2 DLAŊ MULINARA 16 - Boy Lonana

Aza duu u Basa, mul ma Israelna

¹ Hu basara dok-hindi yam karkiya ta Aza a mulnara ni, Basa, mul ma Israelna, mba buu maa dew ndug suu Yudana. Nam gijaŋŋa a min goo ɦoŋzi ma Ramana ki a doo Aza u suu Yudana ki ana asi poy hu oloɗira.

² Aza yow gursura u lorra hu Ziŋ Lonara ura hu ziŋ mulnara nde, sunuɗ hu Damas maŋ Ben-Hadad, mul ma Sirina, dam ha ana,

³ «Vay galamba aŋ u anu, ko ndal somoyoygi li ay jewra na. Aŋ gola an sunuŋ gursuna u lorra ha wanni ana aŋ bus galam maŋga u Basa, mul ma Israelnara, kiyo, kay nam a yow asgaa mamsina ha ki hu mbas manda.»

⁴ Ben-Hadad vi boy ma Aza dammana sun muli mam suu duu suu ŋgolo suu saɓak ɦayna, tuɗ ndug zi ma Israelna. Asi tli zi ma Yon, Dan u Abel-Maimma kiyo, u ɦoŋzi ma Neftalina halaŋ ni li ma asi ŋgay tlegeyesi suu ɗokka ki huna.

⁵ Hu li ma Basa hum boy namma na ni nam hin sunda ni na gaw, hin dlara so u goo zi ma Ramana gaw may.

⁶ Mulna Aza mbay u suu Yudana halaŋ yow gogoyra u mbal ma Basa tokom ay a min zi ma Ramana, tuɗusi ha ki a min ɦoŋzi ma Geba u Mispana gaw.

Aza gi sa ma jok vun Lona Hanani daŋgayna

⁷ Hu coki ndaɗta sa ma jok vun Lona Hanani mbay eg Aza, mul ma Yudana, dam ana, «Aŋ min ka a hal Yawe Looŋŋaɗi, aŋ ŋgaɓ a ɦal taŋ ki kay saɓak ma vi mul ma Sirina, dlara aŋ laɗ wanda aŋ mbuɗ a suu duu suu Sirina suɗ ki ko saɓak maŋŋa ni aŋgi su?

⁸ Suu Etiyopina u suu Libina suu asgaari masisina ay ka saɓak cocoɗi su? Pus pus masi suu kulumina bolow coco layɗi su? Yawe hin ɦaŋsina ki hu duk koŋu kay ana aŋ hin taŋ ki komu.

⁹ Yawe ka gol yam ndaŋgara ki ni halaŋ a njun u suu hin tasi komma suu minim u hurusi belna. Dlara wanda aŋ laɗ ni ko sa ma ka wi vaɗina na, hin fok wanda aŋ ha ni eg duuna na gak gak.»

¹⁰ Aza hurum ɓeŋ eg sa ma jok vun Lona cocoo. Nam vam gam daŋgayna. Boy mamma ɓalakam hurum ki cocoo. Hu coki ndaɗta gaw ni Aza gijaŋ las suu vo hu mbas mambana.

Mul Azara daɓmi na

¹¹ Dlara vi Azara col ay hu gijaŋŋa ta ta daɓ maɗta ni ka ɓiiri hu magaara vi muli suu Yuda u Israelna.

¹² Hu basaɗamba dok-hindi yam dleeŋe hu mullara ni Aza ndi tuguɗira cora kaŋga hu semu. Nam hin dlara hal njunda ko Yawera tani hin tuɗ hal ni suu doktorgina.

¹³ Hu li ma Aza miɗ hu basaɗamba dok-fiɗi yam dew hu mullara ni,

¹⁴ asi pammi hu zulla nam vegeɗta hu Ҥoŋzi Davidna. Asi gammi hu li ma asi tok mbul ma his jivina huruɗ irim zeɗ zeɗta. Suu yoo mbul ma his jivina yoo mbul namma ni asiya. Asi ŋgal ma daŋŋa ki ŋgol coco lay a tiirimba.