1 SAMUEL 31 - Boy Lonana

Yara laɗ hu Gilboara, miɗ ma Sol miɗna

¹ Suu Filistinna duu u Israel. Suu Israelna liŋ ko suu Filistinna. Suu ki miɗina hin ki cukira kay ɦinira Gilboara.

² Suu Filistinna cuɗ sem gi Sol u goryomu. Asi ci Jonatan kiyo, Abinadab u Malki-Suwa, goryoŋ Solna,

³ nek duuna hoŋ ndi kay Sol. Suu duu u mbuurura famu. Asi wam tam dlak coco ko ndaana.

⁴ Sol di gogoo mam ma sunda ana, «Tli ŋgew maŋŋa, can kiyo, kay suu ɗiwisi ka cawiɗina mbay can asi a pananɗi.» May gogoo mam ma sunda min kaɗi kay ana nam mbuɗ ki ndaana cocoo. Na ɗaŋŋi Sol paɗ ŋgew mamma, gi tam funumu.

⁵ Gogoo mam ma sunda wi ana Sol miɗ ki wa ni, gi tam fun ŋgew mamma ci tam ki um may.

⁶ Sol, goryom suu hindina, saam ma sunda u suu mam suu duuna halaŋ miɗ ki hu buu namma.

⁷ Wi ana suu Israelna njay ki wa may, Sol u goryom miɗ ki wa may ni, suu Israel suu ha ki hu ɦuɗugumba ii ko hiŋŋana u suu ha ki hu ii lumma Yurdanna hiŋŋa na hin ɦoŋzi masina, yow liŋŋa. Suu Filistinna mbay kak ki hu liisina.

⁸ Vin wanni suu Filistinna mbay yow tlesuu vi suu miɗinana, asi fi maɗ Sol u goryom suu hindina kolo kay ɦinira Gilboara.

⁹ Asi ŋgaɗ yam Sol, yowom ɓagi mamma ki may. Asi njay boy namma ki hu mbassa Filistinda, ɓak boy namma ki hu zira vi fuli masina lay, ki maŋ suuna lay.

¹⁰ Asi cuk ɓagi ma vi Solna ki hu zira vi ful Astart, ɓalam ki kolo pay gulumun ma Bet-Seanna.

¹¹ Kay boy namma suu hu Yabes ta Galaaɗta hum dla mayra suu Filistinna laɗ eg Solla.

¹² Suu ɦiŋ cocona cuk tasi hu voɗta tuɗ njeŋge paɗ Sol u goryom ay ki eg gulumun ma Bet-Seanna. Asi hoŋ ay hu Yabes may ni hin ŋgalasi kiyo.

¹³ Asi varasi sokosi hin tosom u ŋgus cinda Yabessa. Asi hin li laara kam buuna kiɗisiya olo.