1 SAMUEL 28 - Boy Lonana

Sol tuɗ ay fun cara joɓ fulina Ein-Dor

¹ Hu buu namma ni suu Filistinna tok suu masi suu duuna ki eg tasi a tuɗ duuna u suu Israelna. Akis di David ana, «Aŋ wi kaŋ ana aŋ hin tuɗ u an fun duuna, aŋ u suu maŋsina.»

² David di Akis ana, «Na ɗaŋŋi aŋ hin wi dlara saaŋ ma sunda hin laɗta u taŋga.» Akis di David ana, «Na ɗaŋŋi an hin mbuɗuŋ ki a saan ma golon yanna a fafaɗta.»

³ Doli ɗini Samuel ki ni miɗiya. Suu Israelna halaŋ tiirimu, lam doromu, tosom ki hu Rama hu ɦoŋzi mamma. Sol hin bulum dlara joɓ fulina ki hu mbassa.

⁴ Suu Filistinna tok tasi mbay mol tasi ki hu Sunem. Sol tok suu Israelna halaŋ, asi mol ki hu Gilboa.

⁵ Sol wi kaa ma vi suu Filistinna. Nam mbuɗ ki ndaana, tam dlak ki cocoo.

⁶ Sol joɓ Yawe, may Yawe hoŋom dira kaɗi, ka u doyra diraɗi lay, ka u Urimɓi lay, ka fun suu jok vun Lonaɗi lay.

⁷ Sol di suu mam suu sunda ana, «Halangi cara joɓ fulina. An tuɗ varaɗ joɓpa.» Suu mam suu sunda hoŋom dira ana, «Cara joɓ fulina ha ka hu Ein-Dor.»

⁸ Sol mbuɗ tam ki, fok barawi suu egemma ki tuɗ u suuna um mba'. Asi tew ha ki vi cara ni njeŋgee. Sol daɗ ana, «Joɓon fuli maksina aya, takan sa ma an hin ɓakak ha kamma ay kiyo.»

⁹ Cara dam ana, «Gola, aŋ wi dlara Sol laɗta u taŋga lay. Nam bulum dlara joɓpa ki hu mbassa. Ni kay me aŋ gunun daw ma can kina kaŋga fokonni ge?»

¹⁰ Sol suu tam u Yawe ana, «U saɓakŋa vi Yawena, va ma co ka lak hu dla ndaɗtaɗi. Nam di na.»

¹¹ Cara di ana, «Sa an joɓoŋ ha kamma ni gege?» Nam di ana, «Joɓon ay kay Samuel.»

¹² Cara wi Samuel, yi kolo u deleɗ eŋga. Cara di Sol ana, «Aŋ ganan yanni kay mege? Aŋŋi Solɗi su?»

¹³ Mulna daɗ ana, «Li ndaaɗi, may va ma ndak wamma ni mege?» Cara di Sol ana, «An wi lo ma dew kal ay ki kolo kay ndaŋgara.»

¹⁴ Nam daɗ ana, «Sa namma tam nanage?» Ndaɗ dam ana, «Sa maana kal ay ki kolo ni namu. Baraw koɓoɗta cuki egemu.» Sol wi ana ni Samuel. Nam cok yam kaŋga duk ndaŋgara, goɓ kaŋgaa.

¹⁵ Samuel di Sol ana, «Aŋ loɓon tan a an kal ay ki kolo ni kay mege?» Sol di ana, «An u saara ŋgolla kan cocoo. Suu Filistinna ka duu u anu. Lona ɦuɗ tam ki egen na day, nam hoŋon dira ka oloɗi lay, ka fun suu jok vun Lonaɗi lay, ka u doyra diraɗi lay. An yaŋ ay ni kay a aŋ takan dlara an hin laɗta.»

¹⁶ Samuel di ana, «Lini Yawe ɦuɗ tam ki egeŋ day, mbuɗ ki egeŋ cora wa ni aŋ hin joɓonni kay mege?»

¹⁷ Yawe li ni ko nam di dla ndaɗta ki fununda na. Yawe ɓaɗaŋ mulla ki koŋu. Nam hin ɦaɗ ki maŋ sa daŋŋa, maŋ David.

¹⁸ Ni kay ana aŋ hum vun Yawe kaɗi, aŋ tinim yaamba ka kay Amalek, Yawe karam laŋ ki ni ko ndaɗta na may.

¹⁹ Yawe hin ɦal suu Israelna ki ko suu Filistinna ni uŋ aŋu. Agi u goryoŋ vin wanni hin mbay unu, suu duu suu Israelna u tasira, Yawe hin ɦasi ki ko suu Filistinna.

²⁰ Na zak gaw ni Sol ndi ki kaŋga duk ndaŋgara u fegemu, mbuɗ ki ndaana ko dlara Samuel daɗta. Olo saɓakam kaɗi, kay ana nam ti va kaɗi faali lay, njeŋge lay.

²¹ Cara mbay eg Sol wam nam hurum ki ɓeŋiya. Ndaɗ dam ana, «Gola mbaɓu maŋga humuŋ wa, an hal gin a ba iiri manda kiyo, na may an hum u gaɗta aŋ handara.

²² Cecem wanda ɗaŋŋi aŋ may ni hum vun mbaɓu maŋga haa. Hinin an ɦaŋ ay nus mappa na nde aŋ tiya, na wanni aŋ hin mbuɗ saɓak nde hu li ma aŋ hin tli voɗ maŋga koŋŋa.»

²³ Nam min kaɗi, di ana, «An hin ka ti vaɗi.» Na may suu mam suu sunda dokom vunum cocoo, cara lay, nam hin humusi vunusiya. Nam col ki kolo duk ndaŋgara, kak kay gu ma kak ma fiyekŋa.

²⁴ Cara vi goo mbutl ma ɗoorina koɗ dew. Ndaɗ ŋgaɗam toŋgo na zak gaw. Ndaɗ yow fuɗta yarasaɗu, zal mappa ma bay kuffa.

²⁵ Ndaɗ ɦal tina maŋ Sol u suu mam suu sunda, asi tiya. Olo asi hin cuk tasi hu voɗta hoŋi duk njeŋge ndaɗta gaw.