1 SAMUEL 24 - Boy Lonana

Hu zul ɦinira Einda Gedina David suɗ Sol kiyo

¹ David tuɗ ha ki tana kak ki duk ɦoŋ ɦinira Ein Gedira.

² Sol hoŋ ay vo hu li ma nam ay dik u suu Filistinna ni asi njaɗam ana, «David ka cemi ni hu fulla Ein Gedira.»

³ Sol yow suu saɓakŋa duk suu Israelna halaŋ buɓ buɓ hindi tuɗ a hal David u suu mamsina ha eg ɦinira Buketinda.

⁴ Nam tew ha tok eg kaa ma vi timigiina ma keŋ voɗta tokŋa. Hu li namma zul ɦinira ka huwa. Sol kal hu zul ndaɗta a koɗ tamba. Doli ɗini David u suu mamsina ka laki hu zul ndaɗta.

⁵ Suu vi Davidna dam ana, «Ni buu ma Yawe daŋ ana gola an hin ɦaŋ saaŋ ma babalira ki koŋu. Aŋ hin lasam ko huruŋ minda na.» David col kolo u hurum ma yara, ŋgaɗ vun koɓoɗta vi Solla kiyo.

⁶ Na may ŋgoo dagan wanni David vun dikim ɓikim kay ŋgaɗta nam ŋgaɗ vun koɓoɗta vi Solla kira.

⁷ Nam di suu mamsina ana, «Ko Yawe lan dla cora egenu lini an li dla cora eg malanna sa Yawe fuurummana. An ka lam dla co egembi, kay ana nammi sa Yawe fuurumma.»

⁸ David di boy namma na may ni col suu mamsina ni na en gaw. Nam ɦasi voɗta ka a asi vi Solɗi. Sol min tam minni kal ki hu zul ɦinira gi tam hu voɗ mamba.

⁹ Ŋgoo dagan ɗaŋŋi David kal ay ki hu zul ɦinira yi ha kolo u delemba eŋga ŋgoo Sol ana, «Malanna, mulna.» Sol gol irim ŋgorom dagan ni David goɓ vogom kaŋga duk ndaŋgara. Nam goɓ kaŋga.

¹⁰ David di Sol ana, «Kay me aŋ hum vun suu di ana David hal a laŋ dla cora egeŋŋa ni ge?

¹¹ Aŋ wi dla ndaɗta ki karam u iriŋ wa ɗaŋ. Yawe ɦaŋ ki kon karam hu zul ɦinira wa. Asi ɓak ana caŋ kiyo. An waŋ hahawaŋ di ana, an ka li dla cora eg malannaɗi kay ana nammi sa Yawe fuurumma.

¹² Gola, ɦii, aŋ bunu, gasi gol vun koɓoɗ maŋga kon wanni kay ana an ŋgaɗ vun koɓoɗ maŋga may an caŋ ka kiɗi, humma wi ki ana an dla co ka hurunɗi lay, ya ka hurunɗi lay. An li suluk ka egeŋgi lay. Aŋŋi sa dleɓen kaŋga a can kina.

¹³ Ko Yawe kaɓak namma duk ɦoŋoy u aŋŋi namu. Na may an hin ka laŋ dla co egeŋgi.

¹⁴ Ko ndal vun ŋgolo ma basina di ay jew ana, dla cora col ay ni eg suu hurusi cona. Na may an ka laŋ dla co egeŋgi.

¹⁵ Mul ma Israelna min tam a duu ni u gege? Aŋ min taŋ a dikŋi u gege? Aŋ dikŋi u di ma miɗina su? Aŋ dikŋi u yalira su?

¹⁶ Yawe hin kaɓakŋa ni namu. Nam gi ii dlara duk ɦoŋoy u aŋga ni namu. Ko nam saara njunun hu dlaanda, kaan ɓak manna buɗun ki koŋu.»

¹⁷ Hu li ma David vunum daɓ njaɗta maŋ Solna may ni, Sol dam ana, «Gasi wanni dlara aŋ daɗta su, goonna David?» Sol hin mun ki tiina na tum gaw.

¹⁸ Nam di David ana, «Aŋŋi ɗegee suunu, kay ana aŋ lan dlara jivira egenu. An may ni hin laŋ egeŋŋi dla cora.

¹⁹ Aŋ may ni karam aŋ tak jivira aŋ landa egenda ki kiɗikki. Ni kay ana Yawe ɦan ki koŋu. Aŋ may ni hin can ka kiɗi.

²⁰ Hu li ma sana ŋgaf tam u saam ma babalira wa ni nam hinim nam jak tuɗ mamba u heɓpa su? Ko Yawe ɦaŋ warakŋa kay dlara aŋ landa karam egen wanda.

²¹ Cecem wanda an wiya, aŋ hin li ni mulna, mulla Israella hin kakŋi koŋu.

²² Cecem wanda ɗaŋŋi aŋ suu taŋ ki u Yawe ana aŋ hin ka can suu hu njafanna ka ki ŋgoronɗi. Aŋ hin ka bulumun sen ka ki hu ziŋ bunnaɗi.»

²³ David suu tam fok Sol. Sol hin tuɗ vo varam ɗaŋ. David u suu mamsina hin hoŋ hu liisi ma ŋgayra.