1 SAMUEL 4 - Boy Lonana

¹ Samuel hin ɓak boy mamma ki maŋ suu Israelna halaŋ. Israel tuɗ duuna u suu Filistinna, ndak kak eg Ebenezer na tok may. Suu Filistinna mol eg Afek na tok may.

Suu Filistinna tli Zandukka Galamba

² Suu Filistinna min tasi ki kaŋga fok suu Israelna. Duuna mun ha fokŋi muni na ɗow ɗow. Suu Filistinna poŋ suu Israelna. Hu li ma duuna, hu li ma asi ŋgaf tasi huna, asi ci suuna ki ko va ma buɓ buɓ fiɗi na.

³ Suuna hoŋ hu kaŋ masina. Suu basi suu Israelna di ana, «Ni kay me Yawe hin suu Filistinna poŋoygi karam na nige? Tuɗuygi halaygi Zandukka Galamba vi Yawera ha hu Silo. Hoŋoygira ay dukuygiya a ndaɗ suɗuygi ki ko suu babali maygisina.»

⁴ Suuna sun suuna hu Silo. Asi hoŋ Zandukka Galamba vi Yawe ma Saɓakŋa Kom Belna aya, tiniɗ kolo kay Serubimma. Hu li namma tok eg Zandukka Galamba vi Lonara goryoŋ Heli suu mbana ka huwa, Hofni u Pinhas.

⁵ Doli ɗini hu buu ma Zandukka Galamba vi Yawera mba hu kaŋŋa may ni suu Israelna halaŋ mbuɗ ki saɓakŋa, tum soora, ndaŋgara dlaki lay.

⁶ Suu Filistinna humusi delesi mbuɗ yi ay saɓakŋa na ni, asi di ana, «Suu Hebrena yi kolo u delesi eŋga hu kaŋŋa na ni ana mege?» Asi wi ana Zanduk Yawera tew ki usi hu kaŋŋa wa.

⁷ Suu Filistinna mbuɗ ndaana kay asi di ana, «Lona mba ki hu kaŋŋa wa.» Asi di ana, «Dla cora faygi wa kay ana dlara na li ay ka hu li ma jaki fok jewnaɗi.

⁸ Dla cora faygi wa. Sa hin ɓaɗaygi ay ki ko Lo ma saɓak nammana ni gege? Ni Lo ma poŋ suu Egiptena ay hu fulla na ta tana ɗi su?

⁹ Soogi ugiya, ndak fun tagi a suu warna suu Filistinna kaɗi ni agi hin mbuɗ a sun suu Hebrena ko asi tasira li ay mborɓogi magisinara na may. Ndak fun tagi a suu warna, duurugiya.»

¹⁰ Suu Filistinna gijaŋ duuna. Asi poŋ suu Israelna, gegelay ndi liŋŋa tuɗ ki hu mbutluɓ mamma. Yara li ŋgolla ɦay. Suu Israel suu duuna miɗ ki ni buɓ buɓ hindi.

¹¹ Zanduk Lonara asi tlaɗu. Goryoŋ Heli suu mbana Hofni u Pinhas miɗ kiyo.

Mul ma li Ɓivunna, Heli, miɗ kiyo

¹² Sa vi Benjaminna tuɗ fun duuna u liŋŋa ta ta tew ki hu Silo hu buu namma gaw may, baraw ma egemma ki haariya, ndaŋgara kay yam na kufuruk may.

¹³ Hu li ma nam mba na ni, nam fi Heli kakira kay dlam mamba vun voɗta irim tinira na ta, kay ana hurum li ndaana coco kay Zanduk Lonara. Sana mbay njaɗ boy namma ki hu ɦoŋzina. Suu hu hoŋzinana tum tiina.

¹⁴ Heli hum tiina na ni di ana, «Vun ma suuna lam wanna ummi ana mege?» Sa namma mbay u liŋŋa njaɗ boy namma maŋ Heli.

¹⁵ Heli basaɗam tew ki dok-tleeŋe yam kalavandi. Irim zogol ki kam na malal ka ndak a wi oloɗi.

¹⁶ Sana di Heli ana, «Anni sa col ay fun duunana. An pii ay ki fun duuna ni karam gak gak.» Heli di ana, «Ni me lige, goronna?»

¹⁷ Sa vun sunda hoŋom dira ana, «Israel liŋ ko suu Filistinna wa. Suuna viɗ tlegeyesi ki ŋgol coco lay. Olo, goryoŋ suu mbana miɗ kiyo, Hofni u Pinhas. Zanduk Lonara asi tlaɗ ki lay.»

¹⁸ Hu li ma nam hum sem Zanduk Lonara na ni, Heli puk ki kaŋga kay dlam mamba ii ko ma vun zira na. Nam peŋ vevee delem kiyo. Nam hin miɗa. Ni ana sana ki mbuɗi maara, nek cocoo. Nam kaɓakŋa kay suu Israelna ni basara dok-fiɗi.

¹⁹ Kunumba, caŋ goromma Pinhassa, ki ndakira u wiina a vuɗta. Hu li ma ndaɗ hum ana asi tli Zanduk Lonara wa, hum dla maɗ kunuɗna u njufuɗ may ni kak kaŋga a vuɗta, kay ana huruɗ gaɗ jaŋ tira.

²⁰ Hu li ma ndaɗ ay kay maɗna na ni, ndarayaɗ suu ay egeɗna daɗ ana, «Ndak wi ki kak jiviya, ndak vuɗ ni go njufna.» Ndaɗ hoŋ di kaɗi, saa ka kay boy nammaɗi.

²¹ Ndaɗ tin sem goroɗna ana Ikabod ni ana bibiŋilla ka oloɗi. «Ndaɗ di ana bibiŋilla ki bulumi hu Israel.» Ndaɗ saa ni kay tlira tli Zanduk Lonara may, maɗ ma vi kunuɗna na u ma vi njufuɗna may.

²² Ndaɗ di ana, «Bibiŋilla ki bulumi hu Israel» ni kay ana Zanduk Lonara asi tlaɗ kiyo.