1 SAMUEL 26 - Boy Lonana

Hu fulla Ziffa, David suɗ Sol ki olo

¹ Suu Zifna mbay fi Sol hu Gibea. Asi dam ana, «Na ni David ŋgay ka ki kolo kay ɦinira Hakilara ta eg fulla tokaɗi su?»

² Sol gi tam hu voɗta tuɗ hu fulla Ziffa u suuna um buɓ buɓ hindi suu saɓak suu Israelna a hal David hu fulla Ziffa.

³ Sol kak u suu mamsina kay ɦinira Hakilara tok eg gullara, tok eg voɗta layra. David kak hu fulla. Nam wi ana Sol mbay a dikim um hu fulla.

⁴ Nam sun suu hal u dlara ay may ni, David wi ki ana gasi daŋ may Sol mbaya.

⁵ David gi tam hu voɗta tew ki hu li ma Sol kak huna. David wi li ma Sol u Abner, ma goŋ Ner, ma ŋgolla vi asgaa mamsinana, buu huna. Sol buu ni hu li ma dukŋa, suu mam suu duuna ŋguy ki kam may.

⁶ David ɓak boyna di Ahimelek ma Hitna maŋ Abisay goŋ Seruya ma wayaŋ Joabma ana, «Sa min a tuɗ u an ta ta eg Sol hu kaŋŋana ni gege?» Abisay di ana, «An hin tuɗ u aŋu.»

⁷ David u Abisay tew ki eg suu duuna njeŋgee, hu li namma ni Sol ki kaŋga buuriya, buuri senna, saɓ mamba gi kaŋga u yam may. Abner u suu duuna ŋguy kam buuri senna may.

⁸ Abisay di David ana, «Karam Lona ɦaŋ saaŋ ma babalira ki koŋ wa. Ҥan voɗta an ɓalam ki kaŋga kay ndaŋgara u saɓ manda ɗaŋ. An hin ka cokom a yanda mbara oloɗi.»

⁹ David di Abisay ana, «Cam kiɗi. Sa ma hin tin kom eg sa Yawe fuurumma, sa hin ka gam daŋgayɗina ni gege?»

¹⁰ David di ana, «U saɓakŋa vi Yawena, Yawe ni sa ma hin waɗamma, hu li ma faɗamba miɗna mbara ɗowba hu li ma nam hin mbay duuna a miɗ ki huna.

¹¹ Ko Yawe lan dla cora egenu lini an tin kon eg sa ma Yawe fuurumma. Tli saɓ mayra kaŋga u yamba u guura yona huruɗta, tuɗuy may ɗaŋ.»

¹² David yow saɓpa kaŋga u yam Solla u guura yona huruɗta. Asi hin cuk tasiya. Sa wi va ka kom na dewɗi. Sa dew lay wi kaɗi. Sa dew lay dliɗ ka ki koloɗi lay. Asi halaŋ ki buuri senna. Yawe gasi sen ma ŋgolna kasiya.

¹³ David jak ha ki ii ko hiŋŋa, col ki kolo kay yam ɦinira na day. Duk ɦoŋosi maɗ ki kaŋga na day.

¹⁴ David yi ha kolo u delem eŋga kay suu duuna u Abner ma goŋ Nerna ana, «Abner, aŋ hin hoŋon dira ay su?» Abner hoŋ dira ana, «Ni aŋ gege, aŋ ma yi kolo u deleŋ eŋga u hum mulna wanna ni gege?»

¹⁵ David di Abner ana, «Aŋŋi sanaɗi su? Sa ko aŋ na duk suu Israelna kaɗi. Aŋ hin buu ka ki u iriŋ a gol u malaŋŋa mulnaɗi ni kay mege? Sana mbay duk suuna a ci malaŋŋa mulna kiyo.

¹⁶ Dlara aŋ laɗ ndaɗta ni ka jiviɗi. U saɓakŋa vi Yawe ni hin cagi kiyo, kay ana agi gol u malagina sa Yawe fuurumma kaɗi. Gola saɓpa vi mulnara u guura yona huruɗta tini kay yamba cecemi kaɗi.»

¹⁷ Sol hum del David hin di ana, «Ɓakŋi aŋ su, goonna David?» David di ana, «Ɓakŋi anu, malanna mulna.»

¹⁸ Nam hin di ana, «Ni kay me malanna dik u saam ma sunda na ɗaŋge? An li ni dla me ɗaŋ ge, dla cora ka egenda ni taarage?

¹⁹ Cecem wanda malanna mulna hum boy ma vi saaŋ ma sundana haa. Lini Yawe mbuɗuŋ ay yara egenni namu ni, ko nam his mbul ma his jivi ma ɦam ay ɦawana. May lini suu warna ni, ko dla cora li kasi fok Yawe kay dikka asi dikin ki karam wanda, kay doora asi doron ki kay jona vi Yawe dan ana, tuɗ li sunda maŋ loogi suu daŋŋara.

²⁰ Cecem wanda ni ko busuɗun vo ki kaŋga kay ndaŋgara ki day eg Yaweɗi, kay ana mul ma vi suu Israelna yow suuna um a hal ni yalira sunuɗ kaɗira ko ndal suuna dik u cekera kay ɦinira na.»

²¹ Sol di ana, «An li suluku. Hoŋ aya, goonna David. An ka laŋ dla co egeŋ oloɗi, kay ana iiri manda iriŋ jivi coco hu buu namma. Gasi an li dlara ni ko sa ki puluɗina na. An viɗ tan ki ŋgol cocoo.»

²² David hoŋ dira ana, «Gola saɓpa vi mulnara wanna. Duk gor njufiina sa dew mbay tlaɗ haa.

²³ Ko Yawe warak gegelay kay dlara nam laɗ jivi u hurum dewra. Yawe ni sa ma ɦaŋ karam ki konna. An min ka tin kon eg sa Yawe fuurummaɗi.

²⁴ Lini aŋ loɓ taŋ kan karami, li dlara ŋgolla coco kanu ni, an may ni li kay Yawe ni na, nam buɗun ki ko dla cora halaŋ.»

²⁵ Sol di David ana, «Heɓpa li u aŋu, goonna David. Gasi aŋ hin li dlara ŋgolora, hin faɗ uɗ ki daŋ may.» David jak fun tuɗ mamba. Sol hin hoŋ vo varam may.