2 DLAŊ MULINARA 21 - Boy Lonana

¹ Hu li ma Josafat miɗna, asi pammi hu zulla vi somoyosira hu Ҥoŋzi Davidna. Goromma Joram varak balamam a mulna.

Mulla vi Joramba

² Joram, gorsemma bolow cocoo. Asi halaŋŋi goryoŋ Josafatna, Azariya, Yehiyel, Zakari, Azariyahu, Mikael u Sefatiya.

³ Busi Josafat ɦasi tlesuu dlasi ŋgolona ka cocoo, doonora, lorra u tlesuu ŋgolona zeɗ zeɗ, tinisi ka ki a ŋgolora hu ɦoŋzi ma saɓak hu mbassa Yudara zeɗ zeɗ may. May nam hin ŋgaɓ sa ma kak ka balamamma ni Joram kay nammi goo ŋgolna.

⁴ Joram kak kay mulla vi bumba mbuɗ ki saɓaki. Ŋgoo dagan nam ci gorsemma ki u ŋgewna halaŋ halaŋ, ci suu ŋgolna hu mulla Israella suu daŋ ki ɦiw hu lay.

⁵ Joram kak mulna na ni basaɗam ki ni dok-hindi yam mba'. Nam ti mulla hu Yerusalem basara kalavandi.

⁶ Nam li ni dlara vi muli suu Israelna, ko ndal suu vi Akabma lira na, kay caamba ni goŋ Akabba. Nam li ni dlara ka ii Yawe jiviɗira.

⁷ Na may Yawe ka min a gi njaf suu vi Davidna kiɗi ni kay galamba asi vaɗ duk tasi u Davidta kay nam di ki ana nam ɦam pindilla u goryom lay kay a ndaɗ li kiɗikka ha ni na gak gak.

⁸ Hu coki mamba ni Edom col kolo mbuɗ yara u mulla Yudara, tin tam ki kasi a mulna gaw.

⁹ Joram tuɗ u suu ŋgolo mam suu duuna u pus pus mam suu kulumina halaŋ. Nam col kolo duk njeŋgera ci suu Edomma kiyo. Nam dik suu Edom suu mba ndugumma kiyo.

¹⁰ Col ay hu li namma day ni suu Edomma hin ki ni kay tasiya. Sa heɓesi kaɗi. Suu hu ɦoŋzi ma Libnana li hu coki ndaɗta ni na lay, buɗ tasi ki hu mulla vi Joramba kay ana nam ka hum u Yawe, Lo ma vi somoyosina oloɗi.

¹¹ Joram min li ma li ɓivunna vi suu ɦawana kolo kay ɦinira Yudara lay. Nam zuɗ suu Yerusalemma u suu Yudana a mbuɗ tasi bay ɗegeera ii Lo ma gasina.

¹² Fali taa dew ni Joram fi magaara sa ma jok vun Lona Eli sunumba ayra di hu ana, «Gola ni dlara Yawe, Lo ma vi buŋ ŋgolo Davidna daɗta. Aŋ min ka a li ko ndal buŋ Josafat lira naɗi, ka ko buŋ ŋgolo Aza, mul ma Yudana lira naɗi lay.

¹³ Aŋ hin zaŋ tli ni dlara vi muli suu Israelna na ɗow. Aŋ zuɗ suu Yerusalemma u suu Yudana a pereɗ irisi u loogi suu ɦawana ko ndal suu vi Akabma lira na may. Aŋ tuɗ ta ta ci gorseŋŋa ki lay. Asi ni suu a li dlara jivira. Dlasi ŋgol suuŋŋa na ɗow.

¹⁴ Kay ndaɗta Yawe hin nda caŋ suu maŋsina ki u tuguɗiira cora, goryoŋu, boyogoŋu u tlesuu vo varaŋŋa halaŋ.

¹⁵ Aŋ taŋga lay ni baɗ tuguɗiira hin jokoŋ na zeɗ zeɗ, ta dewra hin laŋ ha hu buuna na tew tew ta ta hu li ma yorodoŋ hin cuk ki bunsu belna.»

¹⁶ Yawe zuɗ u suu Filistina u Arab suu ii hakara u namma u suu Etiyopina a asi mba duu u Joramba.

¹⁷ Asi tuɗ kolo ndug mbassa Yudara, cuk huwa yow begera hura ki halaŋ ta ay vo hu ziŋ mulnara, goryom u boyogom lay, gorom maa hin ka oloɗi, hinni ma goona Yoakas na hol.

¹⁸ Ŋgoo dagan Yawe kalam tuguɗii mayra ka garaɗɗira ki hurumu.

¹⁹ Buuna jak kiyo, tew hu basara mbara ni yorodom cuk ay ki kiɗik ko tuguɗii ndaɗta. Nam miɗ ni hu lassa ko tuguɗiira co ndaɗta. Na lay ni suu mamsina ŋgal kura ŋgolla ka kam ko asi li ay kay somoyosi suu jewnara naɗi.

²⁰ Joram kak a mulna ni basaɗam tew ki ni dok-hindi yam mba'. Nam ti mulla hu Yerusalemmi basara kalavandi may. Nam tuɗ ni sa yoo tam ka kambi. Asi pammi hu ɦoŋzi ma vi Davidna may ka hu zulla pi mulina huraɗi.