1 TIMOTE 3 - Boy Lonana

Suu gol suu vina

¹ Boyna wanni boy ma gasina, lini sana min sunda gol suu vi Kristuna, ni nam tli ni sunda jivira.

² Sa ma gol suu vi Kristuna lini sa ma ŋgul ka egembina, nam lini sa ma cara um dewna, doo tamu, ɗigiliya, ŋga tambi, lini sa ma suuna tuɗumma, nam li ndaki a haɗ suuna.

³ Nam lini sa ma ɦal tam ki maŋ summaɗina, sa ma honiraɗi lay, lini sa ma ɗili lalamma, ɦal tam ki u minda vi gursuraɗi.

⁴ Nam lini sa ma ndaki a gol ziimma, ma goryom hum umma.

⁵ Lini sana ndak ka a gol ziimbi ni hin gol suu vi suu vi Lonna ni nanage?

⁶ Li sa ma vi Boy Lonana wilinaɗi, li ka naɗi ni nam hin ŋga tamu, ɓakŋa hin vam ko Satanna na may.

⁷ Lini nanagelay suu vi Boy Lonana kaɗina ŋgaam hu dlaamba nam laɗta lay. Kay suuna mba panambi, a nam mba viɗ ki hu ganyamba vi Satannaɗi.

Suu sun suu vi Kristuna

⁸ Suu sun suu vi Kristuna mba lini suu ndakina, suu ɗegeena, asi mba li a suu ɦal tasi ki kay summa sasakgi, hal a fi gursura u ganyambaɗi lay.

⁹ Asi li tew tew kakira hu gasira vira takasirara, u saara jivira pasiyakka.

¹⁰ Tukusi ki jew tuwa, lini ŋgul ka egesiɗi ni asi hin ndak a li sunda ko suu sun suu vi Kristuna na.

¹¹ Boyogosi mba lini boyogi suu ɗegeena ka suu ɦalinaɗi, asi mba doo tasiya ɗegee hu tlena bel.

¹² Lini nanagelay sa ma sun suu vi Kristuna mba lini sa ma cara um dewna, nam mba lini sa ma ndaki a gol goryom u ziim halaŋŋa.

¹³ Asi suu sun suu vi Kristuna suu li sun masira jivi u voɗoɗna asi mba fi ni geleɗta ŋgolla, asi ndak ɓak kay gasira vi vira ta aygi ka taɓi u Yesu Kristura.

Ŋgayra ŋgolla

¹⁴ An ɓiiriŋ magaara ha wanni kay an hin tok a tuɗ ha varaŋu.

¹⁵ Lini an yan ka vi tuwa ka faŋ ha zakgi ni, magaara wanni ndak a njun uŋu a takaŋ poyra duk suu vina, ni di ana suu vi Lona ma iirina, asi ni mbal ma dukŋa suu coli kay gasirana.

¹⁶ Sa ndak ka a di va ma daŋgi, ŋgayra vi ɗegee ndaɗta wanni ŋgol ɦay. Nam mba tak tam ki ko sa warna na, Musukka takam tam ki ana nammi sa ma ɗegeena. Suu sunda huulona wamu, suuna halaŋ dlaamba di ay ki dukusiya, suuna vi um coco lay. Nam kal ki kolo huulona.