1 TIMOTE 2 - Boy Lonana

Haɗta kay cenda

¹ A jew gigiŋga ni an hal voɗta a joɓ Lona u cenda, goɓ gaa fok Lona u gi deɓpa kay suuna halaŋ.

² Cen kay muli suu ŋgolona u suu ka hu ŋgolla na bel bel, kay aygi mba lak u jivira u heɓpa, ay mba lak taɓi fok Lona hu poyra jivira fokomu.

³ Gola ni dlara jivira ii Lona ma suɗuygina.

⁴ Nam min ana suuna halaŋ mba fi suɗta, wi gasira lay.

⁵ Kay Lona ni dew, sa ma taɓ duk suuna u namma ni dew may, sa namma ni Yesu Kristu.

⁶ Nam sa ma ɦal tam ki kay warakŋa a buɗ suuna ki halaŋŋa, ni dlara di ki kay li ma nam ŋgaamma ana nam min suuna bel bel mba fi suɗta.

⁷ Ni kay ndaɗta nam van ki a sa di boyna a sa vovoɗta, kay a haɗ suu ka njaf suu Juifnaɗina kay vira u gasira, an ka kaboyɗi, di ni gasira.

⁸ An min ana hu lina halaŋŋi suuna cen Lona yow kosi kolo kay a cen hu buu ma jivina bay yara u ŋgussa honira hurusiya.

⁹ An min ana boyogina cukŋi baraw ma bay ŋga tara, asi mba li ni u ɗigilla hoŋ yasi kaŋgaa, asi mba li va ma tin kasi ko jumba na ma gus loɓmaɗi, ugi walakka humba u herewna u baraw ma gus loɓmaɗi.

¹⁰ Li sunda jivira ko boyogi suu li sunda ii Lona jivina na.

¹¹ Boyogina hum haɗta u kakka enda, u hoŋga hoŋ yamba kaŋga gasira.

¹² An ka min ana cara haɗ ɗowba kak a ŋgolla kay sa njufnaɗi, ndaɗ kak na en.

¹³ Kay Adam ay mini jew ni namu, Eve ni dagani.

¹⁴ Adam viɗ tam ka ki ni nambi, cara viɗ taɗ ki hum ka u gaɗta vi Lonaraɗi ni ndaɗu.

¹⁵ Cara hin fi suɗta ni u vuɗta vuɗ gorra lini ndaɗ kak hu vira u minda u teteɗta, hoŋ yamba kaŋga lay.