2 DLAŊ MULINARA 10 - Boy Lonana

DLA MULI SUU YUDANA Tokka ŋgolla laɗ hu Sikemba

¹ Roboam hoŋ ay hu Sekem kay suu Israelna min a tinim ki a mulnara ay ni hu Sekem.

² Hu li ma Jeroboam ma goŋ Nebatna ha hu Egipte hum boy namma hana nam mbay voo kay nam pii ha ki ni ko mulna Salomon.

³ Asi sun kam yam ay voo. Nam mbay u suu Israelna halaŋ may. Asi mba di Roboam ana,

⁴ «Buŋ lasami cocoo, cemi wanda ami min ana aŋ koɗomi tami nde, lasami ko buŋ lamira na oloɗi, ami hin li ni a suu sunuŋŋa.»

⁵ Nam hin dasi ana, «Tuɗugi voo, hoŋogi ay egen hu buu ma hindina tuwa.» Suu Israelna halaŋ hin mbee ki vo may.

⁶ Mulna Roboam tuɗ joɓ u dlara eg suu ŋgolo suu li sunda ko tasi u bum Salomon hu li ma nam ka iiri tuna ana, «Agi may ni min a gaɗanni ana mege? Agi min an tuɗ di suu Israelna a hoŋosi dira ni ana mege?»

⁷ Asi hin dam ana, «Lini aŋ tak taŋ ki jivi ii suu asina, lini aŋ ɓakasi boy ma jivina ni asi hin li ni a suu sun maŋsina gak gak.»

⁸ Na may Roboam vi boy ma suu ŋgolona dammana kaɗi. Nam tuɗ tok ko tam u gorzoŋii suu wul ko tasi dew suu basaɗasi ko nam na may suu ka sunumma.

⁹ Nam joɓosi ana, «Agi may ni min a gaɗanni ana me mayge? Aygi tuɗ hoŋ dira maŋ suu Israel suu di ana, Lasami ko buŋ lamira na oloɗina, ni ana mege?»

¹⁰ Gorzoŋii suu wul ko tasi dewna hoŋom dira ana, «Aŋ tuɗ di suu daŋ ay asina ana, Buŋ lasami saɓaki cocoo, aŋ may ni lami ko buŋ lamira na oloɗina, ana, Do konda goora wanni ŋgol su u fuu bunu.

¹¹ Bun tinigi dlara nekka kagi cocoo. An may ni manda hin li ni sura vi bunda olo. Bun waɗagi ni u balafna ɦawaa. An may ni hin poŋogi ni u balaf ma vunum mbana.»

¹² Hu buu ma hindina wanni Jeroboam u suu Israelna halaŋ hoŋ ay eg Roboam ko nam dasi hara na may ana, hoŋogi ay egen hu buu ma hindina tuwa.

¹³ Mulna Roboam hoŋosi dira u della eŋga hin boy ma suu ŋgolona dammana ki halaŋ.

¹⁴ Nam ɓakasi ni u gaɗta gorzoŋiina dambara ana, «Bun lasagi ka cocoo. An may ni hin a lagi ni suwa. Bun waɗagi ni u balafna. An may ni hin waɗagi ni u balaf ma vunum mbana.»

¹⁵ Mulna hum boy ma suuna joɓom kamma kaɗi. Yawe Lona li dla ndaɗta na ni kay a li ki ni u vi vun ma nam vam duk tam u Jeroboam ma goŋ Nebatna hu li ma nam dam dlara ay fun sa ma jok vun Lona Ahiya ma Silonara.

Ii mulla ɓorow kiwa. Roboammi, mul ma Yudana

¹⁶ Hu li ma mulna hum vun suu Israelna kaɗina, suu Israelna hoŋ dira maŋ mulna ana, «Va ma ami a fam vi Davidna ni mege? Joomi maa ka vi goŋ Jesenaɗi. Suuna halaŋ gegelay ni tuɗ ni hu mbutluɓ mamma. Cem wanda aŋ kak ni kay suu maŋ suu vi Davidna.» Suu Israelna halaŋ gegelay ni gi tammi vo hu ziim gaw gaw.

¹⁷ Roboam hin tuɗ fok a ti mulla kay suu Israel suu ka cuki hu mbassa Yudarana may.

¹⁸ Mulna Roboam sun sa ma ŋgol asgaana Adoram ha eg suu Israelna. Asi suu Israelna gikim u gogoyra, cam kiyo. Mulna Roboam wi na ni, gan pus pus kulumi mamma, pii tuɗ ki hu Yerusalem.

¹⁹ Suu Israelna mbuɗ gaŋawna duk tasi u dee suu vi Davidna ta ta cemi.