2 DLAŊ MULINARA 1 - Boy Lonana

Dlara kay Salomon, mul ma Israelna

¹ Salomon, goŋ Davidna mbuɗ saɓak coco hu mul mamba. Yawe, Loomma, ka u namu. Nam tlam yam kolo cocoo.

Salomon joɓ yal ma ti mulla ay ko Lona

² Salomon ɓak suu Israelna na halaŋ, suu ŋgolo asgaarina u suu ŋgolo suu ɦoŋzinana, suu kaɓakŋa u suu Israelna bel bel.

³ Salomon u suu tok ay egem asina halaŋ nam min mbutluɓ ma ŋgaf tasi u Lona huna. Mbutluɓ namma minim ka ni Moiz sa sunda vi Yawe minim ka ŋgo bagi hu fulla ni namu.

⁴ Kay Zandukka vi Lonara David tlaɗ ay hu Kiryat Yearim, tuɗuɗ ha ki vo Yerusalem. Nam tuɗ tiniɗ hu liiɗ ma miniɗna kaɗna hu mbutluɓma.

⁵ Nam tin givin ma togolla ma Basalel ma goŋ Urina, goŋ ŋgolo Hurna, yoorom u kawi ma tlawna fok Yawe hu mbutluɓma hu Gabaon may. Salomon u suu mam suu umma halaŋ tuɗ a joɓ Yawe ni huwa.

⁶ Salomon ɦuɗ tam ha fok Yawe. Nam li ɓivunna sem na buɓ hu givin ma togolla ma mini u kawi ma tlawnana, fok mbutluɓ ma asi li tokka a ŋgaf u Lona huna.

⁷ Hu njeŋge ndaɗta ni Lona tak tam ii Salomon dam ana, «Joɓ va ma aŋ min ana an ɦaŋŋana, aŋ minni mege?»

⁸ Salomon hoŋ dira maŋ Lona ana, «Aŋŋi sa ma li bun David jivi u ɗegee maŋgana, aŋ hin varakan a mulna balam bun may.

⁹ Cemi wanda Yawe Lona, ko aŋ vi u boy maŋ ma aŋ dam maŋ bun Davidna kiyo, aŋ kakan a mulna kay suu zuli coco wanna ni aŋu. Asi zulira ko ndal ŋgetlna na.

¹⁰ Cemi wanda aŋ ɦan mbeleŋŋa u wira kay a an wi yal ma tuɗ fok suu asinana. Sa ma ndak a kak mulla kay suu maŋsina suu zuli coco asina na ni gege?»

¹¹ Lona hin di Salomon ana, «Ko aŋ huruŋ minda na may, aŋ min ka a joɓmi begeɗi, joɓ ka dlara hal ŋgolla ŋga taŋgi lay, joɓ ka ana caŋ cuu babali maŋsina kiyo naɗi lay, joɓ ka buu ma fiyek hu duliyara taniɗi lay. Aŋ hin joɓmi wira u yal ma gi ii dlara na ɗow, a ti mulla kay suu man suu an tiniŋ ana aŋ kak kasiyana.

¹² Yalna u wira mbeleŋŋa an ɦaŋsina wa. An ɦaŋ ɦiza hu olo. Aŋ hin fi tlena seŋ tii ki coco lay. Aŋ hin fi ni bibiŋilla muli suu kay ndaŋgarana halaŋ sa faɗ ka dew tuɗira. Muli suu hin kak ka ŋgoroŋ daganna lay ni sa ma faɗ kaɗi.»

¹³ Salomon hoŋ ay fok li ma teteɗna hu Gabaon fun mbutluɓ ma asi tok huna vo hu Yerusalem. Nam kak a mulna kay suu Israelna hu Yerusalem.

Saɓakŋa u Begera vi Salomonda

¹⁴ Salomon tok yam pus pus ma kulumina u suu jaŋ kulumina ay egem halaŋ, pus pus mamsina ni 1.400, suu jaŋ kulumina ni 12.000. Nam cukusi hu kaŋ ma vi suu asgaanana hu ɦoŋzi ma ŋgolna egem vo hu Yerusalem na tok.

¹⁵ Mulna doonora u lorra ka kom hu Yerusalemba ni su gogoyra. Gu ma yam ana sedrenana ŋgol coco lay su gu ma yam ana sikomorna ma ay hu mbassa kaŋgarana.

¹⁶ Kulumi suu vi Salomonna col ay ni hu mbassa Egiptera u Kowa. Suu paa suu vi mulnana gususi ay ni hu Kowa.

¹⁷ Suu paa asina gus pus pusna ay hu Egipte. Pusna dew ni ii gursu kis kis karkiya, kulumma dew ni ii gursu kis duk dok-vadl. Suu paa asina tuɗusi ha maŋ muli suu Hitna u muli suu Sirina lay.

Salomon ka min tam a min Ziŋ Lonara

¹⁸ Salomon ɦal voɗta ana min Ziŋ Lonara may, min zira ŋgolla vi mulnara may.