ma ŋgolnana ki gaa, fiyekem tew va ma meter kis kis mba' duk ɦoŋ vun grek ma Efrayimma u vun ma duk gayrana.

²⁴ Nam yow lorra, doonora u tlesuu jivi suu hu Ziŋ Lonarana bel bel. Sa ma ka juɓusi usina ni Obed-Edom u tlesuu ka hu ziŋ mulnara lay. Nam yow suu daŋŋa balna hoŋ vo Samari u asiya.

Mul Amasiyassa daɓmi na

²⁵ Hu li ma Joas, mul ma Israelna, miɗna ni, Amasiyas, mul ma Yudana basaɗ ha ŋgorom dagan hu doogo yam vadl.

²⁶ U dlara Amasiyas laɗta halaŋ col ha hu gijaŋŋa ta ta daɓpa ni ka ɓiiri hu magaara vi muli suu Yudana u suu Israelna.

²⁷ Hu li ma Amasiyas mbuɗ hurum u loogi suu ɦawana na gaw ni, suuna gijaŋ njaɗ dla cora kam hu Yerusalem. Buu dew ni nam pii ki hu Lakis. Asi cuɗum um gak gak tuɗ cam ha ki huwa.

²⁸ Asi hin mbaaram maɗam ay vo hu zi ŋgolna, taɗam ay u kulumina bolow cocoo. Asi pam eg somoyom hu ɦoŋzi ŋgol ma Yudana.