1 SAMUEL 25 - Boy Lonana

Nabal min ka a njun u Davidɗi

¹ Samuel miɗ kiyo. Suu Israelna halaŋ tok tasi tiirimu. Asi tosom ha vo varam hu Rama. David gi tam hu voɗta hoŋ hu fulla Paranda.

² Sana dew hu Maon, bege mamba molira ni hu Karmel. Sa namma bege cocoo, timigiina kom buɓ buɓ hindi may, ɦugunina kom buɓ may. Nam ay hu Karmel ni a caw tlimiɗ yoori mamsina kiyo.

³ Sa namma sem ana Nabal, sem caamba ana Abigal. Ca ndaɗta yal coco lay, jiv ɦay lay. May sa namma boyom loɓ coco lay, hurum suluk lay. Nammi hu njafna vi Kalebma.

⁴ Hum ay hu fulla ana Nabal ka caw timigii mamsina kiyo ni,

⁵ David sun gor njufiina ay na doogo. David di gor njufii suu doogona ana, «Tuɗugi Karmel. Agi hin fagi Nabal, agi hin gam deɓ manda.

⁶ Agi dam ana basara wilira jivira, gaŋ deɓe, gi deɓ zina, gi deɓ maŋ suu varaŋŋa halaŋ.

⁷ An hum ana asi ka cawaŋ ta yoori maŋsina kiyo. Cecem wanda hu li ma suu taaraŋ yoori maŋsina ay umina, ami lasi dla co ay ka egesiɗi. Asi viɗ va ay ka kiɗi hu li ma asi kak ay Karmelna.

⁸ Joɓ gor njufii maŋsina asi hin daŋ dla ndaɗta. Ko gor njufii mansina fi li ma jivina varaŋu kay ana ami mba ni hu buu ma luuna. An ceneŋu, aŋ ɦal va ma aŋ ndak a ɦam maŋ suu maŋ suu sundana, maŋ goroŋŋa Davidna aya.»

⁹ Gor njufii suu vi Davidna mba ki mba ni hoŋ boy namma ki njaɗta maŋ Nabal halaŋ u sem David. Asi hin juɓa.

¹⁰ Nabal hoŋ dira maŋ suu sun suu vi Davidna ana, «David ni gege? Sa ma goŋ Jesena ni gege? Suu mborɓogina ka pii ki karam vo vi malasina ɦay.

¹¹ An hin tli mappa manna konu, yo manna konu, tliw manna konu, ma an ŋgaɗam maŋ suu caw ta yoorinana, a ɦam ki maŋ suu col ay ni ara kala an ka wiɗi lay na.»

¹² Gor njufii suu vi Davidna pereɗ irisi dagan hoŋ kay balam sesiya. Asi hoŋ ha dagan na ni tuɗ njaɗ boy namma ki maŋ David halaŋ.

¹³ David di suu mamsina ana, «Gegelay tli ŋgew mamma komu.» Gegelay ni hin tli ŋgew mamma komu. David u tamba lay tli ŋgew mamma komu. Suuna tew ko va ma kis kis fiɗi na cuk tasi kay cee David. Suu hiŋŋa kis kis mba hin ka eg tlegena may.

Abigal mbay a njun u David

¹⁴ Go njuf maa dew ni yam Abigal, caŋ Naballa ana, «Gola David sun suuna ay hu fulla u gi deɓpa maŋ malayna, nam malayna hin poŋ suu asina.

¹⁵ Doli ɗini suu asina ni suu maygi suu jivina. Asi lami dla co ay ka egemiɗi. Ami viɗ va ay ka kiɗi hu li ma ami kak ay u asina lay, hu li ma ami ay ki ŋgoo bagina lay.

¹⁶ Asi li ay ni a gulumun ma kamina njeŋge lay, faali lay, hu li ma ami li ay u asi a taa yoorinana halaŋ.

¹⁷ Cecem wanda, gola ndak wi dlara ndak hin laɗta, kay ana malaygina lay, ziim lay hin viɗ kiyo. Kam nammi sa ma sunum kaɗi ma sa ka ɓakam dlaɗina.»

¹⁸ Abigal ɓaɗ zak yow mappana koɗ kis kis mba', yow mbumbura u sum veŋŋa mba', yow timigii suu ki ziina vadl, yow tassa wa ma hawina kis, yow gugutlu mayra gii deera eg taɗ sooyra kis may, yow komnjoɗi tulumma kis kis mba' may, ɗagasi kay korra.

¹⁹ Ndaɗ di gor njufiina ana, «Tuɗugi ha fokonu, an tuɗ ha kay ceregiya.» Na may ndaɗ ne yam njufuɗ Nabal kaɗi.

²⁰ Hu li ma ndaɗ fuli kolo kay korra kal ha u ŋgusu ɦinirana, David u suu mamsina kal ay ki a ŋgafaɗta may. Ndaɗ ŋgafasiya.

²¹ David ɓak tam ana, «An loɓ tan gol u tlesuu vi sa nammana ay hu fulla hin va viɗ ka ki dewɗi ni ɦawaa. Nam hoŋon dla cora ki balam jivira.

²² Ko Lona li dla wanda, dla hiŋga eg David ɗowba eg saam ma babalira. Li ni tew ha ki vin maɗii wa ni, tlegeyem halaŋ suu coo sumura pay gulumunna na an ka hinim va dewɗi.»

²³ Abigal wi David may ni ɗiŋ ki kaŋga kay kor maɗta zak gaw. Ndaɗ ndi kaŋga u vogoɗ fok David, goɓ kaŋga duk ndaŋgara.

²⁴ Olo, ndaɗ hin cuk ki kaŋga u sem hin di ana, «Kan anu, dla cora ni kan anu, malanna. Na ni caaŋga sunda ndak a ɓakaŋ boy namma humuŋ su? Aŋ hum boy ma vi saaŋga sundana na humge.

²⁵ Ko malanna ne yam sa ma sunum kaɗi namma Nabalɗi, kay ana sem namma tinimma kammi eg liimu. Yam ana dla cora ni ndaɗ dla cora tuɗ um may. May an caaŋga sunda wi gor njufii suu vi malannana kaɗi, suu aŋ sunusina.

²⁶ Cecem wan daŋga ni malanna u saɓakŋa vi Yawena u saɓak maŋ aŋ taŋgana, Yawe ni sa doroŋ ki ana aŋ ci maɗna ɗina, li furira u bik koŋgina. Ko suu babali maŋsina, ko suu min a li dla cora eg malanna wi cecemi dlara li eg Naballa.

²⁷ Ko ŋga mayra mbaɓu maŋŋa mbaaɗ ay maŋ malannara ɦaɗ ki cecemi maŋ gor njufii suu tuɗ kay sem malannana.

²⁸ An ceneŋu, heɓ huruŋ eg caaŋga sunda kay cooɗta. Gasi daŋ may, Yawe hin ka hin bay ɦal mulla maŋ malannaɗi kay ana malanna li duu ma vi Yawena, sa ka faŋ dla co egeŋgi hu kak maŋga iiri hu duliyara halaŋ.

²⁹ Suuna yow tasi kolo a dik u malanna a cam kira, may iirira vi malanna hin hin ŋgayra duk suu iirina eg Yawe Looŋŋa, hu li ma vi suu babali maŋsinana Yawe hin gikiɗ ha ki na day, hu ŋgil mbuuru mamba.

³⁰ Hu li ma Yawe hin li dla mayra nam daɗta eg malanna jivira, nam hin tiniŋ a mulna vi suu Israelna.

³¹ Aŋ hin ka li dla cora a vo busi ki kaŋga u boy ma feɗnaɗi, malanna hin ka daɓ sem eg va hal ŋgara ŋga tambaɗi. Hu li ma Yawe li dlara jivira eg malanna wa ni, aŋ humuŋ hin gaŋ kay caaŋga sunda.»

Nabal miɗ kiyo, David ɗum Abigal

³² David di Abigal ana, «Ko Yawe Lona vi suu Israel ma sunuk ay hu buu namma ŋgafanna sem fi ŋgara.

³³ Ko sek fi ŋgara u takka jivira, ndak fi jivira kay nera ndak neen an kal ka hu li ma ci maɗna karam a ŋga tan u bik konɗi.

³⁴ Gasi daŋ may u saɓakŋa vi Yawe Lona vi suu Israelna ma doron ki a li dla corana, lini ndak mbay gin toŋgo na zak ŋgafanɗi ni tew ha ki ŋgarpiira na ni tlesuu coo sumura eg gulumunnana va ka hin ko Nabalɗi.»

³⁵ David tli tlesuu ndaɗ ɦamsina ayna komu. Nam daɗ ana, «Hoŋ vo varak u heɓpa. Gola, an humuk vunuku, an hinik u heɓpa.»

³⁶ Abigal hoŋ ay vo vi Nabal. Gola ni nam ka li luuna, luu ma gasi ma vi mulnana. Nabal hurum ki oyra u furira. Nam guruɗ tam ki na tagalas. Ndaɗ neem yam ka kay vaɗi ta ta ŋgarpiiri.

³⁷ Vin maɗii wanni hu li ma Nabal kaɗ u sum veŋ mamma kina, caamba njaɗam dlara li ayra. Na ɗaŋŋi Nabal hurum miɗ ki hurum na humus, nam mbuɗ ki ko nam ki ni cii mogora na.

³⁸ Tew ki ko va ma buu doogo na ni, Yawe waɗ Nabal nam miɗ kiyo.

³⁹ David hum ana Nabal miɗ ki wa ni, nam di ana, «Ko Yawe ma njun kan hu li ma Nabal min a duu u anna sem fi ŋgara, ma doo saam ma sunda ki kay dla corana. Kay dla cora vi Naballa, Yawe hoŋomba kay yamu.» David sun a joɓ Abigal a ɗumba.

⁴⁰ Suu li sunda vi Davidna tuɗ vi Abigal hu Karmel. Asi ɓakaɗ ni ko wanda na, «David sunumi ay varakŋi kay a vak a cara.»

⁴¹ Ndaɗ col kolo goɓ kaŋga vogoɗ duk ndaŋgara di ana, «Caaŋga sunda ni mbaɓura ka tok a mbus sem suu sun suu vi malaɗnana.»

⁴² Abigal ɓaɗ taɗ zak a tuɗta. Ndaɗ ful kolo kay kor maɗta, u suu maɗ suu sunda uɗ vadl, asi cuk tasi kay cee suu David sunusi ayna. Ko ndaɗta na ndaɗ mbuɗ ki caamba.

⁴³ David ɗum Ahinoam ta Jizreella. Asi u dlasira mbara ni boyogomu.

⁴⁴ Sol ɦal goromba Mikal ta caŋ Davidta ki maŋ Palti ma goŋ Layisna ma ay hu Galimma.