1 SAMUEL 3 - Boy Lonana

Lona man Samuel a sa jok vun Lona

¹ Gogoona Samuel sun Yawe fok Heli. Boyna vi Yawe ay ka ki zuliɗi, haw coco hu buu namma. Dlara a tak taɗ ki ii suunara loɓ coco lay.

² Hu buu namma ni Heli buuri kaŋga ni hu liim ma dadayna. Irim gijaŋ ko vam senna na. Nam ka wi oloɗi.

³ Pindilla vi Lonara ka ki tewi tuɗi. Samuel ka buuri hu Ziŋ Yawera hu li ma Zanduk Lonara huna.

⁴ Yawe yi Samuel. Nam hoŋom dira ana, «An wanni.»

⁵ Nam tuɗ u liŋŋa eg Heli dam ana, «An wanni kay ana aŋ yanu.» Nam hoŋom dira ana, «An yaŋ kaɗi. Hoŋ buu kaŋgaa.» Nam Samuel tuɗ buu kaŋgaa.

⁶ Yawe hin yi Samuel olo. Samuel col kolo tuɗ eg Heli dam ana, «An wanni kay ana aŋ yanu.» Nam Heli hoŋom dira ana, «An yaŋ kaɗi, goronna. Hoŋ buu kaŋgaa.»

⁷ Samuel wi Yawe ka tuɗi. Yawe takam boy mamma ka ki tuɗi.

⁸ Yawe yi Samuel olo a yamba hindira. Nam col kolo tuɗ eg Heli. Nam di Heli ana, «An wanni kay ana aŋ yanu.» Heli wi ki ɗaŋŋi ana Yawe yi gogoona ni namu.

⁹ Heli di Samuel ana, «Hoŋ buu kaŋgaa. Lini nam yaŋwa ni aŋ hin dam ana, ɓak aya, Yawe, saaŋ ma sunda ka humuŋu.» Samuel hin tuɗ buu kaŋga hu liim ma dadayna.

¹⁰ Yawe mbay col ki fokomu. Nam yam ko nam yam fok jewra na. «Samuel, Samuel.» Samuel dam ana, «Ɓak aya, saaŋ ma sunda ka humuŋu.»

¹¹ Yawe di Samuel ana, «Gola an min tak dla taa ki eg Israel a koo hum gegelay ma hin hum ɓakŋana.

¹² Hu buu namma wanni an hin tak dlara an daɗ eg Heli kay ziimba ki fun taɗ na halaŋ.

¹³ An dam ki ana an kaɓakŋa kay ziimmi kay coomba. Nam wi ana goryom ŋgul Lona na lay ni nam yalasi kaɗi.

¹⁴ Ni kay ndaɗta an suu tan ki kay ziŋ Helina, va hin a bulum cora ziŋ Helina laɗta ki na ɗow ni ka oloɗi, ɓivunna ɗowba ɦalla ɦawara lay.»

¹⁵ Samuel hin kaŋga buuri ta ta maɗiiya. Nam hin mal vun ziŋ Yawera ki ɗaŋ. Samuel li ndaana kay a jok boy namma ki maŋ Heli.

¹⁶ Heli yi Samuel dam ana, «Samuel, goronna.» Nam Samuel dam ana, «An wanni.»

¹⁷ Heli dam ana, «Boy ma nam daŋŋana ni maanage? An joɓoŋŋi joɓiya aŋ ŋgayanna konɗi. Lini aŋ ŋgayan boy maa ki duk boy ma nam daŋŋana wa ni ko Lona laŋ dla wanda egeŋu, laŋ dla hiŋga egeŋ lay.»

¹⁸ Na ɗaŋŋi Samuel dam dlara ki halaŋ halaŋ ŋgay boy maa ka ki dewɗi lay. Nam Heli di ana, «Nammi Yawe, ko nam li dlara hurum miniɗta.»

¹⁹ Samuel wulla. Yawe ka u namu ka hin a boy mam maa dew lay ndi ki kaŋgaɗi.

²⁰ Suu Israelna halaŋ col ay hu Dan ta ta hu Berseba wi ana Samuel fi saɓakŋa mbuɗ ki sa jok vun Lona vi Yawe wa.

²¹ Yawe tuɗ fok u takka tak tam irisira hu Silo. Yawe gasi daŋ may ni tak tam ki ii Samuel hu Silo u boyna vi Yawena.