2 DLAŊ MULINARA 14 - Boy Lonana

Tira Aza ti mullara

¹ Aza li dlara ɗegee jivira ii Yawe, Loomma.

² Nam bulum li ma ŋgal ɓivun ma col ay vi suu daŋŋana ki halaŋ halaŋ u li ma mbuy kolo dayna lay. Nam to fulina ki may, ka gu ma vi Aserna ki may.

³ Nam di suu Yudana ana asi hal ni Yawe Lo ma vi somoyosina, li ni u gaɗta vi Lonara.

⁴ Li ma kolo mbuy ma hu mbassa Yudara halaŋ nam bulumusi kiyo, u givin ma togolla ma ŋgal mbul ma his jivina halaŋ. Hu cokira nam a mulnara ni mbassa halaŋ kaki ni u heɓpa.

⁵ Sa ma mbay a li duuna u nam kaɗi kay Yawe u tamba ɦam heɓ ndaɗta ni namu. Hu li namma ni nam min ɦoŋzi ma saɓakŋa zeɗ zeɗ cocoo kay heɓpa kaa.

⁶ Nam di suu Yudana ana, «Miniygi ɦoŋzina, gaygi gulumunna ki kamu. Miniygi zira fiyekka vun grekŋa duk vun grekŋa ki u cokorom kawina. Mbassa cemi ka koɗ taɗu kay aygi hal Yawe Looygina. Aygi halamu, nam ɦaygi koɗ tara hu lina wa halaŋ.» Asi min zina ki halaŋ ko asi minda na may.

⁷ Aza suu mam suu duuna ni, suu Yuda suu duu u mbari ma ŋgolona na 300,000 ni suu duu u saɓiina. Duk dee suu vi Benjaminna suu duu u mbari ma gorina ni 280,000. Asi ni suu wi yal duu ma mbuurura. Asi halaŋŋi bigawla suu wi dla duuna.

⁸ Zera ma Etiyopina mba a duu u asiya. Suu duu mamsina miliyoŋ dew. Pus pus ma kulumina ni kis kis hindi. Asi mba tew ki ta ta hu Maresa.

⁹ Aza kal ha ki fokosiya. Asi tuɗ vi duuna ni hu ɦuɗugumba Sefata tok eg Mares tana.

¹⁰ Aza yi kolo eg Yawe, Loomma, di ana, «Yawe sa ma ko ndal aŋ na a kal ki duk ɦoŋ sa ma saɓakŋa u ma maŋina kaɗi. Njunumiya, Yawe, Loomina, kay ami deŋ tami ni egeŋu. Ami mba a duu suu bolow coco asina ni u seŋu. Yawe, aŋŋi Loomina. Sana ka ndak a panaŋgi.»

¹¹ Yawe dik suu Etiyopina ki fok Aza u suu duu suu Yudana. Asi pii liŋŋa fokosiya.

¹² Aza u suu mam suu umma dikisi ta ta tinisi ha ki hu Gerar. Asi cuk kaŋga fokosi cocoo, ta ta daɓpa ni sa suɗ ka ki na dewɗi kay suu duu masisina duu ni u Yawe u suu mamsina. Suu Yudana yowosi tlegeyesi ay cocoo.

¹³ Asi dik ɦoŋzi ma ŋguy kay Gerarna ki halaŋ halaŋ kay suu hu ɦoŋzi nammana ki ndaa coco ko Yawe. Asi to ɦoŋzi namma ki yow tlena cocoo.

¹⁴ Asi tuɗ ndug suu juɓ u yoorina, ɓaɗ timigiina ugi jamballa cocoo. Ŋgoo dagan asi hin hoŋ ay vo Yerusalem.