1 TIMOTE 4 - Boy Lonana

Suu haɗ gaɗ mayra ka u voɗoɗɗira

¹ Musukka di ki gasi ana lina hin fok a daɓ daganda wanni suu ɦiw hin vira kiyo, asi hin mbuɗ hum u ŋgussa ganyamba u haɗta vi fulina.

² Asi hin viɗ tasi ki u humba hum u suu hurusi mbambana u kaboyna, ni wiisira fokka ki miɗiya, ko sa ŋgalaɗ ki ko kawina gi ay ki tlawra kuŋgura na.

³ Suu asina haɗ ana a sana ɗum cara ni ka jiviɗi, tlesuu taa ɦiw lay ni tasiɗi lay, Lona li tlena halaŋŋi a suu vi suu wi gasira cenem kasi wa ni tiya.

⁴ Tlesuu Lona lasina halaŋŋi jiviya ma sa a noyom ki kaɗi, fasi halaŋŋi u gi deɓpa maŋ Lona.

⁵ Boy Lonana u cenda cenemba mbuɗ tlena ki jivi halaŋ fok Lona.

Sa ma sunda vi Yesu Kristu ma jivina

⁶ Lini aŋ haɗ gorseŋŋa na ni aŋ hin mbuɗ ni sa ma sunda vi Yesu Kristu ma jivina ni tak ki ana aŋ ti tina vi Musukka u boyna vi vira, li wa na ni aŋ tuɗ ni u haɗta vi gaɗta gasi.

⁷ Hin dlara njunjunda tafaɗira vi boyogi suu maana, ta garak u boyna vi vira kiyo, haɗ taŋ a vi u Lona na ɗow.

⁸ Haɗta vi mbalatara jivi maɗta ka ŋgolɗi, vira vi tara eg Lonara ni ŋgol su na ɗow. Nam ɦaygi iirira cecemba ni lay, ta ha fokka lay.

⁹ Gola boyna wanni boy ma gasina ndaki a sa vamu.

¹⁰ Gola aygi laygi sunda loɓ taygi lay ni kay juɓ Lona ma iirina, nammi Sa ma Suɗta vi suuna halaŋ, su saɓaki ni kay suu vina.

¹¹ Gaɗa, haɗ tle asina halaŋ.

¹² Hu zoŋ maŋga ni hin sa a ŋguluŋgi, tak taŋ ki a suu vina tli uŋu, u vunuŋ ma ɓak boyna, u poy maŋga, u min maŋga, u viiŋga, u ɗegee maŋga.

¹³ A juɓun a an tuɗ hara wanni haɗ taŋ a ndum magaara ki fok suuna halaŋ a di boyna a haɗta lay.

¹⁴ Gol ɦala Musukka ɦaŋgara lalasɗi, ta aŋ faɗ ay ko suu jok vun Lona di kaɗta u mayra suu ŋgolona tin kosi kaŋga.

¹⁵ Li jiviya a li sunda ndaɗta u voɗoɗu, ɦal taŋ ki na halaŋ kay suuna, kay suuna halaŋ wi ana dlaaŋga tuɗ foko.

¹⁶ Gol taŋ u haɗ maŋga jiviya, kak ɗili hu dla ndaɗta halaŋ, lini aŋ li ko ndaɗta na ni aŋ hin suɗ taŋga kiyo u suu humuŋŋa lay halaŋ.