1 SAMUEL 27 - Boy Lonana

David ŋgay tam ki vi suu Filistinna

¹ David ɓak tam hurum ana, «Na lay ni buu dew ni Sol hin can kiyo. Va ma an a lam jivina kaɗi. Mariyaɗ ni an ŋgay tan ki hu mbassa vi suu Filistinna, suɗ tanu. Na ɗaŋŋi Sol hin ka min a halan hu mbassa Israella na halaŋŋi, an hin suɗ ki komu.»

² David gi tam voɗo u suuna um kis kis karkiya a tinimba. Nam tli ha vi Akis ma goŋ Maok, mul ma Gatna.

³ David kak eg Akis hu Gat. Nam u suu mamsina, gegelay u suu mamsina. David u boyogom suu mbana Ahinoam ta Jizreella u Abigal ta caŋ Nabal ma Karmelna.

⁴ Asi ne yam Sol ana David pii kom tuɗ Gat wa. Sol seŋ halla halamba ni na gaw.

⁵ David di Akis ana, «Lini aŋ jivi u anu ni asi ɦan ɦoŋzi maa kon nde an hin kak huwa. Ni kay me saaŋ ma sunda hin kak egeŋ tok hu ɦoŋzi ma mulla ni ge?»

⁶ Akis ɦam Siklag toŋgo zak gaw. Ni kay ndaɗta Siklag hin ki maŋ muli suu vi Yudana ta ta karami.

⁷ David kak ay hu fulla Filistinda ni ii basara dew u til fiɗi.

⁸ David u suu mamsina yow kolo duuna vi suu Gesurna, suu Girzna, suu Amalekŋa kay ana suu asina ni suu ka hu mbas ndaɗta day day ha eg Kur ta ta tew ha ki hu mbassa Egiptera.

⁹ David ci suuna kiyo, ka hin sa njuf iiriɗi lay, caɗi lay, yow tlesuu gorina u suu ŋgolona, korra, jumballa, u barawina lay. Hu hoŋ mamba ayra nam tli ay vo vi Akis.

¹⁰ Hu li ma Akis di ana, «Agi duu ay karammi arage?» ni David hoŋ dira ana, «Hu Negeb ma vi Yudana.» ɗowba «U Negeb ma vi suu Yerahmena.» ɗowba «Hu Negeb ma vi suu Kenna.»

¹¹ David ka hin a hoŋ sa ay hu Gat iiriɗi, sa njufɗi lay, caɗi lay. U ndaana nam di tam ana, u ɓakŋa gola asi gaygi uygi kiyo. David li ni ko ndaɗta na, tuɗ mamba hu li ma nam kak ay hu mbassa Filistinda ni na.

¹² Akis wi David ki jiviya. Nam ɓak tam ana, «David mbuɗ dlaamba ki loɓma coco eg suu mam suu Israelna. Nam hin li a saan ma sunda a fafaɗta.»