1 SAMUEL 8 - Boy Lonana

SAMUEL U MULLA Suu Israelna joɓ mulna

¹ Samuel mbuɗ ki maara mbuɗ ni, nam ɦal goryom maŋ suu Israel a kaɓakŋa.

² Gorom ma ŋgolna yam ana Joel, ma kamma yam ana Abiya. Asi ay ni suu kaɓakŋa hu Bersebana.

³ Na may goryom ka tuɗ kay balam sembi. Hurusi ma tini kay begerana, asi vi ɦalla ɦawara, asi hin dlara ɗegeera kiyo.

⁴ Suu basi suu Israelna halaŋ tok tasi tuɗ fi Samuel hu Rama.

⁵ Asi dam ana, «Gola aŋ mbuɗ ki maara, mbuɗ ni goryoŋ ka tuɗ kay balam seŋ oloɗi. Cecem wanda ɗaŋŋi aŋ ɦami mulna a kaami ɓakŋa kami ko njaf suuna halaŋga na.»

⁶ Samuel hurum vi boy ma asi dam ana, «Ҥami mulna a kaami ɓakŋa kamiyana kaɗi.» Samuel hin cen Yawe.

⁷ Yawe di Samuel ana, «Aŋ hum dlara hin daŋgara halaŋ. Asi noyoŋ ka ki ni aŋgi, noyon ki ni anu. Asi ka min ana an ti mulla kasi oloɗi.

⁸ Ko asi li ay hu buu ma an selesi ay ki hu Egiptena day ta ta karami, noyon ki a sun loogi suu daŋŋa. Asi li u aŋŋi ko ndaɗta na lay.

⁹ Cecem wanda ɗaŋŋi aŋ humusi vunusiya. Na may na aŋ hinisi bay neesiɗi. Aŋ haɗasi dla mayra mul ma hin kak kasina hin lasira egesira.»

¹⁰ Samuel hoŋ boy ma Yawe dammana ki dira maŋ suu joɓom ana nam ɦasi mulnana halaŋ halaŋ.

¹¹ Nam di ana, «Gola ni dlara mul ma hin kak kagina hin laɗta. Nam hin yowogi goryogi cukusi a taɗam puspus mamma, a jaŋam kulumi mamsina, asi hin liŋ fok puspus mamma.

¹² Nam hin yowosi tinisi fok suu bolowna a mulina. Tinisi kay suuna dok-vadl may a horokom sene mamma, a feɗem tlena, a minim tlesuu duuna u tlesuu hu puspus mammana.

¹³ Nam hin yowogi gorɓii magisina ko ndal suu saɗ mbul ma hisna eg suunana na, ko ndal suu yi funa u mappanana na.

¹⁴ Nam hin tlagi sene magina, ŋgus gugutlu magira, ŋgus cono magira jivi cocora kiyo. Nam hin tlasi tani ɦasi ki maŋ suu mam suu sunda.

¹⁵ Nam hin yow ki u ii waagina a ɦalla ɦawara u gugutlu magira lay, ɦasi ki maŋ suu ŋgolo mamsina u suu mam suu sunda.

¹⁶ Nam hin yow njufii magi suu sunda u boyogi suu sunda, gorzoŋi magisina u gorɓii magi suu jivi ɦayna u kor magira cukusi ki a lam sunda.

¹⁷ Nam hin yow keŋ ma doogona u yoori magisina. Agi tagira lay ni hin mbuɗ ki mborɓii mamsina.

¹⁸ Hu buu namma ni agi hin tiirigi ko mul namma agi manamma, na may ni hu buu namma ni Yawe hin ka humugi oloɗi.»

¹⁹ Na may ni suuna min ka hum vun Samuelɗi. Asi hoŋ dira ana, «Ҥawaa, ni mul ma ami minimma.

²⁰ Ami tamira may ni hin li ni ko njaf suu hiŋŋa na lay. Mul mamina hin kaami ɓakŋa kamiya, nam hin tuɗ ki fokomiya, tuɗ duuna u ami lay.»

²¹ Samuel hum dlara suuna daɗta halaŋ halaŋ hin hoŋoɗ njaɗta ki hum Yawe.

²² Yawe di Samuel ɗaŋŋi ana, «Humusi vunusiya, ɦasi mulna.» Samuel di suu Israelna ana, «Cukugi tagiya, gegelay tuɗ hu ɦoŋziimma.»