1 SAMUEL 2 - Boy Lonana

Ane gi deɓpa maŋ Bu Suuna

¹ Ane cen di ana, «An hurun fi heɓpa ni u Yawe, ɗegee yan ki kolo ni u Yawe. Vunun mal ki ŋgolla eg suu babali mansina. An li furira kay saɓak maŋŋa.

² Sa ma ki teteɗ ko Yawe na kaɗi. Sa daŋ ma ko aŋ na kaɗi. Ҥinira ko ndal Looygina nara kaɗi.

³ Hoŋogi dlara bay uɗta na hoŋ hoŋgi. Ko boy ma cona kal ay ki funugiɗi. Yawe ni Lo ma wi dlara. Nammi sa ŋga nek dlara.

⁴ Gu mbuurura vi suu saɓakŋa ki kusiya. Suu maŋina njun saɓakŋa hurusi a ɗikŋa.

⁵ Suu hayasi hoɓina tuɗ hal sunda ti vunusira. Suu mayra casina koɗ tasiya. Ca mayra gendergera lay ni vuɗ gorra yaɗ kiɗisiya. Cara vuɗ gorra hin mbuɗ ki gendergera.

⁶ Yawe ndak ci sana ki lay, hoŋom ki iiri lay. Kal sana kaŋga hu zulla kura lay, hin tlam ay ki kolo lay.

⁷ Yawe mbuɗ sana ki hawra lay, mbuɗum ki bege lay. Nam hoŋ sana ki kaŋga lay, tlam kolo lay.

⁸ Nam hoŋ sa maŋina ay ki tlira kolo duk gugum ndaŋgara lay, taɗ sa hawra ay ki kay didiŋga lay, a asi kak ko tasi u goryoŋ mulinana a ɦasi li mulina kak huna kay ana saɓak ma kay ndaŋgarana ni vi Yawe. Nam tin u duliyara ni namu.

⁹ Nam hin fuɗ sem saam ma ɗegeena, na may suu sulukŋa hin miɗ ki duk ndufunda, kay ana saɓakŋa hin ka ti oloɗi.

¹⁰ Yawe, suu babali mamsina hin miɗ kiyo. Ay kolo huulona day ni nam hin ŋgoɓosiya. Yawe hin kaɓakŋa kay ndaŋgara halaŋ. Nam hin ɦal saɓakŋa maŋ mul mamma. Nam hin tli yam saam ma suɗta koloo.»

¹¹ Elkana tuɗ vo varam hu Rama. Goo namma hin sun Yawe fok mul ma li ɓivunna, Heli.

Dla cora goryoŋ Mul ma li Ɓivunna, Heli, laɗta

¹² Goryoŋ Helina sunusi kaɗi. Asi ka wi Yaweɗi.

¹³ Suu li ɓivunna asina li dlara eg suuna ni ko wanda na. Hu li ma sana mbay a li ɓivunna, sa li sunda fok sa li ɓivunnana mbay, ni hu li ma asi ka zal tliwna may. Nam tli koyor ma sinim hindina komu.

¹⁴ Nam cokom sinim kuŋgu hu doyra, hu gidirna ɗowba hu doyra. Tlesuu tli ay kolo fun koyorna halaŋŋi, Mul ma li Ɓivunna tlasi ki ni mam tamba. Nam li u suu Israel suu hiŋŋa suu mbay tani hu Silona halaŋ.

¹⁵ Su olo, jew a ŋgal mbulna kira ni sa li sunda fok sa li ɓivunnana mbay di sa mbay a li ɓivunnana ana, «Ҥal tliw ma sorom maŋ Mul ma li Ɓivunnana aya. Nam ka miniŋ tliw maŋ ma zalinaɗi, may minni tliw ma iirina.»

¹⁶ Lini sana dam wa ana, «Asi ŋgal mbulna ki wa ni aŋ hin mbay yow tliw ma aŋ minimma tuwa ni,» nam hoŋom dira ana, «Ҥawaa aŋ ɦanna ni cecem gaw, li ka naɗi ni an hin yowommi u eŋga.»

¹⁷ Suluk ma vi gorzoŋinana ŋgolla fok Yawe kay ana suu asina ɓeŋ ki ni ɓivun ma vi Yawena.

Samuel li sunda maŋ Bu Suuna hu Silo

¹⁸ Samuel li sunda fok Yawe. Nammi gogoo ma cukum efodna egemma.

¹⁹ Sum cilim koɓoɗta goora egemu. Cukumba egem hu basara tew tew hu li ma asi u njufuɗ tuɗ a li ɓivun ma vun basara.

²⁰ Heli paɗ vunum ki kay Elkana u caamba. Nam di ana, «Ko Yawe ɦaŋ njafna u caaŋ ndaɗta a varak balam goroŋ ma ɦam ki maŋ Yawe wanna.» Asi hin hoŋ vo vi Elkana.

²¹ Ko Yawe hum cenda vi Anera na ni ndaɗ hin vuɗ gor njufiina hindi may, gorɓiina mba' may hu li ma gogoona ka wul fok Yawena.

²² Heli mbuɗ ki maara cocoo. Nam hum dlara goryom ka laɗ eg suu Israelnara halaŋ. Asi buu u boyogi suu ka moli kaŋga fun Mbutluɓ ma Tokka hurumma lay.

²³ Nam dasi ana, «Agi li dlara ko ndaɗta nara ni kay mege? Dlara an humuɗ co u segira suuna halaŋ ɓakaɗu.

²⁴ Seŋegiya goryonu, dlara an humuɗ suu vi Yawena ɓakaɗ kagira ka jiviɗi.

²⁵ Lini sana li sulukŋa eg ndaramma wa ni Lona ndak gi ii dla ndaɗta. May lini sana li sulukŋa eg Yawe wa ni sa hin gi ii dla ndaɗta na ni gege?» Asi hum vun busi kaɗi. Ni kay ana Yawe min a casi kiyo.

²⁶ Samuel ma goona may ni wul kolo fok Yawe fiyek lay, jivi coco fok suuna lay.

Ɓak ma dam ki kay Heli u suu mamsinana

²⁷ Sa vi Lonana mbay fi Heli dam ana, «Yawe ɓak anaba, ni mege, an tak tan ki ii suu vi buŋŋa hu li ma asi ay mbaɓura Egipte ko suu vi Farawnaɗi su?

²⁸ Buŋ an manam ay ki duk njaf suu Israelna halaŋ a nam li a mul ŋgol ma li ɓivunna. Nam hin kal eg givin ma togolla manna. Nam hin ɗus tlesuu his jivina. Nam hin cuk efodna, col fokonu. An ɦal tlesuu suu Israelna mbay u asi a li ɓivunnana halaŋ ki maŋ buŋu.

²⁹ Ni kay me agi tayan ɓivun manna ki kaŋga may? Ҥalla ɦawara an ndumuɗ ka hu ziindara ni ge? Ni kay me aŋ ɦal ŋgara maŋ goryoŋ suunni ge? Ni kay ana agi ɗorogi tagi ki u tlesuu jivi suu suu man suu Israelna ɦansina ayna halaŋ halaŋga su?

³⁰ Ni kay ndaɗta Yawe Lona vi suu Israelna di ana, gasi an di ana, ziiŋu u ziŋ buŋŋa hin tuɗ fokon a fafaɗta. May cecem wanda Yawe gasi vunna. An tli yam suu ŋgaana kolo may, suu ka mininɗina hin ndi duk dla cora.

³¹ Gola, buuna ka mbaa, ma an hin kusuŋ bikiŋ kina, hin kus bik suu vo vi buŋŋa ki may. Sa maa hin ka hin hu ziiŋ oloɗi.

³² Aŋ hin wi sa babalira hu zira u tlesuu jivi suu nam lasi maŋ Israelna halaŋ, may hu ziiŋ wanni sa maa hin ka hin oloɗi.

³³ Ko ndaɗta na ni an hin vi saaŋ maa dew hin tinim eg givin ma togolla manna a duguŋ iriŋ kira, a yow ki u buu maŋ ma aŋ a kak iirina, may njafaŋ ma vo hu ziiŋŋa hin miɗ ki ko maara.

³⁴ Va ma hin takaŋ dla ndaɗta kina ni dlara hin li eg goryoŋ suu mbana Hofni u Pinhas. Asi hin miɗ ni hu buu ma dewna u dlasira mbara.

³⁵ Na ɗaŋŋi an hin tli Mul ma li Ɓivun ma gasina. Nam hin li ni dlara hurun miniɗta u dlara an saaraɗta. An hin minim zira jivira. Nam hin tuɗ tew tew ni fok saan ma Lona fuurumma.

³⁶ Tlesuu hin ay ki hu ziiŋgana halaŋ hin mbay goɓ kaŋga fokom kay gor silira u funa. Nam hin dam ana, njununu, an ceneŋu a an fi sunda li ɓivun nde a fi funa a tira.»