1 SAMUEL 23 - Boy Lonana

David hu Keila u Horesa

¹ Asi mba boy namma ay maŋ David ana, «Gola suu Filistinna ka li duuna u suu Keilana, ɦurumusi tlegeyesi hu liisi ma to wana kiyo.»

² David joɓ Yawe ana, «Na ni an tuɗ huwa ni an ndak a ci suu Filistin asina ki su?» Yawe hoŋ dira maŋ David ana, «Tuɗa, aŋ hin ci suu Filistinna kiyo, aŋ hin suɗ Keila ki may.»

³ Suu vi Davidna dam ana, «Kaŋga tani hu Yuda wanni ami li ndaana. Lini ami tuɗ hu Keila wa a duu u suu Filistinna hin li ni ana mege?»

⁴ David joɓ Yawe olo. Yawe hoŋom dira ana, «Gi taŋ voɗo, tuɗ hu Keila kay an hin ɦaŋ suu Filistinna koŋu.»

⁵ David u suu mamsina tuɗ Keila duu suu Filistinna. Nam yowosi yoori masisina ay may, casi ki ŋgol cocoo. David suɗ suu hu Keilana kiyo.

⁶ Doli ɗini Abiyatar ma goŋ Ahimelekŋa pii tuɗ ŋgay tam ha ki eg David hu Keila, nam yow efodna komu.

⁷ Asi jok boy namma maŋ Sol ana David tuɗ ki Keila wa, Sol hin di ana, «Lona ɦanna ki kon wa kay ana nam duk tam kalafi ni kay tamu, nam kal tam hu zira vunuɗ u kawinara.»

⁸ Sol yow suuna um tuɗ Keila a ŋguf David u suu mamsina.

⁹ David hum ana Sol ka min tam ay a lam dla cora egemu ni nam di mul ma li ɓivunna, Abiyatar, ana, «Yow efodna ha kiyo.»

¹⁰ David di ana, «Yawe Lona vi suu Israelna, saaŋ ma sunda hum ana Sol ka mbay Keila a ɓeŋ ɦoŋzina ki kanu.

¹¹ Suu muli suu Keilana hin hinin ki kom su? Na ni Sol hin mbay ko saaŋ ma sunda humba na su? Yawe Lona vi suu Israelna jok boy namma ki maŋ saaŋ ma sunda na jokge.» Yawe di ana, «Nam hin mbaya.»

¹² David di ana, «Na ni muli suu Keilana hin hinin ki may, hin suuna ki ko Sol su?» Yawe di ana, «Asi hin hinigi ki kosiya.»

¹³ David gi tam hu voɗta u suu mamsina ɗaŋ. Suuna ko va ma kis kis karkiya na. Asi sel ay ki hu Keila tin irisi poyra ɦawa na was. Asi jok boy namma ki maŋ Sol ana David hin Keila ki wa, Sol noy sunda gam kaɗta ki lay.

¹⁴ David kak hu fulla duk ɦinira. Nam kak hu fulla Ziffa duk ɦinira. Hu li namma halaŋ wanni Sol ka halamu. Na may Lona ɦamma ka kombi.

¹⁵ David wi ana Sol kal ay ki bagi hal a cam kiyo. David ay ni hu fulla Ziffa hu Horesa.

¹⁶ Jonatan goŋ Solna gi tam hu voɗta tuɗ fi David ha hu Horesa. Nam ɦal so ura maŋ David u sem Lona.

¹⁷ Nam dam ana, «Li ndaaɗi. Bun kom hin ka vaŋgi. Aŋŋi sa hin ti mulla kay suu Israelna. An may ni hin li kaŋ a mbara ni anu. Sol bun tamba lay ni wi gasi na lay.»

¹⁸ Asi vi galamba duk tasi u dlasira mbara fok Yawe. David kak ha hu Horesa. Jonatan hin ɦoŋ ki vo varam may.

Sol ciɗ u David

¹⁹ Suu hu Ziffana tuɗ eg Sol hu Gibea. Asi dam ana, «David ŋgay tam ka ni varami kay ɦinira Horesaɗi su? Kay ɦinira Hakilara ta ka ii ko ma mbayawna na hu fullaraɗi su?

²⁰ Na ɗaŋŋi lini aŋ min a tuɗa ni aŋ tuɗa, mulna, ami hin ɦam ki ko mulna ni amiya.»

²¹ Sol di ana, «Ko Yawe paɗ vunum ki kagiya, agi suu wan hahawanna.

²² Tuɗugi ɗaŋ, halagi u dlaagira ay ki jiviya, wagi ki kagi jiviya, gologi li ma balam sem kal huna. Na ni sa wam kaɗi su? Asi dan gasi ana nam mbeleŋ cocoo.

²³ Gologiya, halagi u ŋgusugi suu nam a ŋgay tam usina kiyo. Agi hin hoŋ ay dan hu li ma agi wi ki gasi wa ni an hin tuɗ u agiya. Na ɗaŋŋi nam li ka hu mbassa ni, an hin hal u dee suu vi Yudana ki a wasi kira.»

²⁴ Asi cuk tasi hu voɗta a tuɗ Ziffa ha fok Sol. David u suu mamsina ka hu Maon duk bubura hu fulla ii mbayawra.

²⁵ Sol u suu mamsina tuɗ a halamba. Asi jok boy namma maŋ David. Nam tuɗ ki hu li ma gogoyra, kak hu fulla Maonda. Sol hum boy namma may ni, ciɗ u David hu fulla Maonda.

²⁶ Sol tuɗ u suu mamsina ii ko ɦinira maa dew. David u suu mamsina ii ko ma hiŋŋa may. David u suu mamsina tuɗ ki na zak zak a suɗ tasi ki ko Solla. Sol u suu mamsina hin na tok a fi suu vi Davidna a ŋguyusi ki duk a yowosira.

²⁷ Hu li ma sa vun sunda mbay di Sol ana, «Mbay zak kay ana suu Filistinna min tasi ay a duu u mbassa.»

²⁸ Sol seŋ ciɗta ciɗ u Davidta tuɗ duu u suu Filistinna. Ni kay ndaɗta asi yi li namma ana, «Gogoyra gasira ka huɗira.»