1 SAMUEL 19 - Boy Lonana

Jonatan njun kay David

¹ Sol ɓak goromma Jonatan u suu li sunda varamma halaŋ kay dlara nam hal a ci David ki u ndaɗta. Doli ɗini Jonatan ma goŋ Solna min David cocoo.

² Jonatan jok boy namma ki maŋ David ana, «Bun Sol ka hal a caŋ kira, aŋ gol taŋ jivi vin maɗiiya, kak u ŋgusuna ŋgay taŋu.

³ An may ni hin kal ki col eg bun hu sene ma aŋ huna. An hin ɓakaŋ dlaŋ maŋ bunu. An hin wi dlara hurumba hin jokoŋga ki may.»

⁴ Jonatan ɓak bum Sol kay David. Nam dam ana, «Ko mulna li sulukŋa eg saam ma sunda Davidɗi, kay ana nam laŋ suluk ka egeŋgi, dlara ŋgolora nam laɗta ni jivi egeŋ na ɗow.

⁵ Nam ba gin tam ki u cira nam ci sa Filistinna kira, may Yawe tak saɓak mamma ki maŋ suu Israelna bel. Aŋ wam lay, li furira kam lay. Ni kay me aŋ min a li sulukŋa a vo busu sa li va kaɗina kige? Hal a ci David bay dlara kom lay nige?»

⁶ Sol hum del Jonatan, Sol suu tam ana, «U saɓakŋa vi Yawena nam hin ka miɗ kiɗi.»

⁷ Jonatan yi David njaɗam boy namma ki halaŋ halaŋ. Olo Jonatan mba David ay eg Sol. David hin li sunda varam ko jewra na.

Mikal suɗ David kiyo

⁸ Duuna gijaŋŋa olo. David duu suu Filistinna. Nam casi cira ŋgolla na ni, asi njay ki liŋŋa fokom gaw.

⁹ Ŋgussa cora col ay eg Yawe mba kay Sol. Nam kaki hu ziimba u saɓpa komu hu li ma David bu vaammana.

¹⁰ Sol hal a ɓal David ki pay goŋga u saɓ mamba, may David fuɗ tam ki ko kussa vi Solla. Saɓpa vi Solla pi ki eg goŋga. David ndi liŋŋa ŋgay tam ki njeŋge ndaɗta gaw.

¹¹ Sol sun suuna ha hu ziŋ Davidna a golom umba, hin cam ki vin maɗiira. Mikal, caŋ Davidta, jokom boy namma dam ana, «Lini aŋ suɗ taŋ ka hu njeŋgera karambaɗi, ni vinni asi hin caŋ kiyo.»

¹² Mikal sii David ki hu ii zira. Nam ndi liŋŋa, suɗ tam kiyo.

¹³ Mikal tli foto fulna tinim kay layna gun bayra ciliɗ u tlimiɗ ɦuguninara kay yam layna, cukuɗ barawna egeɗu.

¹⁴ Sol sun suuna ha a vi David ayra. Mikal dasi ana, «Nam tuguɗiiyo.»

¹⁵ Sol sun suuna ay ana asi gol David haa. Asi tlam ha u lay mamma, nam hin cam kiyo.

¹⁶ Hu li ma suu sunda kal ha hu zira ni asi fi ni foto fulna u bayra ciliɗ u tlimiɗ ɦuguninara kay yam layna may.

¹⁷ Sol di Mikal ana, «Ndak ganan yan na ni kay mege? Ndak hinin saan ma babalira tuɗ suɗ tam ki wa.» Mikal di Sol ana, «Nam danni ana, hinin an tuɗa. An ndak a cak ki su?»

David u Sol hu Rama

¹⁸ David suɗ tam ki u ŋgayra suɗ ni tuɗ vi Samuel hu Rama. Nam ɓakam dlara Sol lamba egemba ki halaŋ. Nam may, Samuel may, asi tuɗ kak hu ɦoŋzina Nayot.

¹⁹ Asi mbay di Sol ana, «Gola David ha ki hu ɦoŋzina Nayot ma Ramana.»

²⁰ Sol sun suuna ha ana tuɗ vam David aya. Asi wi suu jok vun Lona u tasi bolowra ɓak boyna. Samuel coli fokosiya. Musuk Lonara mba kay suu Sol sunusi ayna, casi kiyo.

²¹ Asi tuɗ njaɗ boy namma maŋ Sol. Nam sun suu daŋŋa ay olo. Asina Musuk Lonara casi ki lay. Sol sun suu hiŋŋa ay a hindira u tasi bolowra olo. Asi li ko suu jewna na olo.

²² Nam tuɗ u tamba hu Rama hin tew ha ki hu goloŋ ma ŋgol ma hu Sekuna. Nam joɓ ana, «Gi Samuel u David ni arage?» Asi dam ana, «Asi ha ni hu ɦoŋzina Nayot ma Ramana.»

²³ Nam tuɗ hu li namma hu ɦoŋzina Nayot ma Ramana. Musuk Lonara mba kam lay. Musuk Lonara cam kiyo. Nam tuɗ fok na ɗow ɗow ta ta tew ki hu Nayot ma Ramana.

²⁴ Nam tamba lay fok barawi suu egemma ki fok Samuel. Olo ɗaŋŋi nam ki siiliya. Nam puk kaŋgaa, hin kaŋga maɗii gak gak njeŋgera hin fam lay. Gola ni kay ndaɗta suuna di ana, «Na ni Sol ka ni duk suu jok vun Lona lay su?»