1 SAMUEL 7 - Boy Lonana

¹ Suu Kiriyat-Yerimma mbay hin tli Zanduk Yawera. Asi tuɗuɗ ha hu ziŋ Abinadabma, kolo kay ɦinira asi hin tin goromma Eleazar a gol u Zanduk Yawera.

Israel ti suu Filistinna

² Ay hu buu ma asi tin Zandukka ha ki hu Kiriyat-Yerimma day ni, buuna jak ki bolowo, basara dok-mba'. Hu li ma suu Israelna gijaŋ fi koɗ tara ŋgoo Yawe dagani.

³ Samuel di suu Israelna halaŋ ɗaŋŋi ana, «Lini agi hoŋogi ay eg Yawe ni u hurugi ma dewna ni agi noyogi loogi suu ɦawa suu varagina u loogi Astart kiyo, tinigi hurugi kay Yawe, agi sunummi nam dew nam hin ɓaɗagi ay ki ko suu Filistinna.»

⁴ Goryoŋ Israelna noy loogi suu vi Baalna u loogi Astart kiyo, hin sunni Yawe na dew daŋ.

⁵ Samuel di ana, «Tokogi suu Israelna halaŋ hu Mispa. An hin joɓogi Yawe kagiya.»

⁶ Asi tok tasi ki hu Mispa. Asi go yona ay voom kaŋga fok Yawe. Asi li laara hu buu namma hin di hu li namma ana, «Ami li sulukŋa eg Yawe.» Samuel kaɓakŋa kay goryoŋ Israelna hu Mispa.

⁷ Suu Filistinna hum ana goryoŋ Israelna tok tasi hu Mispa ni muli suu Filistinna yow kolo eg suu Israelna. Goryoŋ Israelna hum na ni asi li ndaana ko suu Filistinna.

⁸ Goryoŋ Israelna di Samuel ana, «Kak vunuŋ dukkira na njeɗi. Aŋ noyomi kiɗi. Yi Yawe Looygina kolo nam suɗuygi ki ko suu Filistinna.»

⁹ Samuel vi goo timii ma ci pona tuna li ɓivun ma ŋgalam ki ŋgalina maŋ Yawe ki u nam halaŋ. Samuel hin yi Yawe kolo kay suu Israelna. Nam Yawe hin humumu.

¹⁰ Doli ɗini hu li ma Samuel li ɓivun ma ŋgalam ki ŋgalina na ni, suu Filistinna ɦuɗ tasi ay a duu u suu Israelna. May hu buu namma Yawe bay suu Filistinna bayra eŋga na haŋgak. Nam mbuɗusi ki ndaana. Asi hin ŋgay ko suu Israelna.

¹¹ Suu Israelna sel ay ki hu Mispa, dik u suu Filistinna u poŋga ta ta jakasi kay zi ma Bet-Karna.

¹² Samuel tli gogoyra tani tiniɗ duk ɦoŋ Mispa u Ҥinira Siina. Nam yaɗ ana Ebenezer, ni ana gogoyra njun tara, kay nam di ana «Yawe njunuygi gak gak tew ki ni tani.»

¹³ Suu Filistinna hoŋ ki kaŋgaa. Asi dok vunusi ka tli voɗta hu mbassa vi suu Israelna oloɗi. Yawe kom hin kay suu Filistinna tinira na ta hu buu ma Samuel lamma halaŋ.

¹⁴ Ҥoŋzi ma suu Filistinna tlam ki ko suu Israelna hin hoŋom ki maŋ Israel. Ekron u Gat Israel ɓaɗ mbassa ay ko suu Filistinna gaw may. Heɓpa hin li duk ɦoŋ suu Amorna u Israel.

¹⁵ Samuel kaɓakŋa kay suu Israelna hu buu ma nam lamma bel.

¹⁶ Nam tuɗ hu basara tew tew poy ɦoŋzi ma Betelna, ma Gilgalna, ma Mispana, nam kaɓakŋa kay suuna hu li namma halaŋ halaŋ.

¹⁷ Nam hin hoŋ ay hu Rama kay ana ziim ka ni huwa. Nam kaɓakŋa kay suu Israelna, min givin ma togolla maŋ Yawe ni huwa.