2 DLAŊ MULINARA 12 - Boy Lonana

Sisak, mul ma Egiptena, mba ndug mbassa Yudara

¹ Hu li ma Roboam um ŋgaa ki kaŋga hu mul mambana ni nam hin gaɗta vi Yawera ki gaw, suu Israelna halaŋ li na lay.

² Hu basara vadlla hu li ma Roboam kak a mulnara ni Sisak, mul ma Egiptena, col ay kolo a duu u suu Yerusalemma, kay asi li sulukŋa eg Yawera.

³ Sisak mbay u suu duu u pus pus ma kulumin um na 1,200, suu jaŋ kulumina na 60,000, asgaari suu libina ka ndumbi, suu Sukotna u suu col ay Etiyopina lay.

⁴ Asi mba ndug ɦoŋzi ma saɓak ma hu Yudana jak gak gak tew ki hu Yerusalem.

⁵ Sa ma jok vun Lona, Semaya, mbay eg Roboam u muli suu Yudana, hu li ma asi ka toki Yerusalem a ŋgaf Sisak a duunara dasi ana, «Gola, Yawe di ana, Agi hinin kiyo ni, an may ni hinigi ki hu duk ko Sisak may.»

⁶ Mulna u muli mam suu funumma wi coosira hin di ana, «Gasi daŋ may, boy ma vi Yawena ni u voɗomu.»

⁷ Hu li ma Yawe wi na gaw ni, nam hin di sa ma jok vun Lona, Semaya, ana, «Asi wi coosira wa ni, an ka min a daɓasi kiɗi u dlara ew daŋga an hin buɗusi ki kay an hin hurun ma ɓeŋa ki wa, ka hin Sisak a ɓalak ɦoŋzi ma Yerusalemma ki oloɗi.

⁸ Vam na lay ni asi hin mbuɗ ni ga u Sisak, ni asi hin wi ki ana gi yamba ga u Yawera may, gi yaŋ ga u mul ma kay ndaŋgarana may ni jivira ni taarage?»

⁹ Sisak, mul ma Egiptena, mba ndug Yerusalem. Nam yow begera hu Ziŋ Lonara ura vo hu ziŋ mulnana halaŋ. Nam yow mbari ma Salomon yoorom u lorra lay.

¹⁰ Mulna Roboam hin yoo balam mbari namma ni mbari ma daŋŋa u kawi ma tlawna. Ҥam ko suu ŋgolo suu fok suu liŋŋana, suu ka juɓ vun ziŋ mulnana.

¹¹ Hu li ma mulna li a kal kalafi hu Ziŋ Lonara ni suu juɓ u zina yow mbari namma aya, nam li wa ni asi hoŋom ay hu zira juɓ u lina balamamu.

¹² Hu li ma mulna hoŋ yam gana, Yawe hin heɓ yaamba kaŋga nde, hin ka a ɓalak zina vi mulna ki gawɗi, kay tlesuu jivina ka hu Yerusalem tuwa.

Mul Roboamba daɓmi na

¹³ Mulna Roboam kak eŋ coco hu mul mamba hu ɦoŋzi ma Yerusalemma. Nam kak a mulna na ni basaɗam ki ni dok-fiɗi. Nam hin ti mulla ni basara doogo yam kiɗisiya may hu ɦoŋzi ma Yerusalemma. Ni ɦoŋzi ma Yawe manam ki duk suu Israelna halaŋ a tin sem huna. Roboam sem sum ana Naama. Ndaɗ ni goora Amonda.

¹⁴ Nam li dlara ka u voɗoɗɗira kay nam vi hurum ka gasi a hal Yaweɗi.

¹⁵ Sunda Roboam laɗta gijaŋŋa ta ta daɓ nduŋga halaŋ ka ɓiiri hu magaara yaɗ ana Sunda vi Sa ma jok vun Lona Semaya u sunda vi sa ma wi dlara li ha fokka Ido may. Duu ma duk hoŋ gi Roboam u Jeroboamma tuɗ ha fok ni na gak gak.

¹⁶ Roboam buu kaŋga eg somoyomu. Asi pammi hu Ҥoŋziŋ Davidna. Goromma Abiya varak balamam kay mulla may.