1 SAMUEL 9 - Boy Lonana

Sol u korra viɗ kira

¹ Sana dew ay duk suu vi Benjaminna yam ana Kis. Nammi goŋ Abiyelna, goŋ Serorna, goŋ Bekoratna, goŋ Afiyana, goŋ sa ma hu deera vi Benjamin maa dew. Nam saɓak cocoo.

² Goromma dew yam ana Sol. Nammi go njuf ma jivina. Duk goryoŋ Israelna sa ndak ko nam na dew kaɗi. Fiyekam su ki kasi col ha kay pel bikisi na ta ta tew kay yamu.

³ Korra vi Kis ma bu Solna viɗ kiyo. Kis di goromma Sol ana, «Aŋ vi mbaɓu uŋ dew, tuɗ halagi korra.»

⁴ Nam ɦoɗ yam ɦinira Efrayimba, hurum ndeŋ ndeŋ, nam ɦoɗ yam mbassa Salisara hurum ndeŋ ndeŋ faɗ kaɗi. Asi ɦoɗ yam mbassa Saalimba, hurusi ndeŋ ndeŋ faɗ ka tuɗi gak. Nam ɦoɗ yam mbassa vi Benjaminda hurum ndeŋ ndeŋ fi va kaɗi.

⁵ Hu li ma asi tew ki hu mbassa Suffa may ni, Sol di mbaɓu ma tuɗ u namma ana, «Tuɗuya, hoŋoya. An li ndaana ana bun hin ka saa ŋgolla kay korraɗi mayna hin saa ni kay aya.»

⁶ Sa sunda dam ana, «Na may na hu ɦoŋzi namma sana vi Lona ka huwa. Sa namma dlam tii ki coco ɦay. Dlara nam daɗta li eg liiɗ gasi may. Tuɗuy ɗaŋgi su? Kala nam li hin day va ki kay koyra ay tuɗuɗ wanda kala ni ge.»

⁷ Sol di saam ma sunda ana, «Jiviya tuɗuy huwa. Na may ni va ay hin tlam ha koy maŋ sa nammana ni mege? Mappa hin ka koy hu mbumbu mayra oloɗi lay, ka jivi a ay ɦal tlesuu ay a tasi voɗna ki maŋ sana vi Lonaɗi. Va ka koyna ni mege?»

⁸ Mbaɓuna hoŋ dira maŋ Sol ana, «Nus gursu sikle hin ka konni ew daŋ ɦawaa. An hin ɦaɗ ki maŋ sa vi Lonana, nam hin ɓakay dlara kay koy mayra.»

⁹ Ay jew vi suu Israelna ni lini sa min tuɗ a joɓ Lona ni nam di ana, Mbaagi ay tuɗuygi eg sa wi u dlara. Kay ana sa jok vun Lona ay jew yammi ana, sa wi dlara.

¹⁰ Sol di saam ma sunda ana, «Aŋ di jiviya. Mbay tuɗuya.» Asi hin tuɗ hu ɦoŋzi ma sa vi Lonana ka huna.

¹¹ Asi ɗiŋ kolo kay ɦinira hu ɦoŋzinara, hu li ma asi fi gorɓiina sel ay ki a go yona. Asi dasi ana, «Sa wi dlara ka ni tani su?»

¹² Asi hoŋosi dira ana, «Ҥaa, ha fokoŋ na ɗegee. Cecem wanda aŋ li zak kay ana nam mba hu ɦoŋzina karami, kay ana ɓivunna ka a li ki duk suuna kiɗik hu li ma ki kolo mbuyna.

¹³ Lini agi tew ki hu ɦoŋzina wa gaw ni, agi tuɗ fam ki jew gaw bay nam tuɗ a ti funa ki kolo kay li ma mbuyna, kay ana suuna ka ndak a ti ki jew bay nam mbaɗi, kay ana nammi sa paɗ vunum ki kay ɓivunnana, ŋgoo dagan suu yasi ayna hin ti ni tuwa. Cecem wanda ni tuɗugiya kay ana nam karammi agi hin famu.»

¹⁴ Asi tuɗ hu ɦoŋzi namma ɗaŋ. Asi kal ha hu ɦoŋzina may ni, gola ni Samuel kal ay ki fokosi a tuɗ hu li ma kolo mbuyna.

Sol ŋgaf Samuel

¹⁵ Doli ɗini Yawe ne yam Samuel ki buuna dew jew mbara Sol hin a mbara. Nam dam ana,

¹⁶ «Vin faɗta ko wanda na an hin sunuŋ sana ay dew hu mbassa vi Benjaminda aŋ hin fuurum ki ko ndal mulnana maŋ suu man suu Israelna. Nam hin suɗ suu mansina ay ki ko suu Filistinna. Ni kay ana an wi suu mansina, tii masina tew ta ta egenu.»

¹⁷ Samuel irim cuk eg Sol. Hoŋgo zak gaw ni Yawe hosogomu, «Gola, ni sa an ɓakaŋ kamma. Nammi sa hin van suu mansina komma.»

¹⁸ Sol ɦuɗ tam ay eg Samuel hu vun goŋga gagayra hin di ana, «An joɓoŋŋi joɓiya ni takan ziŋ sa wi dlarana gige.»

¹⁹ Samuel hoŋ dira maŋ Sol ana, «Anni sa wi dlara namma, tuɗ ha ki fokon kolo kay li ma mbuyna. Agi hin ti funa karam u anu. Vin maɗii an hin hiniŋ aŋ tuɗa. An hin daŋ dlara huruŋ haɗ kaɗta ki halaŋ.

²⁰ Kay dla kor maŋga viɗ ki buuna hindira, saa kaɗ oloɗi. Asi fasi wa. Tlesuu jivi cocona halaŋ hu Israel ni maŋ gege? Ka ni maŋ aŋ u suu vo vi buŋŋa halaŋgi su?»

²¹ Sol hoŋom dira ana, «An ka ni hu njaf ma vi Benjaminnaɗi su? Deera goo saɓak duk suu Israelna, dee manda ka ni dee mayra ki kaɗaki saɓak dagan duk deera vi Benjaminda halaŋgaɗi su? Ni kay me aŋ ɓakan ko ndaɗta na nige?»

²² Samuel vi Sol u mbaɓu mamma, selesi kalafi hu zira, ɦasi li ma kakka ki fok suu yasi ayna. Asi ay hu li namma ni ko va ma dok-hindi na.

²³ Samuel di sa li sun funa ana, «Ҥal u fu ma an ɦaŋŋana ay kiyo, ma an daŋ ana tinim ki keŋena.»

²⁴ Sa li sun funa tli ɓalna ay kom u njawra. Nam tinisi fok Sol hin di ana, «Ni u tlesuu hin ayna, ɦaŋsina wa aŋ koma. Ni kay dla ndaɗta ami hinisi ka ni na, hu li ma asi di ana, an yi suuna aya na.» Sol kom tliwna ko tasi u Samuel hu buu namma.

²⁵ Asi hin ɗiŋ ay ki kaŋga kay li ma mbuy ma hu ɦoŋzinana. Asi hin ɓak duk tasi u Sol kolo kay yam zira.

²⁶ Asi hin col kolo toŋgo zak. Hu li ma lina gijaŋ garaɗ ay ki may ni, Samuel yi Sol kolo kay yam zira. Nam dam ana, «Gi taŋ voɗo, an hin tiniŋ ha kiyo.» Sol gi tam voɗo. Asi u dlasi jak nam lay, Samuel lay sel ay ki kiɗikki.

Samuel fuu Sol a mul ma Israelna

²⁷ Asi tew ha ki hu haka ɦoŋzina hu li ma Samuel di Sol ana, «Di sa li sunda nam kal ha ki fokoya.» Nam kal ki foko. «Aŋ may ni col ɗaŋ. An ɓakaŋ boyna vi Lonana ha aŋ humumu.»