2 DLAŊ MULINARA 2 - Boy Lonana

¹ Salomon yow suu ziira na 70,000 yow suu wi yal ceɗ ɦinira ay kolo kay ɦinirana na 80,000, yow suu ŋgolo suu a gol sundana na 3,600.

² Salomon sun suuna vun sunda eg Hiram, mul ma Tirna, dam ana, «Aŋ ay ko taŋ u bun David jivira, ɦam gu sedrena a nam min ziimba.

³ Aŋ gola, an may ni min a min zira ŋgolla a yi sem Yawe Loonna hura, kay a lam sem ki teteɗ, a ŋgal mbitla his jivira fokomu, u fu ma cukum kay tabulla tew tewna, ŋgal ɓivun ma ŋgalam ki ŋgalina may, li ɓivun ma lam hu buuna tew tewna hu may, li ɓivun ma ŋgalam maɗii may, fiɗigi mayna hu may. Gol buu ma vi Lonna, buu ma wilina u buu ma luu ma vun tilna maŋ Yawe Loomina, hu na gak gak a fafaɗta kay suu Israelna.

⁴ Zira an a miniɗta hin li ni ŋgol cocoo, kay Loomina ni ŋgol su loogi suu daŋŋa halaŋ halaŋ.

⁵ Lini huulona ma zeɗ zeɗna ka ndak a kak Lonaɗi ni, sa ma hin ndak a minim zina kamma ni gege? Anni ge a minim zira kambage? Minni ɦawa ana hin ŋgal tlesuu li ɓivunnana fokom huwa.

⁶ Cemi wanda aŋ sunun sa ma wi yal sun lorra, doonora, kawi ma tlawna u ɓalaŋŋa aya. Ni sa ma wi yal gi cil barawna, corom tam ki tlawra u ma guyvun guyvunna, ma wi yal ɦosa ɦos vun tlena ki luy luyna may. Nam hin mba taɓ li sunda ko tam u suu mansina, suu may suu bun David varasi kana, suu ka cuki hu Yerusalem u suu ha ki cuki keŋ hu mbassa Yudarana halaŋ.

⁷ Aŋ ɦan gu sedrena ay u gu siprena may, gu ma jivi ma daŋŋa ay hu lay. An wi ana suu maŋsina ndaki a wi yal ka gu ma Libaŋŋa, suu sun mansina hin tuɗ ha a njunusira may.

⁸ Ko asi kaan guna ay ŋgol cocoo kay Ziŋ Lonara an min a miniɗ wanda, dlaɗ ŋgol cocoo, ndalaɗ ka vi saɗi lay.

⁹ Aŋ gola kay suu maŋ suu li sunda a ka guna wanna, an hin ɦasi fuɗ wa blena ii kelew 600,000, fuɗ wa ma tlawna ii kelewna 600,000 may, ɦasi sum veŋŋa litirna 800,000, ɦasi mbulna litirna 800,000 may.»

¹⁰ Hiram, mul ma Tirna, hoŋ ɓiira ay maŋ Salomon dam ana, «Ni kayra Yawe min suu mamsina cocora, nam kakaŋ kasi a mulna.»

¹¹ Hiram hin di hu olo ana, «Gi deɓ Yawe Lona vi suu Israelna, ma li huulona u ndaŋgarana, ma ɦal goo ma wi dlara ɦayna maŋ mulna Davidna, ma oy u wira u mbeleŋŋa u yal ma wi u dlara cocona, ma hin a min zira ŋgolla maŋ Yawena. Min zira ŋgolla mulla maŋ tamba may.

¹² Gola an sunuŋ sa ma wi yal yoo tlena ɦayna ha wanna, ni Huram-Abi.

¹³ Summi goora hu njaf ma vi Danna. Bummi sa ma Tirna may. Nam wi sun lorra, doonora, kawi ma tlawna u ɓalaŋŋa halaŋ, yal ceɗ ɦinira, guna baraw ma tam tlawna u ma guyvun guyvunna u baraw dlemba. Nam wi yal ma ndol ta tlena lay. Sunda aŋ ɦamba a lira li ni taaragelay ni nam laɗu. Nam hin li sunda ni ko tam u suu maŋ suu wi dlara, suu may suu buŋ David manasi kana.

¹⁴ Wa blena u wa ma tlawna ma sa ŋgol manna ɓak kamma, ko nam sunum aya, mbulna u sum veŋŋa lay, nam sunusi ay maŋ suu sun mamsina.

¹⁵ Ami may ni asi hin ka guguni suu hu Libaŋŋa ko ndal aŋ minda na may. Ami hin sunuŋŋa ha u lum kawina hu lum ŋgol ma Yoppena. Aŋ hin tuɗum kolo Yerusalemmi aŋ may.»

¹⁶ Salomon ndum ŋgayagi suu cuki dukusi hu mbassa vi suu Israelnara ki halaŋ ko ndal bum David ndumusi ay ki fok jewra na may. Asi fi halaŋŋi 153,600.

¹⁷ Dukusi ni nam yow suu taa 70,000 a zii guna ayra yow suu 80,000 a tuɗ ceɗ ɦinira ay kolo kay ɦinira may, yow suu 3,600 a suu ŋgolo suu gol u sunda may.