2 DLAŊ MULINARA 19 - Boy Lonana

Josafat tin suu kaɓakŋa hu mbassa Yudara

¹ Josafat, mul ma Yudana, hoŋ ki vo varam hu Yerusalem jiviya.

² Sa ma jok vun Lona, Yehu, ma goŋ Hananina, mba ŋgafam vogom dam ana, «Aŋ a njun u sa ma cona ni ana mege? Aŋ sana ndak a min sa ma ka min Yaweɗina su? Dlara aŋ laɗ ndaɗta, Yawe hurum ki ɓalaki egeŋu.

³ Doli ɗini dlara jivira ka huruŋu, kay aŋ ŋgal gu ma teteɗ ma asi pam maŋ Aserana ki hu mbas maŋga bel bel. Aŋ vi u huruŋ halaŋ a hum vun gaɗta vi Lonara.»

⁴ Josafat kak hu Yerusalem. Nam ɦal tam a poy mbassa ki halaŋ, col ha Berseba tuɗ hu mbassa ɦinira coco ta Efrayimba. Nam mbuɗ huu suu Israelna a asi hoŋ ay eg Yawe, Lo ma vi somoyosina.

⁵ Nam tin muli suu kaɓakŋa ki hu ɦoŋzi ma saɓak cocona bel bel hu mulla Yudara.

⁶ Nam dasi ana, «Lagi sun magira jivi u voɗoɗu. Agi kaɓakŋa ni ka u sem saɗi ni u sem Yawe tamba gaw. Nam hin li u agi hu li ma agi a gi ii ɓakŋana.

⁷ Humugi u Yawe ŋgol cocoo, gol dlara agi laɗta jiviya kay Yawe Looygina ka min bay ɗegeera u ɓak ma sek ii suunaɗi, ka min ɓak ma lam u gursunaɗi lay.»

⁸ Vo hu ɦoŋzi ma Yerusalemma lay ni Josafat man dee suu vi Levina u muli suu li ɓivunna kak suu gi ii dlara ki duk suuna hu deera zeɗ zeɗ bel a suuna ka ii ɓakŋa ni u sem Yawe dew. A asi cen kay suu hu ɦoŋzi ma Yerusalemma may.

⁹ Nam ɦasi gaɗta dasi ana, «Ni ko ndaɗta na agi lagi sunda ni u ndaa ma lam u Yawena, ni u ɗegeera u hurugi vii gasi dew may.

¹⁰ Hu li ma gorsegi suu ka cuki hu ɦoŋzina zeɗ zeɗna mbaaragi dlaasira ay fokogi wa ni, lini dlara ci maɗ ɗowba dlara kay ɓeŋ gaɗta vi Lonara u nera vi Lonara ɗowba dlara u gaɗ magira vo hu zinara kala ni, agi haɗasiya ka hinisi a ɓakŋa vasi fok Yaweɗi, a ɓak namma hoŋ kagi u gorsegina tokgi lay. Agi li wa li na ni ɓakŋa hin ka vagiɗi may.

¹¹ Gola mul ŋgol ma li ɓivunna, Amariya, ha ni fokogi a ŋgolla kay dlara vi Yawera halaŋŋi a mul ma kay ɦoŋzi ma Yudana. Zebadiya ma goŋ Ismaelna ni kay dlara a mbaraɗ ay maŋ mulnara halaŋ, suu Levina hin fokogi ni a suu ɓii dlara kaŋgana. Soogi ugi kiyo, lagi ko ndaɗta na ko Yawe li u sa ma ka li jivirana.»