1 TESALONIKŊA 3 - Boy Lonana

¹ Ni kay ndaɗta ami ka juɓbi, ami min ana ami hin ka hu Aten kay tamiya.

² Ami sunumi wayamina Timote ma li sunda vi Lona u amina, kay a di Boy ma Ayra ki kay Kristu. Ami sunugina ha ni kay a nam gaɗagi, soogi hurugi kay viigira.

³ Kay a sa mbuɗ ndaa ko lassa ka cecemiraɗi, agi wi lay ana aygi taygira ŋgaɓi ni kay ndaɗta daŋ may.

⁴ Hu li ma ami ay egegi tokŋa ni ami dagi ki fok jew ana lassa hin mbaa, dla ndaɗta li cemi ni ndaɗu, agi waɗu.

⁵ Kay ndaɗta an sun Timote ha egegi ni a hum dla viigira. An li ndaana ana Satanna ndemegi ki a baami sun mamira ki ɦawaɗi.

⁶ Timote ay varagi hoŋ ay egemi wa, nam dami boy ma jivina kay dla viigira u min magira. Nam dami ana agi ka saa kami tew tew u furira, agi min a wami irimi ko ami hal a wagira na may.

⁷ Gorsenna duk yoo mamira hu lassa, ami fi ɗil iira kay boy dla viigira.

⁸ Cemi ami ka lagi jivira ni kay agi coli eŋ hu viigira u Bu Suunara.

⁹ Ami gi deɓ maŋ Lona coco kagiya, kay ami ka furi kagi coco fok Lona.

¹⁰ Faali lay njeŋge lay ami ka cen Lona kay nam hinimi voɗta a ami wagi irigiya, a ɦuɗugi u viigira foko.

¹¹ Ko Buy Lona u tamba u Bu Suuna mayna Yesu minimi voɗta fokomi a ami ndak tuɗ wagi irigiya.

¹² Ko Bu Suuna wulugi minda min tagira ha fok na ɗow, a min suuna halaŋ, ko ami minigira na may.

¹³ Ko nam soogi hurugi a lak bay cora teteɗ fok Lona Buya, a juɓ mbara vi Bu Suuna mayna Yesu u suu mam suu teteɗna halaŋ.