2 DLAŊ MULINARA 15 - Boy Lonana

Aza hal a jok cenda cen Lonara ki zeɗ

¹ Azariya ma goŋ Odedna oy u Musuk Lonara.

² Nam kal ki tuɗ fi Aza dam ana, «Mulna Aza, agi suu Yudana u njaf suu vi Benjaminna halaŋ, humungi vunun haa. Yawe ka u agi ni hu li ma agi ka u nam mayna. Lini agi halamu ni nam hin tak tam irigiya. Lini agi noyom ki wa ni, nam noyogi ki may.

³ Basara ŋgol coco suu Israelna ka wi Lo ma gasinaɗi, ka min a haɗambi lay, gaɗ kaɗi lay.

⁴ May hu yoo masi ndaɗta asi hoŋ ay eg Yawe, Lona vi suu Israelna wa. Asi halamu. Nam tak tam irisi wa.

⁵ Hu li namma ni heɓpa ka kay suu tuɗ koyra u suu mbay vonaɗi. Suuna hu mbassa halaŋ ki ndaana.

⁶ Asi duu tasi ni njaf suu hiniŋŋa duu u suu hiniŋŋa may. Ҥoŋzi ma ŋgolona duu tam may. Kay Lona gasi dlara yoora kasi ni u baɗaɗ zeɗ zeɗ cocoo.

⁷ Agi may ni lakagi saɓaki, hin kogi a ŋgotlokgi, kay agi hin fi warak ma kay sun magirana.»

⁸ Hu li ma mulna Aza hum boy ma sa ma jok vun Lona Azariya ma goŋ Odedna damma na ni, nam so tam hawaɗ li ma givin ma togolla maŋ loogi suu ɦawana hu mbassa Yudara kiyo, u suu hu mbassa vi Benjaminda lay u tlesuu fulina suu ka hu ɦoŋzi ma nam tlam ay ki zeɗ zeɗ ma ha kolo kay ɦinira Efrayimbana lay. Ŋgoo dagan nam hin min givin ma togolla maŋ Yawe huna kiyo.

⁹ Nam tok suu Yudana u suu Benjaminna ay halaŋ. Suu Israel suu hu deera vi Efrayim, Manase, u Simeonna tok ay ki um lay. Asi bolow cocoo. Hu li ma asi wi ki ana Yawe, Loomma, ka u namuna.

¹⁰ Asi tok tasi ni hu Yerusalem, ni hu til ma hindina hu basara doogo yam vadl ta Aza kak a mulnara.

¹¹ Asi li ɓivunna maŋ Yawe hu buu namma kay tlesuu asi ɦurumusi ay fun duunana, mbutlugina kis kis kiɗisiya, yoori suu gorina buɓ buɓ kiɗisiya may.

¹² Asi cuk hu galamba gasira wa a hal Yawe, Lo ma vi somoyosina, u hurusi halaŋ u saa masira halaŋ may.

¹³ Lini gegelay ma ka min a hal Yawe, Lona vi suu Israelnaɗina, cam ki ni ciiya. Col ha kay kemba ta ta suu ŋgolona ha kay njufiina ta ta boyogina.

¹⁴ Asi suu tasi ki fok Yawe u ko kona cocoo, u bu tokolomma u diffa lay.

¹⁵ Suu hu mbassa Yudara halaŋ furi coco kay suura asi suu tasi ndaɗta. Kay asi suu tasi ni vi ki gasi u hurusi halaŋ u minda jivira lay ana asi hal Yawe, nam tak tam masi may. Nam hinisi asi fi koɗ tara keŋ lina zeɗ zeɗ halaŋ.

¹⁶ Mulna Aza doo sum Maaka ki kay sun maɗta lay. Nam tiniɗ semma ki gin kaɗ ana cara ŋgolla kay ndaɗ fi saara cora a li looɗna ki kay taɗu, ni kay Asera. Nam ɦal voɗta ana hawaɗ fuli asina kiyo, to gu ma ceɗi namma kiyo, ŋgalam ha ki fun mbo lum ma Sedronna.

¹⁷ Na may li ma mbuy kolona ka bulum ki hu mbassa vi suu Israelnara belɗi. Na may huu Aza ka tini kay Lona gak gak hu iiri mamba kay ndaŋgara.

¹⁸ Nam yow tlena ay ki hu Ziŋ Lonara, gursuna, lorra u tlesuu sunda su bum u nam tamba yoorosina.

¹⁹ Ta ta tuɗ tew basara dok-hindi yam vadl hu li ma Aza a mulna ni duu li ka oloɗi.