2 DLAŊ MULINARA 11 - Boy Lonana

¹ Roboam mba tew ki Yerusalem may ni tok suu Yudana u dee suu vi Benjaminna ay egem halaŋ. Asi suu duuna li halaŋŋi 180,000 a asi tuɗ duu u suu Israelna a hoŋ mulla ay ki ni maŋ Roboam dew.

² Na may Yawe mba di sa ma vi Lonna, Semaya, ana,

³ «Tuɗ di Roboam ma goŋ Salomonna, mul ma Yudana, u suu Israel suu ka hu Yudana u dee suu vi Benjaminna ana,

⁴ Yawe di ana agi ka ndak a tuɗ duu u gorseginaɗi. Gegelay ni hoŋ vo hu ziimu. An li dla ndaɗta na ni an daŋ may.» Asi hum u boy ma Yawe damma, hin dla mayra tuɗ duu u Jeroboamba gaw.

Roboam min ɦoŋzi ma daŋŋa ki cocoo

⁵ Roboam kak ni hu Yerusalem. Nam min ɦoŋzi ma saɓak cocona hu mbassa Yudara cocoo.

⁶ Nam min ɦoŋzi ma Betlehemma, ma Etamma, ma Tekoana,

⁷ ma Bet-Surna, ma Sokona, ma Adulamma,

⁸ ma Gatna, ma Maresana ma Zifna,

⁹ ma Adorayimma, ma Lakisna, ma Azekana,

¹⁰ ma Sorana, ma Ayalonna u ma Hebronna. Ҥoŋzi ma saɓak namma ca ni ka hu mbassa Yudara u mbassa vi Benjaminda.

¹¹ Roboam cuk tlesuu ɦal saɓakŋa maŋ ɦoŋzi nammana hu cocoo. Tin muli suu ŋgolona ki hu may. Cuk tlesuu ɗokka hu may ni, tlesuu tira, mbulna, ugi sum veŋŋa.

¹² Hu ɦoŋzi namma dew dew bel ni mbarina ka cuki huwa u saɓagina lay. Kay ɦoŋzi ma saɓak ma mini zeɗ zeɗ namma nam mbuɗ a ti mulla kay suu Yudana u suu vi Benjaminna ni na.

Muli suu li ɓivunna u njaf suu vi Levina hoŋ ay ki u Roboam

¹³ Muli suu li ɓivunna u dee suu vi Levina suu ay ki hu mbassa Israella halaŋ hoŋ ay ki umu, u mbas masira halaŋ.

¹⁴ Kay njaf suu vi Levina hin mbas masira ha ki halaŋ, mbay ki hu mbassa Yudara, hu Yerusalem. Ni kay ana Jeroboam u goryom doorosi ki ana asi ka li ɓivunna maŋ Yaweɗi.

¹⁵ May Jeroboam yow muli mam suu li ɓivunna kay tam a li ɓivunna kay li ma mbuy kolona. Ŋgegina u gor mbutli suu nam yoorosina.

¹⁶ Na may suu Israelna halaŋ suu dukusi suu min a hal gasi Yawe, Lona vi suu Israelnana halaŋ, mbay ki ni hu Yerusalem a li ɓivunna maŋ Yawe, Lona vi suu Israelna.

¹⁷ Asi so u mulla Yudara, asi njunni u Roboam goŋ Salomonna, basara hindi kay nam li ni u dlara David u bum Salomon laɗta may.

Deera vi Roboamba

¹⁸ Roboam ɗummi Mahalat ta goŋ Yerimotta. Nammi goŋ Davidna may. Suɗ Abihail ni goŋ Eliyab ma goŋ ŋgolo Jesena may.

¹⁹ Mahalat vuɗum gor njufiina ni hindi, ni Yeus, Semariya u Zaham.

²⁰ Ŋgoo dagan Roboam hin ɗum Maaka, goŋ Absalomba. Ndaɗ hin vuɗum gor njufiina fiɗi, Abiya, Attay, Ziza u Selomit.

²¹ Roboam min Maaka ta goŋ Absalomba su boyogom suu daŋŋa bel bel. Boyogom suu ɗumba halaŋŋi doogo yam kalavandi. Boyogom suu ko ɓoli mamma ɦawa na na ni dok-karkiya may. Goryom suu njufiina halaŋŋi dok-mba' yam kalavandi. Gorɓiina dok-karkiya may.

²² Roboam tin Abiya ma goŋ Maakana ni hu li ma fokŋa duk gorsemma halaŋ. Nam mbuɗummi a mul ma fok gorsemmana kay nam min ana nam hin mbuɗ a mulna ni namu.

²³ Nam fi saara daŋga, tin goryom ha ki a ŋgolora hu mbassa Yudara u mbassa Benjaminda halaŋ halaŋ hu ɦoŋzi ma saɓak coco namma. Nam ɦasi tina ha usi saɓak cocoo, yowosi boyogina usi bolow coco lay.