2 DLAŊ MULINARA 13 - Boy Lonana

Tira Abiya ti mullara

¹ Hu basara doogo yam kalavandi hu li ma Jeroboam kaki a mulnara ni Abiya mbuɗ a mulna kay mbassa Yudara may.

² Nam ti mulla hu Yerusalemmi basara hindi. Sem sum ana Mikaya. Ndaɗ ni goŋ Uriyel ma Gibeana. Abiya li duuna duk tasi u Jeroboam.

³ Abiya gijaŋ duuna ni u suu sesi tii ɦay suu wi dla duuna cocona. Suu mam suu duuna halaŋŋi 400,000. Jeroboam suu mam suu a duu u namma ni 800,000 may.

⁴ Abiya col ki kolo kay ɦinira Semarayimba ta ka duk ɦini mayra Efrayimba di ana, «Jeroboam aŋ u suu Israelna halaŋ agi humungi vunun haa.

⁵ Agi ka wi ana Yawe, Lona vi suu Israelna, ɦal mulla ka ni maŋ David ni kay suu Israelna halaŋ naɗi su? Ni maŋ David u goryomu, ni galamba ka sa a ɓalakaɗ kiɗira naɗi su?

⁶ Na may Jeroboam ma goŋ Nebat sa sunda vi Salomon ma goŋ Davidna hin col kolo a duu u nam sa ŋgol mamma.

⁷ Suu ka wi dlaɗina, goryoŋ suu ɦulla tok tasi ay umu. Asi min a ɦeɓ Roboam ma goŋ Salomonna. Roboam ay ni goozoŋŋa ɦawaa, ka saɓakgi lay, col ay ka fokosi eŋgi.

⁸ Cem wanda agi min a ŋga tagi u mulla vi Yawera ta ka cemi ko goryoŋ Davidna wandara. Agi vagi bolow cocoo, na may agi ka u goo mbutl lorra Jeroboam yoorogira a looginara dukugiya.

⁹ An joɓogi ni joɓiya na ni agi dik muli suu li ɓivunna suu vi Yawena goryoŋ Aaronna u njaf suu vi Levina ay ka kiɗi su? Cemi agi mbuɗ a muli magi suu li ɓivunna ni suu ay ki hu mbassa daŋgana. Gegelay ni mbay u bolo mbutl mamma may u gamlagina kiɗisiya may ni mbuɗ ni a mul ma li ɓivunna vi loogi asina suu ka gasi Lonaɗina.

¹⁰ Lini amiya ni Yawe ni Loomina ami noyom ka kiɗi, muli suu li ɓivunna ka ni goryoŋ Aaronna u njaf suu vi Levina ka li sunda ni asiya.

¹¹ Asi li ɓivun ma ŋgalam ki ŋgalina maŋ Yawe maɗii may fiɗigi may ni asiya, ŋgal mbitla his jivira may. Asi cuk funa kay tabulla teteɗta may. Asi tin kura fun pindilla fiɗigi tew tew. Kay ami ka li u gaɗta vi Yawe Loominara tew tew. Agi may ni agi noyom ki wa.

¹² Gologiya, Lona ka dukumi ni a mul mamina. Ami ka u muli mam suu li ɓivunna u tokolom ma bura lay a ami hin buum a duu u agira agi suu Israelna. Duurugi u Yawe Lo ma vi somoyoginaɗi, kay agi ka hin a tewɗi.»

¹³ Jeroboam ŋguyusi yasi ay ki u suu duuna pereɗ ay ki ŋgorosi dagan may. Suu Israelna ka laki fok suu Yudana may. Suu daŋŋa ay ka ki buuri ŋgorosi dagan may.

¹⁴ Suu Yudana mbuɗ irisiya ni duuna col ay ŋgorosi dagan may, fokosi may. Asi yi kolo eg Yawe. Muli suu li ɓivunna bu tokolomma may.

¹⁵ Suu Yudana tum soora duuna. Hu li ma asi tum soora na may ni, Lona vi Jeroboam u suu Israelna halaŋ kaŋga fok Abiya u suu Yudana.

¹⁶ Suu Israelna pii liŋŋa fok suu Yudana. Lona hinisisina ki hu duk kosiya.

¹⁷ Abiya u suu mamsina lasi ki coo, duk suu Israelna suu miɗna ni 500,000 ni suu vari suu wi duuna cocona.

¹⁸ Hu coki ndaɗta ni yam suu Israelna halaŋ hom kaŋgaa. Suu Yudana su kasi may. Kay asi hin tasi ni ko Yawe, Lo ma vi somoyosina.

¹⁹ Abiya dik u Jeroboam gak gak tli ɦoŋzi ma Betelna ki u zi ma ŋguy kamma halaŋ, zi ma Yessena u ma ŋguy kamma halaŋ, zi ma Efronna u ma ŋguy kamma halaŋ may.

²⁰ Hu li ma Abiya ka a mulna ni Jeroboam ka fi saɓakam kom oloɗi. Yawe camu. Nam miɗ kiyo.

²¹ Abiya hin mbuɗ ni saɓak na ɗow. Nam ɗum boyogina na doogo yam fiɗi, vuɗ gor njufiina dok-mba' yam mba'. Gorɓiina doogo yam karkiya may.

²² Dlara Abiya laɗta halaŋ ka ɓiiri hu magaara vi sa ma jok vun Lona, Ido.

²³ Abiya buu kaŋga eg somoyomu. Asi pammi hu Ҥoŋzi Davidna. Goromma Aza hin varak ka balamam a mulna.