2 DLAŊ MULINARA 22 - Boy Lonana

Mul Akaziyara

¹ Suu Yerusalemma man Akaziya toɓo ma vi Joramma a mulna balam bumu, kay ana goryom suu ŋgolona halaŋ suu duu suu Arabma casi kiyo, ni suu may suu cuk ay hu kaŋŋa vi suu duu suu Yudana. Kay ndaɗta Akaziya mbuɗ a mul ma Yudana.

² Hu li ma Akaziya basaɗam tew ki dok-mba' yam mba' ni, nam kak a mul ma Yudana. Nam li basara hu mulla ni dew hu Yerusalem. Sem sum ana Ataliya. Ndaɗ ni goŋ Omrira.

³ Nam lay li ni ko suu vi Akabma lira na olo kay sum keŋem a cara dam gaɗta ni ndaɗu ndaɗ ni cara ka wi Lonaɗira lay.

⁴ Nam li dlara ka ii Yawe jiviɗira ko suu vi Akabma lira na. Kay suu asina egem a dam gaɗta ni asiya. Hu li ma bum miɗ kina, asi ganam yam a baam kira.

⁵ Nam humusi gaɗ masira tuɗ ko tam u Joram, mul ma Israelna, ma goŋ Akabma, a tuɗ duu u Hazael, mul ma Sirina, hu Ramot ta Galaadta. Suu Sirina dagam nam Joram ay fun duuna.

⁶ Nam hoŋ ay mba cil mbilim ki hu Jizreel, mbil ma nam fam ay fun duuna hu Ramot a duu tasi u Hazael, mul ma Sirinara. Akaziya ma goŋ Joramma, mul ma vi suu Yudana, tuɗ ga hu Jizreel a heel Joram ma goŋ Akabma kay tam lam cocoo.

⁷ Heella Akaziya tuɗ a heel Joramba Lona mbuɗuɗ ni a va ma baam kina gaw. Hu li ma nam tew hu may ni Akaziya u Joram tuɗ eg Jehu ma goŋ Nimsina ni na gaw. Doli ɗini Yawe man Jehu a mulna ana nam ci njaf suu vi Akabma kiyo.

⁸ Jehu li ni u ɓak ma Yawe kaam kay suu vi Akabma may. Nam ŋgaf u suu ŋgolo suu Yudana, gor ndusugi suu vi Akaziyana u suu ka li sunda vi mulnana halaŋ nam casi kiyo.

⁹ Nam hin tuɗ a hal Akaziya tuɗ vam ay ki ni hu Samari hu li ma nam ŋgay ha ki huna. Asi mbaaram ay fok Jehu hin cam kiyo. May asi hin pamu kay asi di ana nam ay ni hu njaf Josafat ni mul ma hal a hum gasi u gaɗta vi Yawerana, hu njaf Akaziya halaŋŋi sa ma ndak a kak a mul kaɗi.

Ataliya ɓaɗ ŋgolla kiyo

¹⁰ Hu li ma Ataliya ta su Akaziyara hum ana goroɗna miɗ ki wa ni, ndaɗ min taɗ a ci suu hu deera mulla hu mbassa Yudara ki bel bel.

¹¹ Hu li ma ndaɗ a casina ni Yoseba ta goŋ mulna Joramba caŋ mul ma li ɓivunna, Yoyada, kay ndaɗ ni wayaŋ Joassa. Ndaɗ tli Joas u cara zirimba tuɗ ŋgayasi kiyo. Ndaɗ ka min a Ataliya ci go namma ki oloɗi.

¹² Nam ay ki ŋgay hu Ziŋ Lonara gak gak basara karkiya. Ni Ataliya ti mulla ni ndaɗ gak may.