1 SAMUEL 5 - Boy Lonana

Zanduk Lonara vo vi suu Filistinna

¹ Suu Filistinna tli gasi Zanduk Lonara kiyo. Asi tlaɗ ay hu Ebenezer ta ta Asdod.

² Suu Filistinna tli Zanduk Lonara ay hu zi ma vi Dagonna, hin tiniɗ ha ki keŋ Dagon.

³ Suu Asdodna col kolo siw maɗii na feɗet, gola ni Dagon ndi ki kaŋga duk ndaŋgara fok Zanduk Yawera. Asi tli Dagon hoŋoɗ kolo balamaɗu.

⁴ Asi col kolo siw maɗii na feɗet, gola ni Dagon ndi ki kaŋga fok Zanduk Yawera. Yam Dagon u koɗ jak ki ŋgaɗiya, ki cukira fun zira. Va vi Dagon li ka hin ka hu li namma kala.

⁵ Gola ni kay ndaɗta karam gak lay ni suu li ɓivun Dagonna hu Asdod a kal kurufu hu zira ko tasi u suuna ni ka tin sesi kay vun ziŋ Dagondaɗi.

⁶ Yawe tak saɓak mamma ki eg suu Asdodna, ɓeŋ tlena ki varasi cocoo. Nam gasi tuguɗii ɦuluna kasiya, Asdod u ndaŋga maɗta.

⁷ Hu li ma suu Asdodna wi dlara lasira na ni asi di ana, «Ka Zanduk Lona vi suu Israelnara li varaygiɗi kay ana ndaɗ ɓeŋem hurum egeygi lay eg Dagon looygina lay.»

⁸ Asi yi muli suu Filistinna halaŋ tokosi varasi dasi ana, «Aygi ndak li Zanduk Lona vi suu Israelnara ni nanage?» Asi hoŋ dira ana, «Hoŋoygi Zanduk Lona vi suu Israelnara ha ki hu Gat.» Asi hin jok u Zanduk Lona vi suu Israelnara kiyo.

⁹ Doli ɗini ŋgoo dagan tlira asi tlaɗ kira lay ni Yawe kom ka kay ɦoŋzi namma. Suuna mbuɗ ki ndaana cocoo. Yawe ci kemba u suu ŋgolo suu hu zi nammana kiyo. Nam mbaasi tuguɗii ɦuluna kasiya.

¹⁰ Asi sun Zanduk Lonara ha ki hu Ekron. Na may ni hu li ma Zanduk Lonara tew ha ki hu Ekronna, suu Ekronna yi kolo u delesi eŋga ana, «Asi jokoygi Zanduk Lona vi suu Israelnara ay varaygi a caygi kira wa, an u suu mansina.»

¹¹ Asi yi muli suu Filistinna halaŋ tok eg tasiya. Asi di ana, «Hoŋoygi Zanduk Lona tavi suu Israelnara. Ndaɗ hoŋ hu li ma ndaɗ ay huna, ka ndaɗ can kiɗi, an u suu mansina.» Gasi suuna mbuɗ ki ndaana hu ɦoŋzi namma, hal a ba tasi ki ko lassa Lona ka lasasira.

¹² Suu bay miɗ tuna, tuguɗii ɦuluna vasiya, tii masi ma hahawra tuɗ ta ta tew ki kolo huulona.