1 SAMUEL 22 - Boy Lonana

David mbuɗ a mul ma fok suunana

¹ David tuɗ ha ki tana pii liŋŋa hu zulla Adullamba. Gorsemma u suu hu taraŋga vi bumma bel hum boy namma. Asi tuɗ fam ha ki huwa.

² Na ɗaŋŋi suu dlara kasina halaŋ tok tasi ki egemu. Suu balna ay kasina. Suu hurusi ki ɓeŋina lay, nam hin mbuɗ ki a mul masina. Suuna ay u nammi kis kis fiɗi.

³ David tuɗ ki tana hu Mispe ta Moabba. Nam di mul ma Moabma ana, «Hin voɗta maŋ bun asi u sun asi mbay taɓ u agi ta ta an wi dlara Lona hin laɗ u anda kiyo.»

⁴ Nam tuɗusi fok mul ma Moabma. Asi kak u nam ta ta buu ma David lam hu liim ma ŋgayrana.

⁵ Sa jok vun Lona, Gad, di David ana, «Kak hu liiŋ ma ŋgayraɗi, gi taŋ ki tuɗ hu mbassa Yudara.» David tuɗ ki duk gura Hereta.

Sol ci suu li ɓivun suu Novna kiyo

⁶ Sol hum ana asi vi David u suu mamsina wani. Sol kaki hu Gibea u ŋgusu cinda kolo kay li ma mbuyna u saɓ mamba komu, suu mam suu sunda coli kolo u sesi halaŋ ŋguy kamu.

⁷ Sol di suu sun mam suu coli kolo kamma ana, «Humugi ha jiviya, agi suu vi Benjaminna, goŋ Jesena hin ɦagi senena u sene gugutlura ki magi agi halaŋ su? Na ni nam hin tinigi a mulina halaŋ fok suu bolowna su?

⁸ Agi halaŋ langi dla cora egen su? Sa ka neen yanɗi lay hu li ma goronna vi vunum ki u goŋ Jesena, dukugi ni sa dew lay saa ka kanɗi, sa neen yan kaɗi hu li ma goronna vi vunum u saan ma sunda a nam gunun dawna kaŋga fokon ko ndal karam wanda na.»

⁹ Doeg ma Edomma di ana, nam ay coli kolo eg suu sunda vi Sol, «An wi goŋ Jesena, nam mbay hu Nov vo vi Ahimelek ma goŋ Ahitubma.

¹⁰ Ahimelek joɓ Yawe kamu. Nam ɦam tlesuu tira. Nam ɦam ŋgew ma vi Goliyat ma Filistinna.»

¹¹ Na ɗaŋŋi mulna yi Ahimelek ma li ɓivunna haa, ma goŋ Ahitubma u suu mamsina halaŋ, suu li ɓivun suu hu Novna halaŋ. Asi mbay halaŋ vo vi mulna.

¹² Sol di ana, «Hum jiviya, goŋ Ahitubma.» Nam di ana, «An wanni, malanna.»

¹³ Sol dam ana, «Ni kay me agi hal a lan dla cora egenni ge? Aŋ u goŋ Jesena? Aŋ ɦam mappana u ŋgewna aŋ joɓ Lona kam lay a nam min tam egen gunun dawna kaŋga fokon ko ndal karam wanda na.»

¹⁴ Ahimelek hoŋ dira maŋ mulna ana, «Duk suu maŋ suu sunda halaŋŋi sa ma ki coli kay dlaamba gasi ko David na kaɗi su? Nammi kunuŋ mulnana. Nam mbuɗ ni sa goloŋ uŋŋa lay, suuna furuyum hu ziiŋ cocoo.

¹⁵ Ni hu buu namma an gijaŋ joɓ Lona kammi naɗi su? Ko dla cora li kamu mulna tin nekka kay saaŋ ma sundaɗi kay suu mansinaɗi lay kay ana saaŋ ma sunda wi dla ndaɗta ay ka duk na ndeɗi.»

¹⁶ «Aŋ hin miɗa, Ahimelek, aŋ u suu hu taraŋga vi buŋŋa halaŋ.»

¹⁷ Mulna di suu liŋ ɦay suu egemma ana, «Pereɗegi irigiya, cagi suu li ɓivun suu vi Yawena kiyo kay ana asi taɓ kosi u David lay. Asi wi ki gasi ana nam liŋ ay ni liŋiya may asi neen kaɗi.» Na may suu sunda vi mulna min ka ci suu li ɓivunna vi Yawena kiɗi.

¹⁸ Mulna di Doeg ɗaŋŋi ana, «Aŋu, pereɗ iriŋ ci suu li ɓivunna kiyo.» Doeg ma Edomma pereɗ irim ci suu li ɓivunna ki u tamba. Nam ci suuna ki hu buu namma dok-kalavandi yam vadl suu cuk efodna.

¹⁹ Hu Nov, ɦoŋzi ma vi suu li ɓivunna nam ci suuna ki u ŋgewna, njufiina, boyogina, kem gorira u suu fun ponana, mbutlina lay, korra u timigiina lay, nam casi ki u ŋgewna.

²⁰ Goŋ Ahimelekŋa na dew, ma goŋ Ahitubma suɗ tam kiyo. Sem ana Abiyatar. Nam ndi liŋŋa, tuɗ fi David.

²¹ Abiyatar jok boy namma maŋ David ana Sol ci suu li ɓivunna vi Yawena ki wa.

²² David di Abiyatar ana, «An wiya hu buu namma faɗta ni Doeg ma Edomma ay huwa, nam ka hin bay jok boy namma maŋ Solɗi. Anni sa mbuɗ ii yara eg ziŋ buŋŋa.

²³ Kak u anu, li ndaaɗi. Sa ma hal a caŋ kina hin can ki may, egen tani ni aŋŋi hu li ma heɓma.»