2 DLAŊ MULINARA 18 - Boy Lonana

Josafat taɓ ki u Akab, mul ma Israelna

¹ Mulna Josafat begera kom cocoo. Sem tii ki coco ɦay lay. Nam mbuɗ somora u suu mamsina duk tasi u mulna Akab ɗum boyogina duk tasiya. Asi mbuɗ ni somora u mul ma Israelna.

² Basa ki dagan goy na cani, Josafat tuɗ vi Akab hu Samari. Akab a gam koyra u suu ha ummara ni nam ŋgaɗ timigiina u mbutlugina bolow cocoo. Ŋgoo dagan nam hin joɓ Josafat ana nam tuɗ u tasi nda duu u ɦoŋzi ma Ramot ta hu Galaadta.

³ Nam hin joɓom ana, «Aŋ min tuɗ u an a ay nda nduguy zi ma Ramot ta Galaadta su?» Josafat hoŋom dira ana, «Ay ki cemi ni dew, suu maŋsina ni suu mansina may, mansina ni maŋsina may. An ndak a tuɗ duuna u aŋu.»

Suu jok vun Lona suu kaboyna di ana asi hin ti aya

⁴ Josafat hin di ana, «Vam na lay ni joɓoygi Yawe tuwa.»

⁵ Mul ma Israelna tok suu mam suu jok vun Lona suu kis kis fiɗina, joɓosi ana, «Ami ndak a tuɗ duu u Ramot ta Galaadta, tlaɗ ki ɗowba ami kak su?» Asi hoŋom dira ana, «Agi ndak a tuɗa. Lona hin ɦaŋ ɦoŋzi namma kiyo.»

⁶ Josafat hin joɓ ana, «Na ni sa ma jok vun Lona ma daŋ ka tani a ay tuɗ joɓoy Yawe gawɗi su?»

⁷ Mulna hoŋom dira ana, «Haa, ma hiniŋŋa ka dew, may an ka minim boy mammaɗi kay nam dan tew tew ni dla cora, boy ma jivi ka kal ay ki funum na dewɗi. Ni Mise ma goŋ Imlana.» Josafat oo um kolo di ana, «Ɓak boy ma namma kay sa ma jok vun Lonana naɗi.»

⁸ Mul ma Israelna hin yi sa ŋgol ma li sunda vi mulna sunum dam ana tuɗ yi Mise ma goŋ Imlana ay na zak.

⁹ Mul ma Israelna u mul ma Yudana gegelay ni ay kaki hu dlam mamba mulla. Cuki tasi ni baraw masi ma furira. Asi laki ni eg vun grek ma kay ɦoŋzi ma Samarina na tok. Hu li namma ni suu jok vun Lona ka di boyna fokosi zeɗ zeɗ may.

¹⁰ Sa maa dew sem ana Sedekiya ni goŋ Kenaana, yoo mek kawina komu. Nam di ana, «Gola ni boy ma Yawe damma ana mek namma wanni tak ki ni saɓak ma aŋ hin a dik suu duu suu Sirina u namma.»

¹¹ Suu jok vun Lona suu daŋŋa halaŋ njaɗ ni ko nam na lay ana, «Sa ŋgolna, aŋ ndak a tuɗ ndug suu hu Ramot ta Galaadta. Aŋ hin ndak a tasiya. Yawe hin ɦaŋ ɦoŋzi namma kiyo.»

Sa ma jok vun Lona Mise di ana yara hin tagiya

¹² Sa ma sunum ha a yi Mise ayna hin dam ana, «Gola boy ma vi suu jok vun Lonana ha ni fun tam na dew dew ko boy maŋŋa hin li ni ko ndal masina na may, di ni dlara jivira.»

¹³ Mise hin di ana, «U sem Yawe va ma Loonna dannana an hin dammi nam may.»

¹⁴ Asi mba tew eg mulna. Nam dam ana, «Mise, ami ndak a tuɗ duu u Ramot ta Galaadta su? Ɗowba an kak bay tuɗ su?» Mise hoŋ dira ana, «Tuɗugiya, agi hin ti aya. Asi hin hin ki hu duk kogiya.»

¹⁵ Mulna hoŋom dira ana, «An hin ceneŋ yanni ga a aŋ hin dan gasira ki u sem Yawera nige?»

¹⁶ Mise hin di ki ɗal ɗal ana, «An wi suu Israelna njay ki kolo kay ɦinira ko yoori suu sa ma taarasi kaɗina na. Yawe di ana mul ka kasi oloɗi. Gegelay ni hoŋ vo hu ziim u heɓpa.»

¹⁷ Mul ma Israelna hin di Josafat ana, «Gola an daŋgi su, nam ka dan dlara jiviɗi, di ni dla cora sak sak.»

¹⁸ Mise hin di hu olo ana, «Aŋ hummi dlara Yawe daɗta na ɗow. An wi Yawe kaki kay dlam mamba mulla. Suu duu suu huulonna njaari kay bikim njuf may, bik gulu may.

¹⁹ Yawe di ana, sa ma ganyam Akab ana nam tuɗ duu u Ramot ta Galaadta, miɗ ki ɦawana, ni gege? Sa ma hiŋŋa njaɗ ki zeɗ, ma daŋŋa di ni zeɗ may.

²⁰ Ŋgussa ka huu suu jok vun Lonara, tuɗ di ki fok Yawe ana, An tuɗ dam saara jivira. Yawe joɓ tam ana, ni taarage?

²¹ Ndaɗ hin di ana, an tuɗ kal boy ma kaboyna ki fun suu jok vun Lona suu vi mulnana bel bel. Yawe hoŋ dira ana, ni na daŋ may, ni yal ma jivi ma ganam yamma tuɗ li dla ndaɗta.»

²² Mise hin di hu olo ana, «Cemi ni dla ndaɗta li wa na may, Yawe hin ŋgussa kaboyna oy huu suu maŋ suu jok vun Lona a gasira Yawe min a mbaaraŋ ay kaŋŋi yoora na ɗow.»

²³ Na gaw ni Sedekiya ma goŋ Kenaanna ɦuɗ tam ay eg Mise cam irim na piŋ gaw dam ana, «Musukka vi Yawera kal ay ki hurun a tuɗ daŋ boy namma ha ki a aŋ ɓakamba su?»

²⁴ Mise hoŋom dira ana, «Na daŋ may aŋ hin wi boy namma hu buu ma aŋ hin liŋ a ŋgay taŋ ha ki hu goo zira goora vo varaŋŋa tuwa.»

²⁵ Mul ma Israelna di suu mam suu sunda ana, «Vagi Mise, ɦam ha maŋ mul ŋgol ma kay ɦoŋzinana, Amon, u goŋ mulnana, Yoas.

²⁶ Agi dasi ana, an di ha ana gi sa namma daŋgayna, ɦammi fu ma cona u yo ma cona ta ta an hoŋ ay ki vo jivi hu duuna tuwa.»

²⁷ Mise hoŋom dira ana, «Lini aŋ hoŋ ay ki vo gasi jivi wa ni, Yawe di boy namma ha fununni ka nambi.» Nam hin di hu ana, «Agi suu Israelna halaŋ humugi kiyo.»

Asi ci mulna Akab ay ki fun duuna

²⁸ Mul ma Israelna u mul ma Yudana, Josafat, tuɗ kolo hu Ramot ta Galaadta.

²⁹ Mul ma Israelna di Josafat ana, «An min mbuɗ tan ki zeɗ ni kal duk yara. Aŋ may ni cuk baraw maŋ ma kay taŋŋa.» Mul ma Israelna mbuɗ tam ki zeɗ ni kal duk yara u tamba gaw.

³⁰ Doli mul ma Sirina di suu mamsina ki ana, «Agi ci sa ŋgolɗi lay, gogooɗi lay, vangi ni mul ma Israelna doy hol.»

³¹ Hu li ma suu ŋgolo suu jaŋ pus pus ma kulumina wi Josafat ay na ni, asi di ana, «Gola cowni, mul ma Israelna.» Asi mba ŋguf ki kam a vamba may ni, Josafat sawalla kolo ana Yawe njunumu, Lona hin hoŋosi irisi ha ki kamu.

³² Suu ŋgolo asina wi ana ni ka mul ma Israelnaɗi. Asi hinim hoŋŋi na gaw.

³³ Asgaa ma Siri maa dew mun mbuurura ha ɦawa na ni, ndaɗ tuɗ kal duk ɦoŋ koroŋ ma eg mul ma Israelna, vamu. Nam hin di saam ma jaŋam pus pus mammana ana, «Hoŋoy ki dagani, hin li ma vi suu yarana kiyo, kay an dagiya.»

³⁴ Yara hu buu namma ni saɓak cocoo. Mulna hin kaki hu pus pus mamma gak gak fiɗigiya, kaki vok zi ma Aramma na. Faɗta kal kaŋga may ni nam duk irim gaw may.