1 SAMUEL 30 - Boy Lonana

Siklag asi ɦurumuɗ kiyo. David dik u suu Amalekŋa

¹ Doli ɗini hu li ma David u suu mamsina tew ki hu Siklag, suu Amalekŋa min tasi ka ki a duuna hu Negeb ma Yerusalem, hu Siklag lay. Asi pali Siklag kiyo, asi ŋgalaɗ kiyo.

² Asi yow boyogina, kemba gorira, suu ŋgolona cukusi daŋgayna may sa dew lay ni asi cam ka kiɗi. Asi mbaasi ay may hin jak u asiya.

³ Hu li ma David u suu mamsina tew hu ɦoŋzinana asi wi ana nam ki ŋgaliya, boyogosi may, goryosi suu njufiina u suu gorɓiina asi yowosiya.

⁴ David u suu umma mun ki tiina asi tii ta ta saɓakasi ma tiina ka oloɗi.

⁵ Boyogi suu vi David suu mbana asi yowosiya, Ahinoam ta Jizreella u Abigal ta caŋ Nabal ma Karmelna may.

⁶ David mbuɗ ki hahaw cocoo kay ana suuna ɓak ana hin cam ki u gogoyra. Gegelay ni hurum haɗ cocoo, saa kay goryom suu njufiina u suu gorɓiina. Na may David hin fi so ura ni u Yawe, Loomma.

⁷ David di mul ma li ɓivunna, Abiyatar ma goŋ Ahimelekŋa ana, «Aŋ yowon efodna ay na yowge.» Abiyatar yow baraw namma ay maŋ David.

⁸ David joɓ Yawe ana, «Lini an cuɗ u suu asina ni an ndak a fasi duk su?» Yawe dam ana, «Tuɗ cuɗusi usiya, aŋ hin fasi duku, aŋ hin buɗ suu maŋsina ay kiyo.»

⁹ David tuɗ u suuna um kis kis karkiya. Asi tew ha ki fun lum ma Besor. Suu hiŋŋa hin ka kiyo.

¹⁰ David jak fok a cuɗusi usira u suuna um kis kis fiɗi. Suu kis kis mba' suu hiŋŋa hin ha eg liisiya, ki loɓi cocoo ka ndak a ɗiŋ lum ma Besorna kiɗi.

¹¹ Asi ŋgaf sa ma Egiptena hu fulla. Asi vam tuɗum ha maŋ David. Asi ɦam mappana a tira, yona a cira may.

¹² Asi ɦam komnjoɗi tulumma, ɦam dee gugutlura sooyra, nam tasi ki ti ni musukum hin mba hurumu. Col ay hu buuna hindi, njeŋgera hindi may, ni nam ti va kaɗi lay, ci yo kaɗi lay.

¹³ David dam ana, «Aŋŋi goŋ ge nage? Aŋ col ay ni arage?» Nam di ana, «Anni goozoŋ ma Egiptena, mbaɓuna vi sa ma Amalek ma dew. Malanna noyon ka ki ni kay an tuguɗiiyo, karam buuna ki ni hindi.

¹⁴ Ami ni suu min tami a duuna hu li ma ii mbayaw suu Keretna, hu li ma vi Yudana, hu li ma ii mbayawna vi Kaleb, ami ŋgal Siklag ki lay.»

¹⁵ David dam ana, «Na ni aŋ ndak a tinin eg suu asina su?» Nam hoŋ dira ana, «Aŋ suu taŋ ki u Lona ana aŋ ka can kiɗi, aŋ hin ka hoŋon ko malannaɗi, an hin tiniŋ eg suu asina.»

David ci suu Amalekŋa kiyo

¹⁶ Nam tuɗ tin David ɗaŋ. Suu Amalekŋa njay kosi ki hu mbassa, ti may, ci may, li furira ŋgolla u tlesuu asi yowosi ay hu jo suu Filistinna, hu mbassa vi Yudara.

¹⁷ David kiriɓisi ki col ay maɗii feɗet day ta ta vin fiɗigiya. Sa dew lay ni suɗ kaɗi, hol ni gorzoŋŋi suu kis kis fiɗi suu ful kay jamballana, suɗ tasi ni asiya.

¹⁸ David suɗ tlesuu suu Amalekŋa yowosi ayna ki halaŋ. Nam suɗ boyogom suu mbana ki lay.

¹⁹ Sa dew lay ni ba ka kiɗi, duk kemba, suu ŋgolona, goryosi suu njufiina, suu gorɓiina, tlesuu asi yowosi ay hu jonana halaŋŋi va viɗ ka kiɗi. David hoŋosi ki halaŋ.

²⁰ David yow yoori suu gorina u suu ŋgolona halaŋ. Suu tuɗ fok yoori asina a takasi voɗtana di ana, «Gola, ni jo ma vi Davidɗina.»

²¹ David tew ki tok eg suu kis kis mba' suu loɓ ki cocoo ka tuɗ u David suu hinisi ka ki fun mbo lumma Besorna. Asi sel ay ki a ŋgaf David u suu mam suu duuna. David ɦuɗ tam ha u suu mam suu duuna hin gasi deɓpa.

²² Na ɗaŋŋi duk suu tuɗ ay u Davidna, suu hurusi cona u suu sunusi kaɗina ɓak kolo u delesi eŋga di ana, «Asi tuɗ ay ka u aygiɗi ni, aygi hin ka ɦasi tlesuu aygi yowosi ay hu jonanaɗi, hin ɦasi boyogosi u goryosi ni asi doy hol.» Asi yowosi yow ni, cuk tasiya.

²³ Na may David di ana, «Agi hin ka a li naɗi, gorsenna, u va ma Yawe ɦayginana. Nam sa goloygina ɦaygi suu duu suu gaygijaŋaygi a duunana ki koygina.

²⁴ Sa hin humugi hu dla ndaɗtana ni ge ɗaŋge? Va ma sa ay fun duuna famma wanni, va ma sa hin ka eg tlegenana wanni, asi hin ɓorowosi ni ko tasi dew.»

²⁵ Col ay hu buu namma gaw ni, gaɗta u dlara basira tinisi kay suu Israelna ta ta karami.

²⁶ Tew ki hu Siklag may ni, David sun tlesuu yowosi ay hu jonana ha maŋ suu basi suu vi Yudana suu banayamma hin jokosi vunna ha ana, «Gola, wanni tlesuu an a ɦagi ŋgara u asi suu yowosi ay hu jona vi suu babalira u Yawena.»

²⁷ Nam sun tlena maŋ suu Betelna, maŋ suu hu ii mbayaw Ramotna, maŋ suu Yattirna lay,

²⁸ maŋ suu Aroerna, maŋ suu Sefemotna, maŋ suu Estemoana,

²⁹ maŋ suu Rakalna, maŋ suu hu ɦoŋzi ma Yerameelna, maŋ suu hu ɦoŋzi ma Kenna,

³⁰ maŋ suu Hormana, maŋ suu Bor-Azanna, maŋ suu Atakŋa,

³¹ maŋ suu Hebronna, ki aragelay hu li ma David u suu mamsina tay sesi huna.