2 DLAŊ MULINARA 23 - Boy Lonana

Joas kak ki a mulna

¹ Hu basara kiɗisiyara ni mul ma li ɓivunna Yoyada so um ki taɓ ko tam u suu ŋgolo suu asgaana usi kis kisna, Azariya ma goŋ Yeroam, Ismael ma goŋ Yohananna, Azariya ma goŋ Obedna, Maaseya ma goŋ Adayana u Elisafat ma goŋ Zikrina.

² Suu asina ŋguy ɦoŋzi ŋgolo ma hu mbassa Yudara ki halaŋ. Asi yi suu vi Levina u suu ŋgolo suu fok dee suu Israelna halaŋ hin mbay u asi vo hu Yerusalem.

³ Suu asina halaŋ tok kaŋga hu Ziŋ Lonara. Asi njaɗ dlara kay mulna Yoyada dasi ana, «Gologiya, ni Joas, goŋ mulnana, li ni nanagelay ni nam a kak a mulna ni namu, ko ndal dlara Yawe daɗ kay njaf suu vi Davidna na may.

⁴ Gola agi tuɗ lagi ko ndal wanda na, hu li ma muli suu li ɓivunna u njaf suu vi Levina cuk a li sunda wa hu buu ma vi Lonana ni suu ka irisi jewna lak a juɓ vun Ziŋ Lonara.

⁵ Suu ka irisi a mbarana lak a juɓ u ziŋ mulnana. Suu ka irisi a hindira lak hu vun grek ma gi U-Zina ay huna, suu belna mol kurufu hu kaana fun Ziŋ Lonara may.

⁶ Ka sa kal hu Ziŋ Lonaraɗi. Suu cuk huna ni muli suu li ɓivunna u dee suu vi Levina doy hol a li sun masira, kay asi ki ŋgaɓi ni kay sun ndaɗta. Suu ɦawana mba hum u gaɗta Yawe daɗ doo ki ana sa kalɗira may.

⁷ Dee suu vi Levi suu daŋŋa yow ɓagi masina kosi may. Asi ni suu ŋguy kay mulnana, lini nam a kal kiyo ni, asi tinimmi asiya. Sa ma tuk tam tuk a kal hu Ziŋ Lonarana ni cam ki ciiya.»

⁸ Suu vi Levina u suu hu Yudana halaŋ li ko ndal mul ŋgol ma li ɓivunna, Yoyoda, dasira na may. Gegelay ni yow suu mam suu a li sunda hu buu ma vi Lonna umu u suu may suu a hoŋ ay ki vona lay kay mul ma li ɓivunna, Yoyoda, hin sa ka ki dewɗi.

⁹ Suu ŋgolo suu suuna usi kis kisna nam ɦasi saɓagina u mbarina zeɗ zeɗ kosiya, mbari ma vi mulna David ma ay cuki kalafi hu Ziŋ Lonarana.

¹⁰ Nam njaa suuna ki halaŋ halaŋ gegelay ni u saɓ mamba komu. Col ha bik njuf keŋ Ziŋ Lonara ta ta tew ki bik gulu tok eg givin ma togolla u Ziŋ Lonara, ni kay a ŋguy ki kay mulnara.

¹¹ Asi kal goŋ mulnana ay ki kiɗiki. Asi tinim jumba mulla ki kamu, kakam ki a mulna ɓak ki kamu. Yoyoda u goryom fuurum ki u mbulna sawalla ha kolo di ana, «Gaŋ debe, mulna.»

¹² Hu li ma Ataliya hum dla ndaɗta suuna ko kosi may liŋ a tuɗ ŋgaf mulnara may ni, ndaɗ col tuɗ iriɗ ha hu Ziŋ Yawera may.

¹³ Ndaɗ gol iriɗ ha na ni wi mulna ka ki coli kolo kay vun zira. Mulina u suu bu tokolomma ka njaari egem na tok. Suuna halaŋ ka furiya. Asi bu tokolomma may. Suu bu tlena bu gi dadari masisina may, ka tuɗ fok suu geleɗ mulnana. Ataliya haa barawi maɗsina ki, oo uɗ kolo di ana, «Duuna. Duuna.»

¹⁴ Mul ma li ɓivunna, Yoyoda, cuk muli suu suuna usi kis kisna ay ki kiɗiki ni suu kay dla duunana dasi ana, «Tuɗugira ha ki kiɗik fun Ziŋ Lonara day. Sa ma tuɗ ha kay cereɗna agi cam ki u ŋgewna.» Mul ma li ɓivunna hin di ana, «Agi ka caɗ kalafi tani hu Ziŋ Yaweraɗi.»

¹⁵ Asi vi Ataliya ay kemmi. Ndaɗ mba tew fun ziŋ mulnana may, ni mba vun grek ma kulumina na ga ni asi caɗ ki hu li namma ni na gaw.

¹⁶ Yoyoda vi galamba ko tam u suuna u mulna may kay a asi li halaŋŋi suu vi Yawena dew.

¹⁷ Suuna halaŋ tuɗ hu ziŋ Baalla. Asi hawaɗaɗ kiyo, to givin ma togolla ki may u fulina halaŋ. Asi ci Mattan sa ma li ɓivunna maŋ Baalna fok givin ma togolla huni na gaw may.

¹⁸ Ŋgoo dagan Yoyoda hin sunda juɓ u Ziŋ Lonara ni ko njaf suu vi Levina suu li ɓivunna. David ɓorowosi irisi ka ki cuɓ cuɓmi namu kay a li ɓivunna hu Ziŋ Lonara ko gaɗta vi Moiz dira na. Nam ɓiirisi ka ki ana asi daɓ sun ndaɗta ni u soolla furira.

¹⁹ Yoyoda tin sa ma juɓ vun grekŋa hu Ziŋ Lonara ki may. Kay ana sa ma dlara njenjera egemma mba kal huɗi.

²⁰ Yoyoda hin tok suu ŋgolo suu fok suu duunana, suu kaɓakŋa u suu fok suunana u suu Israelna halaŋ. Asi vi mulna ay hu Ziŋ Lonara tuɗum ha ki hu ziŋ mulnana, cuk ha ki ni hu vun ma ŋgolna na hu li ma asi kak Joas kay dlamba mullana.

²¹ Suuna halaŋ ka furiya, ɦoŋzi ma ŋgolna hin kaki u heɓpa hu li ma asi ci Ataliya kina.