2 DLAŊ MULINARA 24 - Boy Lonana

Joas hoŋ min Ziŋ Lonara kiyo

¹ Joas kak a mulna ni basaɗammi kiɗisiya. Nam ti mulla hu Yerusalemmi basara dok-fiɗi. Sem sum ana Sibiya. Ndaɗ ni goora Bersebara.

² Joas li ni dlara ii Yawe jivira hu li ma mul ma li ɓivunna, Yoyoda, ka iiri tuna halaŋ.

³ Yoyoda ɗum boyogina u Joas ni mba'. Asi vuɗum gor njufiina u gorɓiina.

⁴ Ŋgoo dagan Joas fi saara a min Ziŋ Lonara kiyo.

⁵ Nam tok muli suu li ɓivunna u dee suu vi Levina dasi ana, «Tuɗugi ki hu ɦoŋzi ma Yudana halaŋ. Taaragi gursuna ay ko suu Israelna halaŋ kay a min Ziŋ Yawe Looginara hu basara tew tew. Tuɗ lagi dla ndaɗta zak zak gaw.» Na may dee suu vi Levina ka min a li dla ndaɗta zakgi.

⁶ Mulna hin yi mul ŋgol ma li ɓivunna, Yoyoda, ha egem dam ana, «Aŋ vi hum suu vi Levina ka kay a asi tuɗ taa gursura ay hu mbassa Yudara u Yerusalem ta Moiz sa ma sun Lona u suu Israelna tin taa ndaɗta a min mbutluɓmaranaɗi ni kay mege?

⁷ Kay cara dlaɗ cora, Ataliya, u goryoɗ hin Ziŋ Lonara ɓalak kiyo, tlesuu teteɗ suu vi Yawena asi yowosi tuɗ sun Baal ki u asiya.»

⁸ U gaɗta vi mulnara asi ceɗ zandukka, tiniɗ bunsu fun vun ma kal ha kalafi hu Ziŋ Lonara na tok.

⁹ Asi hin di ki hu Yerusalem u mbassa Yudara halaŋ ana, gegelay ni mbaa taa mamba kam ko ndal Moiz sa ma sun Lona tiniɗ ka kay suu Israelnara aya, ni hu li ma asi ay ki ŋgoo bagi hu fullana.

¹⁰ Muli suu fok suunana u suu Israelna halaŋ mba ɦal ni u furira hu zandukka ta ta oy zanduk ndaɗta kiyo.

¹¹ Hu li ma asi mbaa zandukka ay eg suu vi Levina a asi goloɗ kay sem mulnara ni fi gursura huruɗ ŋgol cocoo. Sa ma ɓii dlara vi mulna u sa ŋgol ma sunda vi mul ŋgol ma li ɓivunna mba yow gursu namma kiyo. Ŋgoo dagan asi hin hoŋom hu balamamu. Col ay li namma na ni, hu buuna tew tew asi li ni ko ndaɗta na. Asi tok gursuna ŋgol cocoo.

¹² Mulna u mul ŋgol ma li ɓivunna, Yoyoda, ɦal gursu namma maŋ sa ma ŋgol sunda a li sun Zira vi Yawera. Asi warak suu ceɗ ɦinira u suu ka li sunda a min Ziŋ Yawera kina u suu ka li sun kawina u kawi ma tlawnana kay a min Ziŋ Yawera kina.

¹³ Suu a li sundana gijaŋ sunda ni na gaw. Sunda tuɗ kosi feɗ cocoo. Asi hoŋ Ziŋ Yawera ki hu balamaɗ ma jewna, coloɗ ki saɓak cocoo.

¹⁴ Hu li ma asi daɓ sunda kina, asi hoŋ u gursu ma hinna ay fok mulna u mul ŋgolma li ɓivunna Yoyoda. Asi hin li tlesuu li sunda hu Ziŋ Yawera. Tlesuu sunda u suu li ɓivun ma ŋgalam ki ŋgalina hu Ziŋ Yawera ha ni na gak gak hu li ma Yoyoda ka iiri kay ndaŋgara tuna.

Joas mbuɗ ka ɗegee ii Lonaɗi

¹⁵ Yoyoda mbuɗ ki maari, basaɗ ŋgol cocoo, nam miɗa. Nam miɗ ni li basara kis duk dok-hindi kay ndaŋgara.

¹⁶ Asi pammi hu Ҥoŋzi Davidna eg mulina kay nam li dlara jivira coco duk suu Israelna eg Lona u ziimba lay.

¹⁷ Ŋgoo dagan hu li ma Yoyoda miɗ kina ni muli suu fok suu hu mbassa Yudara mba goɓ kaŋga fok mulna. Nam humusi vunusi may.

¹⁸ Asi noy Ziŋ Yawe, Lo ma vi somoyosina, kiyo. Asi gi jaŋ goɓ gu ceɗi ma vi Aserna, tokol fulina may. Yara vi Yawera ndiwa kay ɦoŋzi ma Yerusalemma u mbassa Yudara halaŋ kay dla cora li kosi ndaɗta.

¹⁹ Kay ndaɗta Lona sunusi suu jok vun Lona ay dukusi a asi hoŋ irisi ay eg Yawera. Na may asi ka caa yasi kay boy nammaɗi.

²⁰ Musuk Lonara mba kay Zekari, mul ma li ɓivunna, goŋ Yoyodana, mba di boyna kay suu Israelna ana, «Gola ni dlara Lona daɗta, ana agi a ŋgel gaɗta vi Yawera na ni kay mege? Agi hinni ka fi vaɗi kay agi noy Yawe kiyo. Nam may ni noyogi ki wa may.»

²¹ Asi vi vunusi ki kamu, gikim ki u gogoyra, cam ki ko mulna dasisra na ni fun biɗii Zira vi Yawera hu gaw.

²² Mulna Joas humum ka gam kay jivira bum Yoyoda lambara kekgi. Nam cam goromma kiyo. Hu li ma nam a miɗna ni nam di ana, «Ko Yawe wiya, nam hin joɓ u dla ndaɗta ni namu.»

Mulla vi Joassa daɓmi na

²³ Tew basara dewra may ni suu duu suu Sirina mba ndug Joas ni na gaw. Asi mba oy ki hu mbassa Yudara u ɦoŋzi ma Yerusalemma halaŋ, ci muli suu fok suunana ki bel bel. Sun tlegi suu asi ɦurumusina ha maŋ mul masina hu Damas.

²⁴ Suu duu asina ka ŋgolɗi lay. May Yawe ɦasi suu duu suu hu mbassa Yudara suu zuli cocona ki hu duk kosiya kay ana asi noyom ki wa, nammi Lo ma vi somoyosina. Ni ɓak may ma kaam kay Joasna.

²⁵ Suu duu suu Sirina hoŋ voo, hinim ka ni duk lassa ŋgolla. Suu ŋgolo suu fok suu duuna suu vi Joasna vi vunusi kamu a sa sukul goŋ mul ŋgol ma li ɓivunna Yoyoda ma nam cam kina, asi tuɗ cam ki ni kalafi kay lay mam ma buuna. Asi pammi hu Ҥoŋzi Davidna, may ka hu zulla pi mulinaraɗi.

²⁶ Suu vi vunusi kay Joasna ni gi Zabad ma goŋ goora Amonda, seɗ ana Sineat u Yozabad ma goŋ goora Moabba, seɗ ana Simrit may.

²⁷ Ndum goryom u sunda dlaɗ ŋgolo ta nam laɗta, minda nam min Ziŋ Yawera kira, ka ɓiiri hu magaara vi mulinara. Goromma Amasiyas varak a mulna balamamu.