1 SAMUEL 21 - Boy Lonana

¹ David gi tam hu voɗta hin tuɗa. Jonatan hin tuɗ hu ɦoŋzina.

David hu Nov, vo vi mul ma li ɓivunna Ahimelek

² David tew ki Nov, vo vi mul ma li ɓivunna, Ahimelek. Ahimelek mbay dlak ko ndaana ŋgaf David dam ana, «Aŋ karam kay taŋ dew sa tiniŋ kaɗi ni kay mege?»

³ David di Mul ma li Ɓivunna Ahimelek ana, «Mulna ɦan voɗta dan ana sa ka wi dla mayra an sunuŋ kaɗtaɗi. Maŋ gor njufiina an vi vunun u asi ka hu lina.

⁴ Na may va ka koŋŋa ni mege? Aŋ ɦan mappana ay vadl ɗowba va ma ka fam koŋŋa.»

⁵ Mul ma li Ɓivunna hoŋ dira maŋ David ana, «Mappa ma ɦawana ka konɗi. Konni mappa ma ɓivunna. Lini gor njufiina tin tasi ka eg boyoginaɗi ni na.»

⁶ David hoŋ dira maŋ Mul ma li Ɓivunna ana, «Gasi daŋ may ami ki doori kay boyogina ko jewra na hu li ma an tuɗ ay ki bagina na. Dlara vi gor njufiinara ni teteɗta. Koyra tuɗuɗ wanda ni njenjee, na may karam gasi wanni ndaɗ ki mbuɗi teteɗ u boy namma.»

⁷ Mul ma li Ɓivunna hin ɦam mappa ma ɓivunna ɗaŋ kay ana hu li namma ni mappa ma ɓivunna ka ni nam hol ma yowom ay ki kay tabulla vi Yawera, hin a tin mappa ma kuna balamam hu buu ma tlam ay kina.

⁸ Doli ɗini hu buu namma gaw ni, asi vi sa sunda vi Sol kaŋga fok Yawe. Sa namma yam ana Doeg. Nammi sa ma Edomma. Nammi mul ma fok suu taa yoori suu vi Solna.

⁹ David di Ahimelek ana, «Saɓpa ɗowba ŋgew ka koŋ tani su? An tli ŋgew ay kaɗi lay. Ɓagi mannaɗi lay kay ana vun sunda vi mulnara ki zak cocoo.»

¹⁰ Mul ma li Ɓivunna di ana, «Ŋgew ma vi Goliyat ma Filistinna, ma aŋ cam ki hu ɦuɗugumba Terebintena ka ɗuɗi hu baraw koɓoɗta gi ŋgoo efodna. Lini aŋ min a tlamu ni aŋ tlamu kay ana ma daŋ ka taniɗi.» David di ana, «Ma ko nam na kaɗi, aŋ ɦanna manu.»

David vo vi suu Filistin suu Gatna

¹¹ David gi tam hu voɗta liŋ ŋgay tam ki day eg Sol hu buu namma gaw. Nam tew ha ki vi Akis mul ma Gatna.

¹² Suu sunda vi Akisna dam ana, «Sana wanni ka ni David mul ma kay mbassanaɗi su? Suuna gi soolla may luu njoŋŋa may ni ka umbi su? Sol ci suuna buɓ may, David ci suuna buɓ buɓ bulumi mayɗi su?»

¹³ David boy namma tam tam cocoo. Nam mbuɗ ki ndaana ko Akis mul ma Gatna.

¹⁴ Na ɗaŋŋi nam gijaŋ guruɗta irisi ni na gaw, gijaŋ ɓak ma cona kosi ni na gaw, gijaŋ ndal tlena kolo eg vun ziginina gaw lay, vunum gijaŋ gi kuffa laɓam njeerem ki may.

¹⁵ Akis di suu mam suu sunda ana, «Agi wi gasi ana ni sa ki puluɗina, agi mbaagi sa puluɗi namma ay egen tani a nam njaɗan vun guruɗ mamba egenni kay mege?

¹⁶ Suu guruɗina ka egen haw su? Agi mbaan sa guruɗi namma ay egen a nam njaɗan vun guruɗ mamba egenni kay mege? Sa ko nam nana ndak a kal hu ziinda su?»