1 SAMUEL 20 - Boy Lonana

Jonatan vi vunum u David

¹ David ndi liŋŋa ay ki hu ɦoŋzina Nayot ma Ramana tuɗ di Jonatan ana, «Va an lamma ni mege? Dla cora an laɗta ni taarage? Suluk ma an lam eg buŋ ma nam hal a can ki kamma ni manage?»

² Jonatan hoŋom dira ana, «Ni dla cora. Aŋ hin ka miɗɗi. Gola bun ka li dla ki bay neen yanɗi. Ni kay me bun ŋgayan dla ndaɗta kon na nige. Dla ndaɗta ka liɗi.»

³ David hoŋ di olo suu tam ana, «Buŋ wi gasi ana an ka fi jivira egeŋu. Nam ɓak tam ana ka Jonatan ŋgay vaɗi, ka nam fi dlara loɓmaɗi. Na may u saɓak maŋŋa u saɓakŋa vi Yawena duk ɦoŋon u maɗna hinni semma dew.»

⁴ Jonatan di David ana, «Dlara aŋ miniɗta an hin laŋga.»

⁵ David di Jonatan ana, «Gola vinni vun tilna. An hin kak eg mulna a ti tina. Na may aŋ hin hinin an tuɗ ŋgay duk bubura ta ta fiɗigi siwiya.

⁶ Lini buŋ wi ana an kaɗi ni, aŋ hin dam ana, David vi tam a joɓ voɗta a tuɗ ay Betlehem hu ɦoŋziimma kay ana asi ka li ɓivun ma vun basara kay njaf suuna halaŋ.

⁷ Lini mulna di ana, ni jiviya ni saaŋ ma sunda tam ki koɗiya. May lini nam mbuɗ ki yara wa ni aŋ wi ana nam col ni a baan kira.

⁸ Li dlara u huruŋ ma jivina eg saaŋ ma sunda kay ana aŋ vi galamba u nammi u sem Yawe. Lini dlara van wa ni kay dla taaragelay ni, aŋ can ki u taŋga, a tuɗun ha fok buŋ na mbee ni kay mege?»

⁹ Jonatan di ana, «Ni dla cora lini an wi gasi ana bun min a baaŋ kiyo ni an hin daŋu. An suu tan ki fokoŋu.»

¹⁰ David di Jonatan ana, «Sa hin dan na ni gege, lini buŋ hoŋoŋ dira eŋga wa may ge?»

¹¹ Jonatan di David ana, «Mbaya, tuɗuygi bagiya.» Asi u dlasira jakka sel ki tuɗ ki bagi ɗaŋ.

¹² Jonatan di David ana, «U sem Yawe Lona vi suu Israelna, gasi an hin hal u saara vi bunda ki vin ɗowba siw faɗta ko wanda na. Lini boyna kay David jiviya ni an hin ka hal voɗta a neeŋɗi su?

¹³ Ko Yawe li dla wanda eg Jonatan, li dla hiŋga lay. Lini bun min a laŋ dla cora egeŋ lay ni an hin neeŋu. An hin hiniŋ aŋ tuɗa. Aŋ hin tuɗ u heɓpa. Ko Yawe li u aŋ ko nam li ay u bunda na.

¹⁴ Lini an ka iiri tuwa ni aŋ hin li ɗegeera Yawe miniɗta u anni naɗi su? Lini an miɗ ki wani

¹⁵ aŋ ka ndak a tli ɗegeera ki hu ziinɗi lay naɗi su? Kaɗi lay hu li ma Yawe hin yow suu babali suu vi Davidna ki dew dew kay yam ndaŋgarana.»

¹⁶ Jonatan vi vunum u suu vo hu ziŋ Davidna ana, «Nam Yawe hin joɓ dla ndaɗta ki eg David ɗowba ki eg suu babali mamsina na ɗow.»

¹⁷ Jonatan suu David ki kay galamba nam vaɗ u namba kay ana nam minimmi ko tamba na.

¹⁸ Jonatan dam ana, «Vinni vun tilna. Asi hin wi ana aŋ kaɗi, kay ana liiŋŋa hin hin ki dukŋi ɦawaa.

¹⁹ Aŋ gijaŋŋa siw tuwa. Aŋ hin hoŋ kaŋga cocoo. Aŋ hin tuɗ hu li ma aŋ ŋgay ay ki huna hu buu ma dlara a li huna. Aŋ hin kak eg ɦinira Ezella.

²⁰ An may ni hin mun mbuurura hindira ki keŋe hu li ma an tinim fokonna.

²¹ Na ɗaŋŋi an hin sun gogoona ha ana, tuɗ hal mbuurura aya. Lini an di gogoona ana mbuurura ha ka ki egeŋ dayɗi, aŋ yowoɗ aya, aŋ hin hoŋ ay ɗaŋŋi ni aŋ kak na enni ana u saɓakŋa vi Yawena va laŋ kaɗi.

²² May lini an di goozoŋŋa ana, mbuurura ha ki egeŋ day aŋ tuɗa ni kay ana Yawe min ana aŋ tuɗa.

²³ Kay boy ma ay ɓakam duk ɦoŋ tay u anna, Yawe ka duk ɦoŋoy u an a fafaɗta.»

²⁴ David hin ŋgay tam ki duk bubura ɗaŋ. Vun tilna hin ndak may, mulna hin kak fun tabulla a ti tina.

Yara Sol laɗ eg Davidta

²⁵ Mulna kak kay guumma ko jew dayra na kay gu ma tini pay goŋga nana. Jonatan col koloo. Abner kak eg Sol. Li ma vi Davidna hin ki ɦawaa.

²⁶ Sol di va ka hu buu nammaɗi kay nam ɓak tam ana, «Ni dakka. Nam ka ki teteɗɗi. Ni gasi daŋ may.»

²⁷ Doli ɗini ŋgoo vun tilna dagan siw hu buu ma mbana li ma vi Davidna hin ki ɦawa olo. Sol di goromma, Jonatan, ana, «Kay me goŋ Jesena mba ka a ti tina kaaɗi lay, karambi lay nige?»

²⁸ Jonatan hoŋ dira maŋ Sol ana, «David vi tam gak gak a tuɗ ki Betlehem.

²⁹ Nam dan ana, hinin an tuɗa. An ceneŋu kay ana ɓivunna ha ka komi a lira hu dee mamira hu ɦoŋzina. Wayanna u tamba lay ɦan voɗta ay ki wa. Na ɗaŋŋi lini aŋ a lan dlara jivira ni aŋ hinin an suɗ tan ki tuɗ a gol gorsenna. Ni kay ndaɗta nam mba ka a ti tina ko tam u mulna kay tabullaɗi ni na.»

³⁰ Sol mbuɗ yara ki eg Jonatan, nam hin dam ana, «Goŋ dirana, an wi ana gasi aŋ njun u goŋ Jesena zolona kaŋ lay kay suŋ ta vuɗuŋga lay.

³¹ Kay ana kaka goŋ Jesena hin kak kay ndaŋgara ta tara lay ni aŋ hin ka mbuɗ saɓak a ti mullaɗi. Cecem wanda aŋ vam aya, asi mbaanna ay tani kay ana nam a ci ki ni ciiya.»

³² Jonatan hoŋ dira maŋ bum Sol dam ana, «A cam ki ni kay mege? Va nam lamma ni mege?»

³³ Sol koo saɓpa kolo kam a kusumba. Jonatan wi ana ni dlara bum vi vunum ki kaɗ a ci David kira daŋ may.

³⁴ Jonatan u hurumma yara col ki kolo fun tabulla, ti va ka hu buu ma vun tilna a mbaranaɗi, kay ana dlara vi Davidta tam tam cocoo kay ana bum ŋgulumu.

Jonatan ne yam David

³⁵ Doli ɗini vin maɗii wanni, Jonatan kal ki tuɗ duk bubura u vi vun ma u Davidna. Nam tuɗ u gogoo ma goona umu.

³⁶ Nam di gogoo mamma ana, «Liŋ yowon ay mbuuru manda an duuruɗ ha kira.» Gogoona ndi liŋŋa may, Jonatan duu mbuurura ha ki wanni ndaɗ jak kamu.

³⁷ Gogoona tew hu li ma Jonatan duu mbuurura ha ndaɗ tuɗ ndi huna may ni, Jonatan yam ha kolo eŋga ŋgorom dagan ana, «Mbuurura wanni li ha kaki ni fokoŋ tu kalage?»

³⁸ Jonatan yi gogoona ha kolo ŋgorom dagan eŋga ana, «Tuɗ zak, col dukgi.» Gogoo ma vi Jonatanna tli mbuurura hoŋ ay eg malamma.

³⁹ Gogoona ka wi vaɗi may Jonatan asi u David wiya.

⁴⁰ Jonatan ɦal ɓagi mamma maŋ gogoo mamma hin dam ana, «Yowosi tuɗusi vo hu ɦoŋzina.»

⁴¹ Gogoona hoŋa. David col kolo irim u mbayaw na. Nam puk kaŋga u vogom kay ndaŋgara, goɓ kaŋga yam hindi. Asi mboɗ tasi kolo hu tasiya, tii ko tasi ta ta David tii su Jonatan.

⁴² Jonatan di David ana, «Tuɗ u heɓpa kay ana ay gegelay suuruy tay ni u sem Yawe. Ko Yawe li duk hoŋoy aŋ u anu duk ɦoŋ njafaŋ u njafan a fafaɗta.»