2 DLAŊ MULINARA 17 - Boy Lonana

Yosafat kak a mulna. Ɗegee mamba u Lonara

¹ Josafat ma goŋ Azana varak balamam a mulna. Nam col ki eŋ coco a duu tam u mulla vi suu Israelna.

² Nam cuk suu duuna ki hu ɦoŋzi ŋgolo ma saɓakŋa ma hu mbassa Yudara halaŋ halaŋ, hu ɦoŋzi ŋgolo ma Efrayim ma bum Aza yowom ka kina lay.

³ Yawe li u Josafat kay nam tuɗ ni hu voɗta jewra vi bum ŋgolo Davidta. Nam ka min a goɓ Baalɗi.

⁴ May nam hal ni Yawe, Lo ma vi bumma, nam tuɗ ni u gaɗ mamba. Nam ka li ko dlara suu Israelna laɗta naɗi.

⁵ Yawe soom um hu mulla cocoo. Suu hu mbassa Yudara halaŋ ɦal tlena ay maŋ Josafat cocoo. Kay ndaɗta nam fi begera cocoo. Sem tii ki coco lay.

⁶ Hurum haɗ ha fok a min Lonara ni haɗi na ɗow ɗow. Kay ndaɗta nam bulum li ma mbuy kolona u gu ma vi Aserna ki hu mbassa Yudara.

⁷ Hu basara hindira ta nam kaki a mulnara ni nam sun suu mam suu gaaraŋina gi Ben-Hail, Obadiya, Zakari, Nataneyel u Mikaya a haɗ suuna hu ɦoŋzi ŋgolo ma Yudana.

⁸ Suu deera vi Levira tuɗ ha usi hu may, ni gi Semaya, Netaniya, Zebadiya, Azahel, Semiramot, Yehonatan, Adoniya, Toviyahu u Tob-Adoniya halaŋ ca ni njaf suu vi Levina, dukusi ni muli suu li ɓivunna ka hu lay ni gi Elisama u Yoram.

⁹ Asi haɗ suu hu ɦoŋzi ma Yudana tli magaara gaɗta vi Yawera ha kosi hu gaw may. Asi ŋguy ki hu ɦoŋzi ŋgolo ma Yudana bel bel asi haɗ suu Israelna.

Saɓak ma vi Josafatna

¹⁰ Mbassa ŋguy kay Yudara halaŋ ndaa Yawe su ki kasi cocoo. Sa ma gi tam ay ki a duu u Josafat kaɗi.

¹¹ Ay vo vi suu Filistina lay ni, asi ɦal tlena ay maŋ Josafat, ɦam taara lay. Suu Arabma lay ni ɦam yoorina aya. Asi ɦam gamlagina ay na 7,700, ɦam ɦuginina ay 7,700 may.

¹² Saɓak ma vi Josafatna ɦuɗ ha ni fok na ɗow ɗow. Nam min zira eŋ coco ɦayra vo hu Yuda, min ɦoŋzi ŋgolo ma cuk tlesuu ɗokka may.

¹³ Nam ka u tlesuu tira coco hu ɦoŋzi ŋgolo ma Yudana u bigawla suu wi dla duuna cocona ka cuki hu Yerusalem may.

¹⁴ Gola ii suu duuna ɓorowi ni ko wandara na. Sa ŋgol ma fok suu duu suu buɓma ni Adena u suu duuna um na 300,000 ni suu saɓak cocona.

¹⁵ Keŋem olo ni Yohanam u suu mam suu duuna ummi 280,000 may.

¹⁶ Ay keŋesi ni Amasiya ma goŋ Zikirina, ma ɦal tam ki u min mamba maŋ Yawena ka u suu duuna ummi 200,000 may.

¹⁷ Hu deera vi Benjaminda ni Eliyada Bigawla ma wi duuna ɦayna ka fok suu duuna na 200,000 may, kawi ma kosina ni mbuurura u mbarina.

¹⁸ Keŋem olo ni Yozabad ka u suu duu suu tasi ki mini paŋŋa na 180,000.

¹⁹ Gola ca ni suu ka sun mulnana ni ndum suu mulna cukusi ki hu ɦoŋzi ma saɓakŋa zeɗ zeɗ hu mbassa Yudara ka huɗi.