1 SAMUEL 29 - Boy Lonana

Suu Filistinna dik David kiyo

¹ Suu Filistinna tok suu masi suu duuna eg tasi halaŋ halaŋ hu Afek. Suu Israelna mol tok eg zul yo ma hu Jizreelna.

² Suu ŋgolo suu vi suu Filistinna ŋguy fok suu kis kisna may, fok suu buɓ buɓma may. David u suu mamsina ŋguy dagan u Akis ni asiya.

³ Muli suu vi suu Filistinna di ana, «Suu Hebre asina ni me ko ge?» Akis di muli suu vi suu Filistinna ana, «Na may ni David, sa sunda vi Sol, mul ma Israelna. Gola, basara ki ni dew kala, mba' kala, nam ka ki u anu, an fi va ma a yalam kam kaɗi ay hu buu ma nam taɓ tam ay u anna day ta ta karami.»

⁴ Muli suu vi suu Filistinna mbuɗ yara ki eg Akis dam ana, «Dik sa namma kiyo. Nam hoŋ hu li ma aŋ fam ay huna. Ka nam tuɗ umi hu li ma duunaɗi, ka ami mbuɗum ki a saami ma babalira hu li ma duunaɗi. Sa namma hin warakŋi u me a heɓ huu malamma ni ge, hin li ni a yam suu ca wanna kala?»

⁵ Ka ni David ma asi gi soolla u nam di ana, «Sol ci suu buɓma, may David ci suu buɓ buɓ bulumina maynaɗi su?»

⁶ Akis yi David dam ana, «U saɓakŋa vi Yawena, aŋŋi sa ma ɗegeena. An furi coco a waŋ aŋ tuɗ a kal un a duunara, kay ana an fi dla co ka egeŋgi ay hu buu ma aŋ mbay varanna ta ta karami. May muli suu daŋŋa ka furi kaŋgi.

⁷ Aŋ hoŋ ɗaŋ, tuɗ u heɓpa. Ko ndaɗta na ni aŋ hin ka li va ma ɓeŋ huu muli suu Filistinna oloɗi.»

⁸ David di Akis ana, «Va ma an lamma ni me ɗaŋge? Va ma aŋ fam co eg saaŋ ma sunda ay hu buu ma an gi tan fokoŋ a sundana ta ta karamma ni me ka an mbay duu suu babali suu vi malanna mulnanaɗi ni mege?»

⁹ Akis hoŋ dira maŋ David ana, «An wiya, gasi an furi kaŋ ko sa sunda huulona na. Na may muli suu vi suu Filistinna di ana, nam ka tuɗ umi hu li ma duunaɗi.

¹⁰ Na ɗaŋŋi aŋ col kolo maɗii na feɗet u suu sun suu vi malaŋŋa suu ay uŋŋa lay. Agi cologi kolo maɗii na feɗet hu li ma lina fo ki wa ni agi tuɗugiya.»

¹¹ David col kolo toŋgo zak nam u suu mamsina a tuɗ u maɗiira gaw, hoŋ hu mbassa vi suu Filistinna. Na ɗaŋŋi suu Filistinna tuɗ Jizreel gaw.