1 SAMUEL 6 - Boy Lonana

Suu Filistinna hoŋ Zanduk Yawera ki hu Israel

¹ Zanduk Yawera li tilna kay mbassa Filistinda na kiɗisiya.

² Suu Filistinna yi suu li ɓivunna u suu tin garira dasi ana, «Aygi ndak a li me eg Zanduk Yawera ni ge? Takami yal ma ami hin lam a hoŋoɗ hu li ma ndaɗ ay huna.»

³ Asi di ana, «Lini agi hoŋ Zanduk Lona vi suu Israelnara ni, agi hoŋoɗ ɦawa bay va uɗɗi. Agi hal yal ma a miniɗ mini na ɗow. Na ɗaŋŋi agi hin suɗ kiyo, agi hin wi dlara ko Lona ka tli ki kagiɗi kaɗta.»

⁴ Asi di ana, «Va ma ami hin ɦam a miniɗ una ni mege?» Asi di ana, «Kay ndum muli suu Filistinna tuguɗii ɦuluna vadl may, yoo kolom lorra vadl may, kay ana ni tuguɗiira mba kagi halaŋga kay muli magisina may.

⁵ Agi hin tlagi foto tuguɗii ɦulu magira u kolom mayra ɓeŋegi mbas magira, agi hin ŋgaagi Lo ma vi suu Israelna. Kala kom hin mbuɗ ki feɗta kagiya kay loogina kay mbas magira.

⁶ Agi mbuɗugi hurugi diɓilikka ko suu Egiptena u Faraw lira na ni kay mege? Hu li ma nam col a panasina ni asi hin hinisi asi tuɗ kaɗi su?

⁷ Minigi pus pus ma wilina, yowogi mbutlugi tamagina suu gorra usi tuna suu sa ka bay gasi mbal kelesi tu layna. Agi gasi pus pusna usiya, hoŋosi goryosi ay ki hu liisi ma buuna.

⁸ Agi hin tli Zanduk Yawera, tuɗ tiniɗ hu pus pusna. Tlesuu mini u lorra suu agi ɦasi a min dukkana agi cukusi hu zandukka gora tiniɗ keŋeɗu. Agi hiniɗ asi tuɗ u ndaɗu.

⁹ Agi hin wi ɗaŋ ana lini ndaɗ tli voɗta hu mbas maɗtara tin iriɗ ha hu Bet-Semes na ni, ni nam tamba laygi dla cora egeygi ni namu. Li ka naɗi ni aygi hin wi ana ni kom laygi dla cora ka egeygi ni nambi, ni aygi faygi ni dakka.»

¹⁰ Suuna li ko ndaɗta na. Asi yow mbutlugi tamagi suu goryosi ci pona usi tuna mba', gasi pus pusna usiya, hoŋosi goryosi ha ki hu liisi ma buuna may.

¹¹ Asi tin Zanduk Yawera kolo hu pus pusna u zandukka goora may, kolomba miniɗ u lorrara may, foto tuguɗii ɦuluna lasira may.

¹² Mbutlugi tamagi asina tin irisi ha dukŋi na ɗegee hu voɗta Bet-Semessa. Asi tuɗ ha hu voɗ ndaɗta u tiina. Irisi ka es ki bik njufii lay, bik guluɗi lay. Muli suu Filistinna tuɗ ha ŋgoroɗ dagan ta ta tew ki hu ii hakara Bet-Semessa.

¹³ Suu Bet-Semesna feɗ wa blena hu ɦuɗugumba. Tli irisi koloo ni asi wi Zandukka. Asi li furira hu li ma asi waɗ nana.

¹⁴ Tew ki hu sene ma vi Josuwe ma Bet-Semesna may ni puspusna col gaw. Hu li namma gogoyra ŋgolla ka giiya. Asi wak gu puspusna kiyo, yow mbutlugina a li ɓivun ma ŋgalam ki ŋgalina maŋ Yawe.

¹⁵ Suu vi Levina tli Zanduk Yawera ki kaŋga u zandukka gora tlege suu mini u lorra ay huruɗ tini egeɗta. Asi tinisi kolo kay gogoyra ŋgolla. Suu Bet-Semesna li ɓivun ma ŋgalam ki ŋgalina, ŋgaɗ tlena a ɓivunna maŋ Yawe hu buu namma.

¹⁶ Muli suu Filistin suu vadlna wi dla ndaɗta na ni cuk tasi hoŋ hu Ekron hu buu namma gaw.

¹⁷ Gola ni foto tuguɗii ɦulu ma mini u lorra, ma suu Filistinna ɦam maŋ Yawe vadl kay a taɓ dukusi u namba. Suu Asdodna ɦal dew, suu Gazana ɦal dew, suu Askalonna ɦal dew, suu Gatna ɦal dew, suu Ekronna ɦal dew.

¹⁸ Kolomba ko lorra nara kay ndum ɦoŋzi ma Filistinna halaŋ halaŋ kay muli suu vadlna lay, kay ɦoŋzi ma saɓak ma hu zi namma, bay gulumunna kamma lay. Kay li ma gogoyra ŋgolla asi tin Zanduk Yawera kaɗta lay, karam gak lay gogoy ndaɗta ka hu sene ma vi Josuwe ma Bet-Semesna.

¹⁹ Yawe ci suu hu Bet-Semesna kiyo, kay ana asi gol huu Zanduk Yawera. Nam ci njufiina dukusi dok-kiɗisiya. Suuna mbuɗ ki hahawra kay ana Yawe casi ki cocoo.

²⁰ Suu Bet-Semesna di ana, «Sa hin ndak a col fok Yawe Lo ma teteɗna ni gege?» ɗaŋŋi, «Nam hin tli voɗommi kay ge a hiniygira ni ge?»

²¹ Asi cuk suuna vun sunda eg suu Kiriyat-Yerimma dasi ana, «Suu Filistinna hoŋ Zanduk Yawera ay wa. Mbaagi ay tlaɗ ha vo varagiya.»